جۇما, 24 قاڭتار 2020
1252 10 پىكىر 6 جەلتوقسان, 2019 ساعات 11:01

ۋكراينا ءسىم قازاقستان ەلشىسىن شاقىردى. ەكى تاراپ توقاەۆ ءسوزىن تالقىلادى

5 جەلتوقساندا ۋكراينا سىرتقى ىستەر مينيسترلىگى قازاقستاننىڭ ۋكرايناداعى ەلشىسى سامات ورداباەۆتى شاقىرىپ، كەزدەسۋ وتكىزدى. بۇل تۋرالى مينيسترلىكتىڭ رەسمي سايتى حابارلادى.

كەزدەسۋ كەزىندە ۋكراينا سىرتقى ىستەر مينيسترلىگى قاسىم-جومارت توقاەۆتىڭ گەرمانيالىق Deutsche Welle تەلەارناسىنداعى سۇحباتىندا قىرىم اننەكسياسىنا قاتىستى ايتقان سوزىنە الاڭداۋشىلىق بىلدىرگەن. ۋكراينا سىرتقى ىستەر مينيسترلىگىنىڭ مالىمدەۋىنشە، ەكى تاراپ 1994 جىلى 20 قاڭتاردا قول قويىلعان ۋكراينا مەن قازاقستان اراسىنداعى دوستىق كەلىسىمىندەگى پرينتسيپتەردى قاتاڭ ۇستاۋعا كەلىسكەن.

توقاەۆ Deutsche Welle نەمىس تەلەراديوكومپانياسىنا بەرگەن سۇحباتتا «قىرىمدا بولعان جاعدايدى اننەكسيا دەپ اتامايمىز. اننەكسيا – تىم اۋىر ءسوز» دەگەن. 3 جەلتوقساندا جاريالانعان سۇحباتتان سوڭ ۋكراينا سىرتقى ىستەر مينيسترلىگى پرەزيدەنتتىڭ بۇل ءسوزىن سىناپ، قازاقستانعا دەمارش جولدايتىنىن مالىمدەگەن.

توقاەۆتىڭ بۇل ءسوزىن قازاقستاندىق جانە ۋكراينالىق جەلى قولدانۋشىلارى دا سىنادى.

رەسەي 2014 جىلى كوكتەمدە ۋكراينا قۇرامىنداعى قىرىم تۇبەگىن اننەكسيالاپ، رەسەي فەدەراتسياسىنىڭ قۇرامىنداعى سۋبەكت دەپ جاريالاعان ەدى. سول جىلى ساۋىردە ۋكراينانىڭ دونەتسك جانە لۋگانسك وبلىستارىندا رەسەيشىل سەپاراتيستەر مەن ۋكراينا اسكەرى اراسىندا قارۋلى قاقتىعىس باستالعان. سودان بەرى ول سوعىستا 13 مىڭنان استام ادام قازا تاپقان.

باتىس ەلدەرى رەسەيدىڭ ۋكرايناعا قاتىستى ءىس-ارەكەتىن ايىپتاعان.

Abai.kz

10 پىكىر