بۇل جونىندە سەيسەنبى كۇنى وكىلدەر پالاتاسىنىڭ سپيكەرى نەنسي پەلوسي مالىمدەدى.

ونىڭ سوزىنشە، قۇجات وسى اپتادا وكىلدەر پالاتاسىنىڭ زاڭ شىعارۋ كوميتەتىندە داۋىس بەرۋگە شىعارىلادى. ەگەر يمپيچمەنت جاريالاۋ تۋرالى باپتار ماقۇلدانسا، جالپى وتىرىسقا شىعارىلادى. بۇل جاڭا جىلعا دەيىن ءوتۋى مۇمكىن.

دەموكراتتار ترامپ ءوزىنىڭ مۇددەسى ءۇشىن، الداعى سايلاۋدا باستى قارسىلاسى بولۋى مۇمكىن دجو بايدەنگە قارسىلىق كورسەتىپ، ۋكرايناعا قىسىم جاساۋ ارقىلى بيلىكتى اسىرا پايدالاندى دەپ ەسەپتەيدى.

وعان دالەل رەتىندە بيىل جاز ايىندا ۋكرايناعا جىبەرىلۋى ءتيىس اسكەري كومەكتى توقتاتىپ تاستاعانىن ايتادى.

ەكىنشى ايىپ - ترامپ اكىمشىلىگىنىڭ كونگرەسسكە كۋالىك بەرۋدەن باس تارتۋى. دەموكراتتار ترامپ ولارعا تىيىم سالىپ وتىر دەپ سانايدى.

پرەزيدەنتتىڭ ءوزى جانە ونى قولدايتىن رەسپۋبليكاشىلدار ەشقانداي زاڭ بۇزىلمادى دەگەن سەنىمدە.

وكىلدەر پالاتاسى ترامپقا يمپيچمەنت جاريالاعان كۇننىڭ وزىندە سوڭعى شەشىمدى سەنات قابىلدايدى. ال سەناتتا رەسپۋبليكاشىلدار وكىلدەرى باسىم. سوندىقتان ساراپشىلار پرەزيدەنتكە يمپيچمەنت جاريالانۋى ەكىتالاي دەيدى.

اقش تاريحىندا بىردە-ءبىر پرەزيدەنت يمپيچمەنت جاريالاۋ ارقىلى قىزمەتىنەن كەتپەگەن. تەك 1974 جىلى ريچارد نيكسوننىڭ ءوزى ونى قىزمەتىنەن كەتىرۋ تۋرالى ماسەلەلە كوتەرىلگەننەن كەيىن وستاۆكاعا كەتكەن.

Abai.kz