«Nur Otan» پارتياسى، دۇنيەجۇزى قازاقتارىنىڭ قاۋىمداستىعى جانە وتانداستار قورى ءوزارا تۇسىنىستىك مەموراندۋمىنا قول قويدى. ۇشجاقتى مەموراندۋمعا قول قويۋداعى باستى ماقسات – دۇنيەجۇزىندەگى قازاقتاردى تاريحي وتانى توڭىرەگىنە ۇيىستىرۋعا قولداۋ كورسەتۋ، اتاجۇرتتان تىس جەردە، باسقا ەلدە تۋىپ ءوسىپ، ەلگە ورالعان قانداستارىمىزعا كومەك قولىن سوزۋ. 

ەلباسى، «Nur Otan» پارتياسىنىڭ توراعاسى نۇرسۇلتان نازارباەۆ دۇنيەجۇزى قازاقتارىنىڭ كەزەكتى قۇرىلتايلارىنىڭ بىرىندە: «شەتەلدەگى قازاقتاردىڭ ەلگە ءجيى كەلىپ، تۋعان جەرىمەن بايلانىستارىن نىعايتىپ وتىرعانى دۇرىس. قاي ەلدە تۇرساڭىزدار دا، ءاردايىم قازاقستاندى جۇرەكتەرىڭىزدىڭ تورىندە ۇستاڭىزدار. قازاقتىڭ تاريحي وتانى بىرەۋ-اق. ول – قازاقستان»، - دەگەن ەدى. 

وسى ورايدا، «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك شەت ەلدەردەگى جانە قازاقستانعا كەلگەن ەتنيكالىق قازاقتاردى قولداۋعا باعىتتالعان ەلىمىزدىڭ ستراتەگيالىق جوسپارلارىن جۇزەگە اسىرۋ جۇمىستارىنا اتسالىسۋعا پارتيانىڭ ارقاشان ءازىر ەكەنىن جەتكىزدى. سونداي-اق، ول ەلىمىز تاۋەلسىزدىك العالى بەرى ەلباسىنىڭ باستاماسىمەن تاريحي وتانىنا ءبىر ميلليوننان استام قازاق قايتىپ ورالعانىن، سونىڭ ارقاسىندا ۇلتىمىزدىڭ دەموگرافيالىق جاعدايى قانداستارىمىزدىڭ ۇلەسى ەسەبىنەن جاقسارعانى تۋرالى ايتتى. 

«پارتيامىزدىڭ دوكتريناسىندا جازىلعانداي، ءبىزدىڭ نەگىزگى قۇندىلىعىمىز – ادام، ونىڭ قادىر-قاسيەتى مەن قۇقىقتارى، اماندىق-ساۋلىعى مەن زاڭدىق مۇددەلەرى. سوندىقتان، «Nur Otan» ەلگە كوشىپ كەلگەن وتانداستارىمىزدى ۇنەمى قولداپ وتىرادى. قازاقستان پرەزيدەنتى قاسىم-جومارت توقاەۆ ءوز سوزىندە: «ورالماندار» دەپ اتالىپ جۇرگەن تۇرعىندارىمىزبەن جۇمىس ىستەيمىز، ولاردى ءبىزدىڭ قوعامىمىزعا بەيىمدەلىپ، جاقىن تارتۋ ءۇشىن قانداستار دەپ اتاۋدى ۇسىنامىن»، – دەدى. سوندىقتان، وسى مەموراندۋمنىڭ اياسىندا «وتانداستار» قورى جانە دۇنيەجۇزى  قازاقتارىنىڭ قاۋىمداستىعىمەن بىرلەسىپ، تۋعان جەرگە كوشىپ كەلگەن وتانداستارىمىزعا تىركەلۋ، قازاقستان ازاماتتىعىن الۋ جانە باسقا ماسەلەلەر بويىنشا قۇقىقتىق كەڭەس پەن اقپاراتتىق كومەك بەرىپ وتىرامىز. ەلىمىزگە كوشىپ كەلگەن ءار ازامات بەيىمدەۋدەن ءوتىپ، تەز ارادا ەڭسەسىن تىكتەپ، ەتەك-جەڭىن جيىپ، وتباسىمەن، بالا-شاعاسىمەن ەل قاتارلى تۇرۋى كەرەك. ولاردىڭ بارلىعى مەملەكەتىمىزدىڭ، پارتيانىڭ، تۇتاس حالقىمىزدىڭ قولداۋىن سەزىنۋى ءتيىس»،- دەدى باۋىرجان بايبەك. 

ال وتانداستار قورىنىڭ پرەزيدەنتى نۇرتاي ابىقاەۆ قور قۇرىلعان كۇننەن باستاپ وسى كۇنگە دەيىن اتقارىلعان جۇمىستارعا جان-جاقتى توقتالىپ، بىرلەسكەن مەموراندۋمنىڭ ماڭىزدىلىعىن اتاپ كورسەتتى.  

«بۇگىنگى قول قويىلاتىن مەموراندۋم «Nur Otan» پارتياسىمەن بىرىگىپ، وسى باعىتتاعى جۇمىستاردى جانداندىرۋعا مۇمكىندىك بەرەدى دەگەن ويدامىز. پارتيانىڭ ەلىمىزدىڭ بارلىق اۋداندارىندا فيليالدارى بارىن ەسكەرسەك، قانداستاردى قولداۋعا باعىتتالعان جۇمىسىمىزدىڭ ءونىمدى بولاتىنى ءسوزسىز»، - دەدى قور پرەزيدەنتى. 

ءوز كەزەگىندە دۇنيەجۇزى قازاقتارىنىڭ قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ الداعى ۋاقىتتا ۇشجاقتى مەموراندۋمنىڭ نەگىزىندە جاستارمەن، مەديا جانە باسقا دا سالالاردا بىرلەسكەن جۇمىستار اتقارىلاتىنىن تىلگە تيەك ەتتى.  

ايتا كەتەيىك، 1989 جىلعى مالىمەت بويىنشا، ەلىمىزدەگى قازاقتاردىڭ سانى 6,5 ميلليون ادام بولسا، ياعني جالپى قازاقستانداعى حالىق سانىنىڭ 39%-ىن قۇراسا، قازىر بۇل كورسەتكىش 70%-عا جەتتى. تاۋەلسىزدىكتىڭ العاشقى جىلدارىندا مەكتەپتەردىڭ بار-جوعى 30%-ى قازاق تىلىندە ءبىلىم بەرگەن ەدى. بۇگىندە ەلباسى ساياساتىنىڭ ارقاسىندا انا ءتىلىمىزدى ساقتاپ قانا قويماي، ونى قازاقستاندا عىلىم مەن ءبىلىم سالاسىنىڭ نەگىزگى تىلىنە اينالدىرۋ ءۇشىن بارلىق جاعداي جاسالدى. قازىرگى كەزدە مەكتەپتەردىڭ 70% قازاق تىلىندە ءبىلىم بەرەدى. مەملەكەتتىك تىلدە وقيتىن ستۋدەنتتەردىڭ ۇلەسى – 64,5% قۇرايدى. قازاق ءتىلىنىڭ قولدانۋ اياسى بۇرىنعىمەن سالىستىرعاندا ايتارلىقتاي كەڭەيدى.

Abai.kz