16-22 جەلتوقسان ارالىعىندا اۋا-رايىنىڭ قولايسىزدىعىنان 104 جول-كولىك وقيعاسى ورىن الىپتى. سالدارىنان 39 ادامنىڭ ءومىرى قيىلىپ، 158 ادام ءتۇرلى دەڭگەيدە جاراقات العان. بۇل تۋرالى ىشكى ىستەر ءمينيسترى ەرلان تۇرعىمباەۆ ۇكىمەت وتىرىسىندا مالىمدەدى.

ءمينيستردىڭ ايتۋىنشا، قار ارالاس جاڭبىر، تەمپەراتۋرانىڭ «ءنول گرادۋسقا» دەيىن كۇرت كوتەرىلۋى، تۇمان، كوك تايعاق تاعى باسقا اۋا رايىنىڭ قولايسىزدىعى جول اپاتىنىڭ كوبەيۋىنە سەبەپ بولعان.

-اۋا-رايىنىڭ قولايسىزدىعىنا بايلانىستى جولدارداعى جاعداي قيىن بولدى. تۇركىستان، الماتى، قاراعاندى، ماڭعىستاۋ، قوستاناي، سولتۇستىك قازاقستان جانە تاعى 11 وبلىستا جول جابىلدى. 16-22 جەلتوقسان ارالىعىندا رەسپۋبليكا بويىنشا 104 جول-كولىك وقيعاسى تىركەلدى. سونىڭ سالدارىنان 39 ادام قازا تاپتى، 158-ءى ءتۇرلى جاراقات الدى،- دەدى مينيستر.

تۇرعىمباەۆتىڭ ايتۋىنشا، جالپى ۇزىندىعى 75 مىڭ شاقىرىم بولاتىن رەسپۋبليكالىق ماڭىزى بار اۆتوموبيل جولدارىنىڭ 57 ۋچاسكەسى جابىلدى.
اپتا بويى ەڭ قيىن جاعداي شىعىس قازاقستان، اقتوبە، باتىس قازاقستان جانە جامبىل وبلىستارىندا بايقالعان.

سونىمەن قاتار، ول كەپتەلىستى جويۋ، جولداردى تازارتۋ، ەۆاكۋاتسيالاۋ جانە ازاماتتارعا شۇعىل كومەك كورسەتۋ جۇمىستارىنىڭ قالاي جۇرگىزىلىپ جاتقانىن   ايتتى.

-جالپى العاندا، كولىك كەپتەلىستەرىندە 1000-نان استام اۆتوموبيل بولدى، 120 ۆاگون قار قۇرساۋىنان ەۆاكۋاتسيالاندى، 905-تەن استام ادام ەۆاكۋاتسيالانىپ، ولار جاقىن ماڭداعى ەلدى مەكەندەردە ورنالاسقان جىلۋ ورتالىقتارىنا ورنالاستىرىلدى،- دەدى مينيستر.

بۇدان سوڭ، ۇكىمەت باسشىسى اسقار مامين وبلىس اكىمدەرىنە، يندۋستريا جانە ينفراقۇرىلىمدى دامىتۋ مينيسترلىگىنە، سونداي-اق «قازاۆتوجول» -عا قازاقستاندىقتاردىڭ جول قاۋىپسىزدىگىن قامتاماسىز ەتۋدى تاپسىردى.

Abai.kz