وسى تاقىرىپتاعى دەپۋتاتتىق ساۋالىمدى بۇگىن بولعان پارلامەنت ءماجىلىسىنىڭ جالپى وتىرىسىندا پرەمەر-مينيستر اسقار ءماميننىڭ اتىنا جولدادىم. ونى ارىپتەستەرىم بەيبىت مامراەۆ پەن ءبايدىلدا جىلقىشيەۆ قولداپ، قولدارىن قويدى.

ەل پرەزيدەنتى قاسىم-جومارت توقاەۆ سايلاۋالدى باعدارلاماسىندا قايتالاناتىن، ارتىق قىزمەت تۇرلەرىن الىپ تاستاپ، مەملەكەتتىك باسقارۋ جۇيەسىن وڭتايلاندىرۋ قاجەتتىگىن اتاپ ايتتى. سونداي-اق العاشقى جولداۋىندا كەلەسى جىلدان باستاپ مەملەكەتتىك قىزمەتشىلەردىڭ سانىن بىرتىندەپ قىسقارتۋعا كىرىسىپ، ۇنەمدەلگەن قاراجاتتى نەعۇرلىم پايدالى قىزمەتكەرلەردى ىنتالاندىرۋعا جۇمساۋ جانە 2024 جىلعا قاراي مەملەكەتتىك قىزمەتشىلەردىڭ سانىن 25 پايىزعا قىسقارتۋ جونىندە ناقتى مىندەت قويعانى ءمالىم.

وسىعان وراي، مەملەكەت باسشىسىنىڭ تاپسىرماسىن ۇتىمدى دا ءتيىمدى ورىنداۋ ماقساتىندا مىناداي ماسەلەلەرگە نازار اۋداردىق:

بىرىنشىدەن، «ىشكى ساياسي تۇراقتىلىقتى قامتاماسىز ەتۋ جانە قازاقستاندىق ءپاتريوتيزمدى ناسيحاتتاۋ» بيۋدجەتتىك باعدارلاماسىنىڭ اكىمشىسى بولىپ مادەنيەت جانە سپورت مينيسترلىگى بەكىتىلگەن. وسى باعدارلاما اياسىندا جىل سايىن رەسپۋبليكالىق پاتريوتتار فورۋمى، قازاقستان ساياساتتانۋشىلارىنىڭ كونگرەسى ۇيىمداستىرىلىپ، مەملەكەتتىك رامىزدەردى ناسيحاتتاۋ جۇمىسى جۇرگىزىلەدى. ال ىشكى ساياسي تۇراقتىلىقتى قامتاماسىز ەتۋ جانە قازاقستاندىق ءپاتريوتيزمدى ناسيحاتتاۋ اقپارات جانە قوعامدىق دامۋ مينيسترلىگىنىڭ باستى مىندەتى بولىپ تابىلادى. مادەنيەت جانە سپورت مينيسترلىگىنە وعان ءتان ەمەس ويىن بيزنەسى، لوتورەيا وتكىزۋ جونىندەگى فۋنكتسيالار دا بەرىلگەن.

ەكىنشىدەن، ورتالىق جانە جەرگىلىكتى اتقارۋشى ورگاندار ءبىرتۇتاس اتقارۋشى بيلىك بولىپ تابىلاتىندىعىنا قاراماستان، مينيسترلىكتەردىڭ كوپشىلىگى وزدەرىنىڭ اۋماقتىق قۇرىلىمدارىن قۇرىپ، ولارعا باقىلاۋ-قاداعالاۋ فۋنكتسياسىن بەرگەن. مىسال ءۇشىن، وبلىستىق اكىمدىكتەردىڭ اۋىل شارۋاشىلىعى، ۆەتەريناريا باسقارمالارى مەن جەر ينسپەكتسيالارى بار بولعاندىقتان، اۋىل شارۋاشىلىعى مينيسترلىگىنىڭ اۋماقتىق ينسپەكتسيالارىنىڭ قانشالىقتى قاجەتى بار؟

وبلىستىق اكىمدىكتەردىڭ تابيعي رەسۋرستار جانە تابيعاتتى پايدالانۋدى رەتتەۋ باسقارمالارى مەن اۋىل شارۋاشىلىعى مينيسترلىگىنىڭ ورمان شارۋاشىلىعى جانە جانۋارلار دۇنيەسى اۋماقتىق ينسپەكتسيالارى دا ءبىرىن-ءبىرى قايتالايتىن قىزمەتتەردى اتقارادى.

وبلىستىق اكىمدىكتەردىڭ ءبىلىم باسقارمالارى باردا مينيسترلەرى اۋىسقان سايىن جاڭا رەفورما جاسالاتىن ءبىلىم جانە عىلىم مينيسترلىگىنىڭ ءبىلىم سالاسىنداعى باقىلاۋ دەپارتامەنتتەرىنىڭ قانداي قاجەتتىلىگى بار؟

وبلىستىق اكىمدىكتەردىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارمالارى مەن مەملەكەتتىك ەڭبەك ينسپەكتسياسى باسقارمالارى ازداي، ەڭبەك جانە حالىقتى الەۋمەتتىك قورعاۋ مينيسترلىگىنىڭ وبلىستىق دەپارتامەنتتەرىن قۇرۋ قانداي قاجەتتىلىكتەن تۋىنداعان؟

سول سياقتى وبلىستىق تەكسەرۋ كوميسسيالارى مەن قارجى مينيسترلىگىنىڭ وبلىستىق iشكi مەملەكەتتiك اۋديت دەپارتامەنتتەرiن بىرىكتىرۋ قاجەتتىگى جونىندە دە كوپتەن بەرى ايتىلىپ كەلەدى.

ۇشىنشىدەن، مەملەكەتتىك اپپاراتتى وڭتايلاندىرۋ كەزىندە ءبىرىنشى كەزەكتە بوس لاۋازىمداردى قىسقارتۋ ۇسىنىلىپ وتىر. قازىر مۇنداي بوس ورىندار سانى 8 مىڭعا جۋىق بىرلىكتى قۇرايدى. وسىعان وراي كەيبىر وڭىرلەردە مەملەكەتتىك قىزمەتتىڭ بوس ورىندارىنا كونكۋرس جاريالاۋعا موراتوري جاريالانعان. بىزدىڭشە، بۇل ماسەلەدە اسىعىستىق جاساۋعا بولمايدى. ويتكەنى، قازىرگى كەزدە حالىقپەن تىكەلەي جۇمىس ىستەيتىن اۋداندىق اكىمدىكتەر مەن اۋىلدىق وكرۋگتەردە 600-گە جۋىق باس جانە جەتەكشى ماماندار جەتىسپەيدى.

تورتىنشىدەن، مەملەكەتتىك قىزمەتشىلەر سانىن كەزەڭ-كەزەڭمەن قىسقارتۋ ماسەلەسىمەن قازىر ۇلتتىق ەكونوميكا مينيسترلىگى اينالىسۋ ۇستىندە. الايدا، ول مەملەكەتتىك قىزمەتتى جاڭعىرتۋمەن اينالىسپايدى. بۇل ماسەلەمەن مەملەكەتتىك قىزمەت ىستەرى اگەنتتىگى تىكەلەي اينالىسادى.

جوعارىدا باياندالعان جايتتاردىڭ نەگىزىندە پرەمەر-ءمينيستردىڭ قاراۋىنا مىناداي ۇسىنىستاردى ەنگىزدىك:

- «ىشكى ساياسي تۇراقتىلىقتى قامتاماسىز ەتۋ جانە قازاقستاندىق ءپاتريوتيزمدى ناسيحاتتاۋ» بيۋدجەتتىك باعدارلاماسىنىڭ اكىمشىسى ەتىپ اقپارات جانە قوعامدىق دامۋ مينيسترلىگىن بەلگىلەۋ كەرەك;

- ويىن بيزنەسى، لوتورەيا وتكىزۋ جونىندەگى فۋنكتسيالاردى ۇلتتىق ەكونوميكا مينيسترلىگىنە بەرگەن ءجون;

- مينيسترلىكتەردىڭ اۋماقتىق قۇرىلىمدارى مەن وبلىستىق باسقارمالاردىڭ قۇزىرەتتەرى مەن فۋنكتسيالارىنا تالداۋ جۇرگىزىپ، قايتالانۋشىلىق انىقتالعان جاعدايلاردا ورتالىق اتقارۋشى ورگانداردىڭ اۋماقتىق قۇرىلىمدارىن قىسقارتۋ كەرەك;

- مەملەكەتتىك قىزمەتتىڭ بوس ورىندارىن قىسقارتۋ بارىسىندا اۋداندىق اكىمدىكتەر مەن اۋىلدىق وكرۋگتەردىڭ شتاتتارىن قىسقارتۋدىڭ نەگىزدىلىگىن مۇقيات زەرتتەپ، ۇتىمدى شەشىم قابىلداۋ قاجەت;

- مەملەكەتتىك قىزمەتشىلەر سانىن قىسقارتۋ مىندەتىن مەملەكەتتىك قىزمەت سالاسىنداعى ۋاكىلەتتى ورگان بولىپ تابىلاتىن مەملەكەتتىك قىزمەت ىستەرى اگەنتتىگىنە جۇكتەۋ ماسەلەسىن قاراعان ءجون.

كارىباي مۇسىرمان،

ءماجىلىس دەپۋتاتى.

Abai.kz