بۇگىن الماتىداعى قازاقستان جازۋشىلارى كىتاپحاناسىندا «تاريحي-ادەبي ولكەتانۋدى دامىتۋ» جوباسىنا قاتىسقان قالامگەرلەر وقىرماندارمەن كەزدەستى. 

اقىن-جازۋشىلارمەن ادەبي-تانىمدىق جۇزدەسۋگە جوبا قاتىسۋشىلارى قازاقستان جازۋشىلار وداعىنىڭ مۇشەسى، جازۋشى، جۋرناليست، اۋدارماشى كادىربەك سەگىزباەۆ، اقىن، اۋدارماشى قۋانىشباي قۇرمانعاليەۆ جانە ءى «رۋح» حالىقارالىق ونلاين-ادەبي كونكۋرسىنىڭ «ۇزدىك ادەبي سىن» نوميناتسياسىنىڭ جەڭىمپازى، قر پرەزيدەنتى ستيپەندياسىنىڭ يەگەرى، جاس اقىن بەكزات سماديار قوناق بولىپ كەلدى.

قالامگەرلەر وقىرماندارعا جازىپ جاتقان شىعارمالارى جايلى كەڭىنەن اڭگىمەلەپ، «تاريحي-ادەبي ولكەتانۋدى دامىتۋ» جوباسىنىڭ ماڭىزدىلىعى تۋرالى ءتۇسىندىردى. سونىمەن قاتار جازۋشى كادىربەك سەگىزباەۆ الماتى شاھارىنىڭ قۇرىلۋ تاريحى، ءار جىلدارى باسقارعان باسشىلاردىڭ ەڭبەكتەرى جانە تابيعاتتى ساقتاۋ، ەكولوگيا ماسەلەسىن ءسوز ەتتى. اقىن قۋانىشباي قۇرمانعاليەۆ حح عاسىردىڭ ەكىنشى جارتىسىنداعى جاستار ءومىرى مەن قالا كەلبەتى تۋرالى ايتسا، ال مودەراتور، جاس اقىن بەكزات سماديار اتالعان ايتۋلى جوبانىڭ ءمان-ماڭىزىن اشۋعا تىرىستى.

كەش قوناقتارى وقىرمانداردىڭ ساۋال-پىكىرلەرىنە جاۋاپ بەرىپ، كىتاپحانا قورىنا ارنايىلاپ جەڭە قولتاڭباسىمەن كىتاپتارىن تابىستادى.

Abai.kz