قازاقستان رەسپۋبليكاسىنىڭ پرەزيدەنتى

قاسىم-جومارت توقاەۆقا!  

اشىق حات

اسا قۇرمەتتى قاسىم-جومارت كەمەلۇلى!

ەلباسى – تۇڭعىش پرەزيدەنتىمىز نۇرسۇلتان ءابىشۇلى نازارباەۆ ەلىمىز تاۋەلسىزدىك العان كۇننەن باستاپ ءوزى بەرىك ۇستاپ كەلگەن مەملەكەت تىزگىنىن سىزگە  سەنىپ تاپسىردى. ەلباسىنىڭ سۇڭعىلا ساياساتىنىڭ ارقاسىندا «قازاقستان  حالىقتارى اسسامبلەياسى» قۇرىلىپ، قازاقستان حالقى، قازاق ەلى ايرانداي ۇيىپ وتىر. سوعان قاراماستان ۇلت بىرلىگىن ەل ىدىراتىپ، ەل اراسىنا ءورت  سالاتىن سوراقى ارەكەتتەر ەل ىشىندە ەتەك الىپ بارادى.

تاقاۋدا الەۋمەتتىك جەلىلەردە بەلگىلى اكتەر المات ساقاتوۆتىڭ نايمان رۋىن سايقىمازاق ەتكەن ءارتىس ارىپتەستەرىنە اشىنىپ ايتقان اشۋلى سوزدەرى حالىققا كەڭ تاراپ، نايمان عانا ەمەس باسقا رۋلارىنىڭ دا كوزى اشىق، كوكىرەگى وياۋ  ازاماتتارىنىڭ اشۋ-ىزاسىن تۋدىرعانىن الەۋمەتتىك جەلىلەردەن كورىپ وتىرمىز.

قازاقتىڭ ىرگەلى رۋلارىنىڭ ءبىرى – نايمان جۇرتىن قالجىڭعا سۇيەپ، كەلەمەجدەۋ، كەمسىتۋ سوڭعى ون- ونبەس جىلدان بەرى جۇيەلى تۇردە جۇرگىزىلىپ كەلەدى. مۇنىڭ ارتىندا وزدەرىنىڭ ىشكى ەسەبىن جۇزەگە اسىرۋدى كوزدەگەن بەلگىلى  ءبىر توپتاردىڭ ساياسي مۇددەسى تۇرۋى ابدەن مۇمكىن. رۋلاردىڭ نامىسىنا ءتيىپ مازاققا اينالدىرۋ – ۇلتىمىزدىڭ جۇلىنىنا تۇسكەن جەگى قۇرت، ەل ءىشىن ءىرىتىپ- شىرىتەتىن، تاۋەلسىزدىگىمىزدىڭ تامىرىنا بالتا شاباتىن اسا قاۋىپتى ىندەت. بۇل  ىندەتتەن ارىلۋ - ءوزىن قازاق سانايتىن ءار ازاماتقا مىندەت.

جانار ايجانوۆا باستاتاقان توپتىڭ باسقا ەمەس تەلەديداردان نايمان رۋى  تۋرالى اۋزىنا كەلگەندى ايتقان سوراقى سوزدەرىن بىرنەشە رەت ءوز قۇلاعىممەن دە ەستىدىم. رۋ نامىسىنا ءتيىپ، ارازدىق قوزدىرۋ – بارىپ تۇرعان ناداندىق! ولاردى جونگە سالۋدى جاۋاپتى ورىنداردان تالاپ ەتەمىن!

ادەتتە ۇلت ارازدىعىن قوزدىرعانداردى سوتتاپ جاتامىز. ال، رۋلار  اراسىندا وشپەندىلىك ءورشىتىپ، ەل بىرلىگىن تەلەارنا، الەۋمەتتىك جەلىلەر ارقىلى الا تايداي ءبۇلدىرىپ جۇرگەندەرگە بەي-جاي قاراپ وتىرمىز. مۇنى  قالاي تۇسىنۋگە بولادى؟ زاڭ ورىندارى قايدا قاراپ وتىر؟ تاۋەلسىزدىك الىپ، مەملەكەت بولىپ، وردا تىككەندەگى جەتكەن جەرىمىز وسى ما؟ مىنا تۇرىمىزبەن  جاس ۇرپاقتى قالاي تاربيەلەيمىز؟ ەرتەڭگى ەلگە، جەرگە يە بولادى دەپ ءۇمىت  كۇتىپ وتىرعان جاستاردىڭ ساناسىن ءوز قولىمىزبەن ءوزىمىز ۋلاپ وتىرمىز. «كورگەن كورگەنىن، كوسەۋ تۇرتكەنىن قىلادى» دەيدى قازاق. ۇيدەگى ۇلكەندەردەن  ەستىگەن رۋشىلدىق دەرتى بەسىكتەن بەلى ەندى شىققان مەكتەپ وقۋشىلارىن دا  شارپىپ، ستۋدەنت – جاستار اراسىنا دەيىن جايىلىپ كەتتى. بۇل سۇمدىققا جول بەرۋگە بولمايدى! ارۋاعىنان اينالايىن، قازاقتىڭ ءار اتاسى ارداقتى، ءار  رۋى قاسيەتتى، كيەلى. رۋلارعا ءتىل تيگىزىپ، كەلەمەجدەۋگە مۇلدە بولمايدى. كيەسى  ۇرادى. سەن اناۋسىڭ، سەن مىناۋسىڭ دەپ ءار رۋ، ءار ءجۇز ءبىرىن-ءبىرى كوزگە شۇقىپ، كوتكە تۇرتە بەرسە نە بولعانىمىز؟ ۇلتپىز، ۇلتتىق  يدەيالوگيا كەرەك دەپ  جار سالامىز. مىنا سىيقىمىزبەن ۇلتتىڭ رۋحىن، تاۋەلسىزدىكتىڭ تۋىن بيىكتە قالاي ۇستاپ تۇرا الامىز؟ قالاي ماڭگىلىك ەل بولا الامىز؟ المات ساقاتوۆ  ءىنىمىزدىڭ اشۋعا باسىپ، اشىنىپ ايتقان سوزدەرى ءار قازاققا وي سالۋى كەرەك. ول جەتىسكەنىنەن وت الىپ، قوپاعا ءتۇسىپ، جۇرتتىڭ جانىنا باتاتىن اۋىر سوزگە بارىپ وتىرعان جوق، جۇيكەسىنە ابدەن تيگەندىكتەن ايتىپ وتىر. سوندىقتان «ءار قازاق مەنىڭ جالعىزىم!» دەگەن سابىر اداي اقىننىڭ اتالى ءسوزى ءار قازاقتىڭ جۇرەگىنە جول سالسا دەپ ويلايمىن.

قازاق دەگەن ۇلى حالىقتى قۇراعان تامىرلاس، تاعدىرلاس، تۋىستاس رۋلاردىڭ  نامىسىن تاپتاپ، ارۋاعىن اتتاپ، ەسىرىپ جۇرگەن كەيبىرەۋلەر ەل بولاشاعىن  ويلاسا، قاي عاسىردا، قاي زاماندا وتىرعانىن ءبىلىپ، تەز ارادا ەستەرىن جيناۋلارى كەرەك. قانداي دا ءبىر رۋدىڭ شامىنا ءتيىپ، ەل اراسىنا شي جۇگىرتۋدىڭ اياعى جاقسىلىققا اپارمايدى. بەيپىل اۋىزدارعا بەرىك قۇلىپ  سالاتىن قاتاڭ زاڭ كەرەك! سۇتتەي ۇيىپ وتىرعان ەلىمىزگە ىرتكى سالىپ، بەرەكەسىن قاشىراتىن مۇنداي زياندى ارەكەتتەر قاشاندا قاتەرلى. وسى جاعدايعا باسا  نازار اۋدارىپ، شۇعىل شارا قابىلداۋىڭىزدى سۇرايمىن.

نەسىپبەك ايتۇلى،

مەملەكەتتىك سىيلىقتىڭ لاۋرەاتى.

Abai.kz