قىرعىزستاننىڭ تالاس قالاسىندا ونداعان كولىك جۇرگىزۋشى الاڭدا جينالىپ، قازاقستاننىڭ جول پوليتسياسى قىزمەتكەرلەرىنە نارازىلىق ءبىلدىردى.

جينالعانداردىڭ ايتۋىنشا، ولار قازاقستانعا جۇك تاسىمالداۋمەن اينالىسادى.

-مۇنداعى پروبلەما - قازاقستاننىڭ مەملەكەتتىك ورگاندارىنىڭ تاراپىنان جۇرگىزۋشىلەرگە قىسىم كورسەتىلىپ جاتىر. جۇرگىزۋشىلەردى جول بويىندا توقتاتادى. جول قوزعالىسى ەرەجەلەرىن بۇزاساق، حاتتامالار تولتىرىپ، زاڭ اياسىندا ايىپپۇل تولەيمىز. بىراق قازىر ولار بىزگە سوڭعى ەكى-ءۇش جىلداعى ايىپپۇلداردىڭ حاتتامالارىن بەرەدى، ءبىز ول جايلى بىلمەيمىز دە. سونىمەن قاتار، ءبىزدى توقتاتقان كەزدە بارلىق مالىمەتتى الىپ الادى دا كەيىن ءبىزدى سۋرەتكە تۇسىرەدى. بىراق ءبىز ەرەجە بۇزدى دەلىنگەن حاتتامالارداعى كۇندى قاراساق، ول كەزدە ءبىز قازاقستان اۋماعىنا كىرمەگەنبىز. 230 مىڭ سوم كورسەتىلگەن حاتتامالار بار، ەڭ از دەگەن ايىپپۇل - 12 مىڭ سوم. بۇگىندە ايىپپۇل تولەمەدى دەگەن سەبەپپەن 10 ادام دەپورتاتسيالاندى. ءبىز باسقا ەلدىڭ اۋماعىندا جول ەرەجەلەرىن بۇزباۋعا تىرىسامىز، - دەيدى جۇرگىزۋشىلەردىڭ ءبىرى.

باسىلىمنىڭ مالىمەتىنشە، جەرگىلىكتى بيلىكتەگىلەر جۇرگىزۋشىلەردەن بۇل شاعىمدى جازباشا تۇردە كورسەتۋىن سۇراعان.

Abai.kz