رەداكتسيا ۇجىمى جازعى كانيكۋلدان ورالىپ، گازەتتىڭ جاڭا سانى بەتتەلىپ جاتقاندا، بەلگىلى جاس راديوجۋرناليست مارجان سۇلتانباەۆا «رۋسسكوە راديودان» قۋىلىپتى دەگەن حابار ەستىدىك. راسىندا، مارجانعا قاتىستى ءبىزدىڭ الاڭدايتىن ءجونىمىز بار: بىرىنشىدەن، ول ءبىزدىڭ گازەتتىڭ وتكىر كەيىپكەرى. ەكىنشىدەن، قازاق اراسىندا كەنجە دامىعان «عم راديودا» تىكەلەي ەفيردى ەمىن-ەركىن مەڭگەرىپ جۇرگەن كاسىپقوي قازاق قىزىن قياناتتان قورعاۋ - ۇلتىنا قىزمەت قىلعان ءار باسىلىمنىڭ پارىزى سانالسا كەرەك.

ءيا، زاڭسىزدىق پەن قيانات جايلاعان بۇل قوعامدا كىم قۋعىن كورمەي جاتىر دەرسىز. بىراق بىزگە جەتكەن اقپارعا قاراعاندا، مارجان «رۋسسكوە راديودان» قازاق ءتىلىن قورعاپ قۋىلعان كورىنەدى. ورىستار قوجالىق ەتكەن الاقانداي عانا راديودا انا تىلىنە اراشا تۇسكەن قارشاداي قىزدىڭ قايسار قىلىعىن تومەنگى سۇحباتتان وقىپ كورىڭىزدەر.

- مارجان، ادەتتە جۋرناليست اعايىندار اراسىندا قاۋەسەت جاتپايدى: «رۋسسكوە راديودان» كەتكەنىڭ راس پا؟

رەداكتسيا ۇجىمى جازعى كانيكۋلدان ورالىپ، گازەتتىڭ جاڭا سانى بەتتەلىپ جاتقاندا، بەلگىلى جاس راديوجۋرناليست مارجان سۇلتانباەۆا «رۋسسكوە راديودان» قۋىلىپتى دەگەن حابار ەستىدىك. راسىندا، مارجانعا قاتىستى ءبىزدىڭ الاڭدايتىن ءجونىمىز بار: بىرىنشىدەن، ول ءبىزدىڭ گازەتتىڭ وتكىر كەيىپكەرى. ەكىنشىدەن، قازاق اراسىندا كەنجە دامىعان «عم راديودا» تىكەلەي ەفيردى ەمىن-ەركىن مەڭگەرىپ جۇرگەن كاسىپقوي قازاق قىزىن قياناتتان قورعاۋ - ۇلتىنا قىزمەت قىلعان ءار باسىلىمنىڭ پارىزى سانالسا كەرەك.

ءيا، زاڭسىزدىق پەن قيانات جايلاعان بۇل قوعامدا كىم قۋعىن كورمەي جاتىر دەرسىز. بىراق بىزگە جەتكەن اقپارعا قاراعاندا، مارجان «رۋسسكوە راديودان» قازاق ءتىلىن قورعاپ قۋىلعان كورىنەدى. ورىستار قوجالىق ەتكەن الاقانداي عانا راديودا انا تىلىنە اراشا تۇسكەن قارشاداي قىزدىڭ قايسار قىلىعىن تومەنگى سۇحباتتان وقىپ كورىڭىزدەر.

- مارجان، ادەتتە جۋرناليست اعايىندار اراسىندا قاۋەسەت جاتپايدى: «رۋسسكوە راديودان» كەتكەنىڭ راس پا؟

- كەتكەنىم راس. قۋعان جوق ەشكىم، تەك ءتىلىمىزدى كەمسىتىپ، قازاقتىڭ ابىرويىن توككەنى بولماسا، جينالىستاردا ءاربىر ءسوزدى شىمشىپ ايتىپ. ءوزىمدى، شىنىمدى ايتسام، سول ءسات وزگە ەلدە جالدامالى جۇمىسقا جەگىلگەن قارا جۇمىسشى رەتىندە سەزىندىم. ايانىشتى كۇي! «كەل!» - دەپ شاقىرىپ الىپ كەرەك كەزدە، قاجەتىڭ بولماعاندا ءبىر شەتكە ىسىرىپ تاستاپ جاتسا - تيمەي مە نامىسىڭا؟!. ايقاي-شۋ شىعارىپ جاتپادىم. ويلانىپ تا ۋاقىت وتكىزبەدىم تەككە. ءتورت جىلعى جۇمىسىمدى، تۇراقتى ورنىمدى ساناۋلى ساعات ىشىندە تاستادىم دا كەتتىم. سول قاسيەتتى جۇما كۇنگە تۇسپا-تۇس كەلدى. بەيسەنبى كۇنى تۇندە نانىمدى اشىتىپ، تاڭەرتەڭ ءيىس شىعارىپ، جەتى شەلپەك ءپىسىرىپ، باردىم دا، ۇستاتتىم قولدارىنا «ءوز ەركىممەن كەتۋ» تۋرالى ارىزىمدى. ول جەردە وتىرىك كۇلىپ قالا الماس ەدىم ءبارىبىر.

- نە ءۇشىن؟ سەبەپكەر نە، كىنارات كىمنەن؟

- سول باياعى قۇردىمعا كەتىپ بارا جاتقان سورلى ءتىلىمىزدىڭ مارتەبەسىن كوتەرەم دەپ مەن شىر-پىر بولدىم. ولار «باسۋ» ايتتى ماعان: «اينالايىن، ساعان قازاقشا سويلەۋگە مۇمكىندىك بەرگەنىمىزگە راحمەت ايت!» - دەپ. جينالىستا ەفيرگە قازاق اندەرىنىڭ قويىلۋ ماسەلەسىن قانشا رەت كوتەردىم. ناتيجەسى سول - جەككورىنىشتى بولدىم تەك قانا. ايتتىم - كوشەدەن كورىپ قالعاننىڭ دا، ەفيرگە حابارلاسقاننىڭ دا وكپە-رەنىشىن، قازاق تىلىندە سويلەپ وتىرىپ، دومبىرانىڭ قوڭىر داۋسىن ەستۋگە زار بولعان قالىڭ كوپشىلىكتىڭ تىلەگىن ورىنداي الماي وتىرعانىمدى... مەنى مازاق ەتىپ مىرس كۇلدى. شاراسىزدىقتان تاعى دا سالىم سۋعا كەتتى. ال تىڭدارماندار بولسا، ميكروفون الدىندا وتىرعان ادامنان كورەدى: «ەي، جۇرگىزۋشى قىز، نەعىپ قويمايسىڭ مىقتى بولساڭ ءبىر ءانىن قازاقتىڭ؟!..» - دەپ، «سمس» جازىپ، ونسىز دا مەڭدەپ تۇرعان جاراڭنىڭ بەتىنە تۇز سەبەدى. سونىمەن، ءساتتى كۇنى سارسەنبىنىڭ جاعىمسىز جاڭالىق ەستىدىم: «سەندەر قازاقشا سويلەسەڭدەر، ءبىزدىڭ رەيتينگىمىز ءتۇسىپ قالادى، باستىق ايتتى سولاي دەپ... كۇندىزگى قازاق ەفيرىن الىپ تاستادىق...» - دەدى. جينالىس اشىپ ءتۇسىندىرىپ ايتسا ەكەن، بۇرىندا سولاي ىستەيتىن، ارتتارىن جۋىپ-شايىپ - بۇل جولى قاتتى كەتتى. سوعان قاراعاندا، تىرەگى مىقتى بولۋ كەرەك باسشىلاردىڭ. سەنىپ وتىر-اۋ الدەكىمدەرگە، ايتپەسە، زاڭعا قايشى كەلەتىن ارەكەتتەرىن بىلمەي وتىرعان جوق.

- تاپسىرىسپەن قۇتتىقتاۋ اندەر بەرىلەتىن «ستول زاكازوۆ» باعدارلاماسىن ورىستاردان بۇرىن قازاقتار كوپ تىڭدايتىن سياقتى. سوندا ەفيرگە ونىڭ سەن جۇرگىزەتىن قازاقشا نۇسقاسى شىققاندا، رەيتينگىسى تومەندەپ كەتەدى دەگەن نە ءۋاج بولدى؟

- تىڭدارماندار از بولمادى - ونى كەلگەن حاتتار بويىنشا دا اڭعارۋعا بولار ەدى. حالىق بەلسەندى، قوڭىراۋلار ۇزىلمەيدى. تەك ءتىل بىلمەيتىندەردىڭ ساناسىندا «قازاقشا جۇرەتىن جوبالاردىڭ رەيتينگى تومەن بولادى!» - دەگەن قيسىق قاعيدا قالىپتاسقان. وكىنىشتىسى - جۇمساق ورىندىقتا وتىرعانداردىڭ باسىم كوپشىلىگى قازاقتىڭ تىلىنە اياۋشىلىق بىلدىرمەيتىن سياقتى.

- جالپى «رۋسسكوە راديوداعى» قازاق ءتىلىنىڭ احۋالى نەشىك؟ حاباردى «ەلۋ دە ەلۋ» تەڭگەرمەشىلىگىمەن تاراتۋ ءتارتىبى ساقتالا ما؟

- ءبىر مەكەمەنىڭ اينالاسىندا ءورشىپ جاتقان پروبلەما ەمەس بۇل. «ەلۋ دە ەلۋ» - دەن كەيىن تاعى وزگەرىس ەنگىزدى عوي ءبىزدىڭ اقىلدى دەپۋتاتتار. ول بويىنشا ءار ءۇش ساعات سايىن قازاقشا سايراۋ كەرەك بولاتىن. قازىر بىزدەگى حابار تاراتىپ جاتقان اۋە تولقىندارداعى جاعداي: مەملەكەتتىك تىلدە 60 سەكۋند سويلەيمىز - ونى ەسەپ بەرۋ قاعازىنا باقانداي 60 مينۋت دەپ جازادى. تۇسىنىكتى، بارلىعىنىڭ وزىندىك فورماتى بار: ءبىرى - شەتەل اندەرىن ناسيحاتتايدى، ءبىرى - ورىس ەستراداسىن، ەندى ءبىرى - كلاسسيكا... بىراق مەملەكەتتىك ءتىلدى ءبىر شەتكە ىسىرىپ تاستاۋلارىنا حاقىلارى جوق قوي.

- ال وسى «ءتىل تۋرالى زاڭنىڭ» ورىندالۋ بارىسىن تەكسەرىپ جۇرگەن دەپۋتاتتى نەمەسە بيلىك وكىلىن كورە الدىڭ با؟

- تەكسەرەتىن، زاڭنىڭ ورىندالۋىن قاداعالايتىن مەكەمەلەردىڭ بار ەكەنىن بىلەمىز، ارينە. تەك توبەلەرىن كورسەتپەيدى ولار. ءجيى-ءجيى قوناققا كەلىپ تۇراتىن بولسا - جاعداي باسقاشا بولار ەدى دەپ ويلايمىن. ال دەپۋتاتتار «دليا گالوچكي» زاڭ قابىلداۋدان ۇيالاتىن تۇرلەرى جوق. اتاسىنىڭ باسىنا جازا ما، زاڭدى ورىنداتا الماسا؟.. (قاتتى ايتقانىم ءۇشىن كەشىرىم سۇراعىم دا جوق!). قازاقتا جاقسى ماقال بار: «قارامايتىن قىز جوق - قاراتا المايتىن جىگىت بار» - دەيتىن. سول سياقتى، ورىندالمايتىن زاڭ جوق، ورىنداتا الماي وتىرعان بيلىك بار. ءوز ەلىمىزدە ءجۇرىپ، ءتىلىمىزدى مەنسىنبەي قورلاعاندارعا: «شاڭىراققا قارا!» - دەپ ايتا الماساق، ول - ەڭ ءبىرىنشى شيكى زاڭ جازاتىن دەپۋتتاردىڭ ارقاسى دەپ بىلەم مەن.

- بىراق پارلامەنت - زاڭ شىعارۋشى عانا ورگان. دەپۋتتارعا نەگە سونشا وكپەلىسىڭ - قاداعالايتىن باسقالار عوي؟

- زاڭدى جازىپ قويۋ - از، ادام ءوزى باستاعان ءىسىنىڭ ناتيجەسىن قاداعالاماي ما؟.. ەگەر ورىنداتا المايتىنىن ءبىلىپ تۇرسا، نە كەرەك ايقايلاتىپ-شۋلاتىپ: «ءتىل تۋرالى زاڭ» - دەپ، ونى ەلگە جاڭالىق قىپ ايتۋدىڭ؟! تۇسىنبەيمىن... «ايداعانىم بەس ەشكى - ىسقىرىعىم جەر جارادى» - دەگەننىڭ كەيپى، الدەقانداي قىپ ارا-تۇرا وزگەرىس ەنگىزىپ قويادى، قۇلاعىمىزدى ءتۇرىپ ءبىز وتىرامىز ۇمىتتەنىپ... بالكىم، ءتۇرتىپ قويۋ كەرەك شىعار بىزدەگى ساپاسى ەمەس، سانى جاعىنان جاقسى كورسەتكىشكە يە زاڭداردىڭ بۇرىشىنا: «بۇل ءتىل بىلمەيتىن باستىقتارعا... نە مەملەكەتتىك ءتىلدى جەتىك مەڭگەرگەن قاراپايىم جۇمىسشىلارعا ارنالعان زاڭ» - دەپ. سوندا وكپە-رەنىش بولماس ەدى. ءبىلىپ جۇرەر ەدىك كىمنىڭ قاي زاڭعا باعىنۋ كەرەكتىگىن. ال نەگىزى شىنداپ تىرىسار بولسا، ءبىراز وزگەرىس ەنگىزەر ەدى ديپلوماتىن قۇشاقتاعان دەپۋتاتتار.

- ماسەلەن؟.. نەندەي وزگەرىس؟..

- اناۋ «يرونيا ليۋبۆي» ءفيلمى جارىققا شىققاندا، بەكبولات تىلەۋحان مىرزا جاقسىلاپ تۇرىپ «پيار» جاسادى عوي ۇلكەن داۋ كوتەرىپ. مەنىڭ ءوزىم: «تىلەۋحاننىڭ تيتىعىنا جەتكەن بۇل ءوزى قانداي فيلم؟» - دەپ، ىزدەپ ءجۇرىپ، تاۋىپ كوردىم. «اتتىڭ كوتىنە تەرىس وتىرعىزىپ...» - دەپ ءبىراز اشۋعا ءمىندى ەمەس پە؟! «قازاقتىڭ قىزى ورىس جىگىتىمەن ءسۇيىستى...» - دەپ تە بۇلقان-تالقان بولدى. بىراق ءتىلىڭدى مەنسىنبەي تۇرعان ورىسىڭ سەنىڭ ءداستۇرىڭ مەن نانىم-سەنىمىڭدى قايتسىن؟.. ولار ءۇشىن جىلقى مالى كوپ جانۋاردىڭ ءبىرى عانا. ءبىز دە وتىرعان جوقپىز با، مويىندارىنا مونشاق تاعىپ، قاسيەتتى سانايتىن ءۇندىنىڭ سيىرلارىن سويىپ جەپ؟.. اسەل ساعاتوۆانىڭ ديما ما، سەرەجا ما - بىرەۋمەن سۇيىسكەنىن سونشا داۋرىعا ايتۋدىڭ قاجەتى بار ما ەدى؟ بالا كەزدەن سانامىزعا سىڭىرەتىنى سول: «وي، ءبىز كوپ ۇلتتى مەملەكەتپىز! دوسپىز ءبارىمىز...» - دەپ. اناۋ كوشەلەردەگى جارناما تاقتايشالارىنداعى سۋرەتتەر جاقسىلاپ ناسيحاتتاپ جاتقان جوق پا، ارالاس نەكەنى، كوك جاشىكتەگىنى ايتپاي-اق قويايىن: قازاق پەن ورىس، كارىس پەن قازاق... ودان كەيىن نەسىنە تاڭ قالامىز، نەسىنە جاعامىزدى ۇستاپ، بەت شىمشيمىز قاراكوزدەر ءسۇيىستى دەپ، وزگە ۇلتتىڭ وكىلىمەن؟.. ءوزىمىزدىڭ ءتىلىمىزدى دە «مەملەكەتتىك ءتىل» دەپ ناقتىلاي المادى، وسى كۇنگە دەيىن ءدۇبارا بوپ جۇرگەنىمىز دە سول ەمەس پە؟.. ءداستۇردى قالاي ساقتاپ قالماق، ءتىلى قۇرىپ بارا جاتقاندا، تۇسىنبەيمىن... بەكبولات مىرزا شوۋ-بيزنەسكە ەمەس، جۇرتشىلىقتىڭ نازارىن انا ءتىلىمىزدىڭ ماسەلەسىنە اۋدارسا عوي!

- العا تارتىپ وتىرعانىڭ سەنىڭ عانا جەكە باسىڭا قاتىستى وكپە ەمەس، ءتىلدى كەمسىتۋشىلىك بارلىق جەردە ورىن الىپ جاتقان جوق پا؟

- ۇلتارالىق شيەلەنىس تۋعىزايىن دەپ وتىرعام جوق. دوستارىم دا كوپ ارالاساتىن وزگە ۇلتتىڭ وكىلىنەن، جاقىن سىرلاستارىم دا بار. ارىپتەستەرىممەن دە قازىردىڭ وزىندە قارىم-قاتىناسىم جاقسى - ءسوز باسىندا ايتتىم ەمەس پە: «...ۇرىسپاي-كەرىسپەي كەتتىم جۇمىستان»، - دەپ. مەنى جاقسى بىلەتىن تانىس-دوس تا ايتار: «ءوزى سالت-ءداستۇردى ساقتاپ جۇرگەنى شامالى...» - دەپ. ءيا، كيىم-كيىسىم كوپتىڭ كوڭىلىنەن شىقپاس: كەيدە يىعىم اشىق، كويلەگىم قىسقالاۋ، تارلاۋ بولادى... بىراق ەتەك-جەڭىن قىمتاپ جاۋىپ، جاراتۋشى الدىنداعى مىندەتىن قوعامدا «موداعا» اينالدىرىپ جىبەرگەندەردىڭ تىلگە جاناشىر بوپ جۇرگەندەرى شامالى عوي. دىنگە قاتىستى دا ءالى تالاي پروبلەمالاردىڭ تۋىنداۋى عاجاپ ەمەس. راسىندا، «حيدجابتى» ساندىك كيىمگە اينالدىرىپ جىبەرگەندەر كوپ بۇگىندە. مەيلى، ءدىني كوزقاراستار، ءاربىر ۇلتتىڭ وزىندىك ءداستۇر ەرەكشەلىگى بىلاي تۇرسىن، قازاق جەرىندە جۇرگەن ءاربىر ازامات قازاق ءتىلىن قۇرمەتتەۋگە مىندەتتى! ول كيىم-كيىس، دۇنيەتانىمى مەن ومىرگە دەگەن كوزقاراسىنا ەش بايلانىستى ەمەس. قازاق ءتىلدى جۇرگىزۋشىلەر كوپ رەتتە «تۇنگە» ىعىستىرىلعانى ءوز الدىنا، تاۋەلسىزدىك العانىمىزعا 20 جىل تولدى دەپ الاقايلاپ، الىپ-ۇشىپ، تويلاتىپ جۇرگەندە، ءتىل بىلەتىندەردى كۇندىزگى ەفيرگە جولاتپاۋعا تىرىساتىن كەيبىر باستىقسىماقتار از ەمەس. قازاق تىلىندە سويلەپ قالۋىمىز، نە ەستىپ قالۋىمىز ءۇشىن نە اتەشتەردەن بۇرىن ەرتە تۇرۋىمىز كەرەك، نە مۇلدەم ۇيىقتاماۋىمىز كەرەك. قاسىرەت قوي بۇل!

- ەندى نەگە ءبارىڭ جينالىپ، باستارىڭدى بىرىكتىرىپ، وسى جاعدايدى ايتپايسىڭدار ەل الدىندا؟

- كىم ايتادى؟! ءبىرىنىڭ - بالا-شاعاسى بار، ولاردى اسىراۋ كەرەك; ءبىرى - قىزمەت ورنىنان ايرىلىپ قالعىسى كەلمەيدى. نەندەي تالاپقا بولماسىن كونىپ وتىرعاندار كوپ، كوزدى جۇمىپ قويعان بارلىعىنا. ايتپەسە تىلگە قاتىستى كەمسىتۋشىلىك تولاستاعان ەمەس. ەگەر ماڭعىستاۋدىڭ حالقىنداي ءور مىنەزى بولسا عوي اتىلىپ شىعاتىن، ءوز پوزيتسياسىن مىقتى ۇستاناتىن بولسا عوي - وتىرماس ەك جالتاقتاپ، ءوز جەرىمىزدە جەتىم بالانىڭ كۇيىن كەشىپ! وكىنىشكە قاراي، الماتىلىقتار نامىستان گورى تابىستى كوبىرەك ويلايدى.

- مارجان، بەلگىلى تەلەباعدارلامادا جىگىتتەردىڭ نامىسسىزدىعىنا نالىپ، سىپىرىپ تاستاعان شاشىڭ ءوسىپ قالعان ەكەن... وسى قىسقا شاش وزىڭە دە جاراساتىن سياقتى، ءارى وتكىرلىگى باسىم ەر مىنەزىڭە دە كەلەدى...

- «وسى ۋاقىتقا دەيىن وسپەيتىن نەعىلعان شاش بۇل؟» - دەپ، مەنى قازىر كورگەندەر تاڭ قالادى. وسىرگىم كەلمەيدى، وسىرمەيمىن! «قازاقتىڭ قىزىنا ءتان ەمەس...» - دەگەن جىگىتتەرگە كوڭىلدەرىنە قاتتى ءتيىپ جاتسا دا: «ۇناماسا - شاشى ۇزىن قىز تاۋىپ ال!» - دەپ ايتا سالام.

ءار ادامنىڭ وزىندىك مىنەزى بولادى: ول سىرتقى كەسكىن-كەلبەتى بولسىن، ىشكى تۇيتكىل ويلارى بولسىن، ادامنىڭ ءبارى ءبىر-بىرىنە ۇقساۋى مىندەتتى ەمەس - وزىنە ۇنامدى نارسەنى تاڭداۋعا قۇقىلى. نە دەگەنمەن، «تاۋەلسىز»، «قۇقىقتىق»، «زايىرلى مەملەكەتتە» ءومىر ءسۇرىپ جاتىرمىز عوي... ساياساتتاعى شيەلەنىستەرگە قاتىستى ويىمىزدى ەركىن اشىپ ايتا الماساق تا، ەڭ قۇرىعاندا كۇندەلىكتى ومىردە ءوزىمىزدىڭ «مەن»-ءىمىزدى جوعالتپاعانىمىز دۇرىس دەپ ەسەپتەيمىن.

- ال ەندى قايتپەكسىڭ: الماتىدا ساناۋلى عانا راديو بار، قايسىسىنان تۇراق تاپپاق ويىڭ بار؟

- مەن جۇمىسسىز قالماسپىن... ءيا، دەگەنمەن مەندە ۇلكەن سترەسس بولدى. تىنىش قانا بارىپ-كەلىپ جۇرگەن جۇمىسىمدى ءبىر كۇندە تاستاپ كەتە سالۋ وڭايعا تيمەدى. ونىڭ ۇستىنە تۋىس-باۋىرلارىم دا الىستا. ۇيگە كەلگەندە، توتىقۇسىم كەشا عانا مەنى تۇسىنگەندەي بولىپ، باسىن يزەپ قويادى. تەك ىشتەي ءوزىمدى جۇباتىپ قويامىن: مارجان جۇمىستان كەتتى دەپ ەشكىمنىڭ باسى اۋىرىپ، بالتىرى سىزداماس، ول - تۇسىنىكتى. ءبىز وتىرعان التى قاباتتىق عيمارات تا قۇلاپ قالماس. مەن كەتتىم مىنەز كورسەتىپ، ەندى كەلەسىدە قازاق ەفيرىن قىسقارتار ۋاقىتتا - ولار ويلاناتىن بولادى. اكەمنىڭ ءبىر ءسوزى بار وسىندايدا ايتاتىن: «ءوز-وزىمە ادال بوپ قالايىنشى» - دەدىم مەن دە. ريزامىن وزىمە، مىنەزىمە، كەي كەزدە وتە ورىندى ۇستاپ قالاتىن قىرسىقتىعىما! «ءتىلىڭدى كەسىپ المايدى عوي، ايت!» - دەيتىن مارقۇم انام. جۇمىستان كەتىپ بارا جاتقانىمدا: «نە ءۇشىن؟..» - دەدى بىزدەگىلەر. مەنىڭ جاۋابىم: «يا بۋدۋ رابوتات تام، گدە موي يازىك نە بۋدەت مەشات!»

- راحمەت، مارجان! ءوزىنىڭ انا تىلىنە اراشا تۇسە الماعان دەپۋتاتتارعا قاراعاندا، سەنىكى ۇلكەن ەرلىك بولدى.

سۇحباتتاسقان - سىرىم داتوۆ

«وبششەستۆەننايا پوزيتسيا»

(پروەكت «DAT» № 27 (110) 24 تامىز 2011 جىل