الماتىدا قازاقستان قارۋلى كۇشتەرىنە قاراستى اسكەري بولىمدە اتى اڭىزعا اينالعان «قارا مايور»، پولكوۆنيك بوريس كەرىمباەۆقا ارنالعان ەسكەرتكىش تاقتاسىنىڭ سالتاناتتى اشىلۋى ءوتتى.

سالتاناتتى شارادا اسكەري بولىمگە بوريس كەرىمباەۆتىڭ ەسىمىنىڭ بەرىلۋى اسكەري قىزمەتشىلەرگە جۇكتەلگەن ەرەكشە مىندەتتەر كەزىندە جاۋاپكەرشىلىكتى سەزىنۋگە ىنتالاندىرۋ، سونداي-اق اسكەري قىزمەتشىلەردىڭ ءار ءتۇرلى بۋىنىن بورىشقا، اسكەري ار-نامىس زاڭدارىنا، جاۋىنگەرلىك باۋىرلاستىق پەن حالىققا قىزمەت ەتۋدىڭ بەرىك ايعاعى ەكەنى جونىندە ايتىلدى. شاراعا ءبولىمنىڭ جەكە قۇرامى مەن باسشىلىعى، قارۋلى كۇشتەردىڭ ارداگەرلەرى مەن پولكوۆنيك كەرىمباەۆتىڭ دا جۇبايى قاتىستى.

«بۇگىن مەنىڭ قۋانىشىمدا شەك جوق. ارينە جوقتىڭ ورنى تولماس. وسى ساپتا تۇرعان ءبارىڭىز ءۇشىن ناعىز ۇستاز بولا ءبىلدى. مەن بارلىقتارىڭىزعا مىقتى دەنساۋلىق، وتباسىلارىڭىزعا اماندىق تىلەيمىن. جەتكەن جەتىستىكتەرىڭىزبەن قۇتتىقتايمىن»، - دەدى رايسا كەرىمباەۆا.

ەستەرىڭىزگە سالا كەتەيىك، اسكەري بارلاۋ قىزمەتىنە قوسقان ۇلەسى مەن ورنى ەرەكشە ەكەنىن ەسكەرە وتىرىپ، 2019 جىلعى 4 قىركۇيەكتەگى قورعانىس ءمينيسترىنىڭ بۇيرىعىمەن ارنايى ماقساتتاعى اسكەري بولىمگە بوريس كەرىمباەۆتىڭ اتى بەرىلدى.

پولكوۆنيك ب. كەرىمباەۆ، ۆ.ي. لەنين اتىنداعى تاشكەنت جوعارى جالپىاسكەري كوماندالىق ۋچيليششەسىن تامامداعان. موتواتقىشتار ۆزۆودىنىڭ كومانديرى، ورتا ازيا اسكەري وكرۋگىنىڭ بارلاۋ روتاسىنىڭ، شتابىنىڭ جانە موتواتقىشتار باتالونىنىڭ باسقارۋشى قىزمەتتەرىن اتقارعان.

1981 جىلى كەرىمباەۆ اۋعان ەلىنە جىبەرىلگەن بولاتىن. ول باسقارعان جاساق پاندجەر شاتقالىنداعى احماد شاح ماسۋدتىڭ مودجاحەدتەر  قۇرامالارىنا قارسى تۇرعان. سەگىز ايعا سوزىلعان ۇدايى اتىستاردان، قونىستانۋ وپەراتسيالارى مەن رەيدتەردەن كەيىن مودجاحەدتەردىڭ باسشىسى ۋاقىتشا بىتىمگە كەلىسۋگە ءماجبۇر بولدى. ناتيجەسىندە كەڭەس اسكەرلەرىنە قارسى توپتاردىڭ جاۋىنگەرلىك ءىس-قيمىلدارى توقتاتىلدى.

ءوز جاساعى قويعان «قارا مايور» لاقاپ اتىمەن بارلىق اسكەري قىزمەتشىلەردىڭ ماڭگى ەسىندە قالدى. اۋعان ەلىنەن كەيىن كەرىمباەۆ 22-ءشى ارنايى ماقساتتاعى بريگادا كومانديرىنىڭ ورىنباسارى، 546-ءشى ارنايى ماقساتتاعى وقۋ پولكىنىڭ كومانديرى بولىپ قىزمەت ەتتى. 1992 جىلى دەنساۋلىق جاعدايىنا بايلانىستى پولكوۆنيك اسكەري اتاعىمەن قارۋلى كۇشتەر قاتارىنان شىعارىلدى.

2019 جىلى 12 اقپاندا ۇزاق اۋرۋدان كەيىن بوريس كەرىمباەۆ الماتى قالاسىندا ومىردەن ءوتتى.

Abai.kz