قر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ عىلىمي قىزمەتكەرى جاسۇلانبەك مايلىباي پرەزيدەنتتىك جاستار كادر رەزەرۆى تۋرالى پىكىر ءبىلدىردى.

«جاستار جىلىندا قولعا الىنعان ءىرى ءارى ماڭىزدى باستامالاردىڭ ءبىرى – پرەزيدەنتتىك جاستار كادر رەزەرۆىن جاساقتاۋ. بۇل، ەڭ اۋەلى، ادامي كاپيتالدىڭ ماڭىزدىلىعىن كورسەتكەن جوبا بولدى دەپ ەسەپتەيمىن. ادامنىڭ قىزمەتتەگى جەتىستىگى، ەڭبەك ونىمدىلىگى مەن تۇرمىس ساپاسى تىكەلەي ونىڭ ءبىلىمى مەن بىلىكتىلىگىنە تاۋەلدى ەكەنىن ەسكەرسەك، ءاربىر كاسىبي مامان ءوز كەزەگىندە مەملەكەت دامۋىنىڭ نەگىزگى قوزعاۋشى كۇشىنە اينالا الادى. كادر رەزەرۆىنىڭ ماقساتى دا ءدال وسىنداي ءبىلىمدى، بىلىكتى، ويلى، تالانتتى، تاجىريبەلى جاستاردى ىرىكتەۋ بولدى. بۇل بايقاۋعا قاتىسۋعا نيەت بىلدىرگەن جاستار بەس دەڭگەيدەن تۇراتىن، ۇمىتكەرلەردىڭ قابىلەت-دارىنىن جان-جاقتى ايقىنداۋعا نەگىزدەلگەن تەست، ەسسە، جوبا قورعاۋ، قۇزىرەتتىلىك بويىنشا سىناما، اڭگىمەلەسۋ سياقتى كەزەڭدەردەن ءوتىپ، 300 ادام ىرىكتەلىپ شىقتى»، - دەدى ساراپشى قازاقپارات تىلشىسىنە بەرگەن سۇحباتىندا.

ونىڭ ايتۋىنشا، جوبا قورىتىندىسى بەلگىلى ءبىر تۇجىرىم جاساۋعا مۇمكىندىك بەرەدى. مەملەكەت وسى ارقىلى مەريتوكراتيا قاعيداسىنا ارقا سۇيەيتىنىن جانە ونى بارىنشا كۇشەيتەتىنىن كورسەتتى.

«قازىر ەلىمىزدە جاستاردىڭ سانى 4 ميلليونعا جۋىقتادى. بۇل – قازاقستان حالقىنىڭ ەلەۋلى بولىگى. سوندىقتان ولاردىڭ تىڭ ويلارىن، جالىندى جىگەرىن تۇرعىندارى دا جاس، ءوزى دە جاس قازاقستاننىڭ دامۋىنا پايدالانۋ ماڭىزدى. وسى ارقىلى مەملەكەت ەل جاستارى ءۇشىن الەۋمەتتىك ءليفتتى قامتاماسىز ەتۋدە. ادىلەتتى الەۋمەتتىك ليفت قالىپتاستىرۋ – ادىلەتتى قوعام قۇرۋدىڭ دا بىرەگەي جولى. وسى ورايدا ايتا كەتەرلىك جايت، جاستار بۇل جوباعا تەك مانساپقا جەتۋ مۇمكىندىگى دەپ ەمەس، كەرىسىنشە، ەلگە پايدالى ويلاردى ىسكە اسىرۋدىڭ مۇمكىندىگى دەپ قاراعانى ءجون. بۇل تۋرالى پرەزيدەنتىمىز دە ايتقان بولاتىن»، - دەدى ج. مايلىباي.

سپيكەر پرەزيدەنتتىڭ جاستار كادرلىق رەزەرۆىن مەملەكەتتىك قىزمەت سالاسى بويىنشا قولعا الىنعان ىرگەلى ساياساتتىڭ ماڭىزدى بولىگى دەپ اتادى.

«ەلباسى «100 ناقتى قادام» ۇلت جوسپارىندا ءتيىمدى ءارى كاسىبي مەملەكەتتىك اپپارات قالىپتاستىرۋ كەرەك ەكەنىن ايتقان بولاتىن. ال، پرەزيدەنت ق.ك. توقاەۆ مەملەكەتتىك قىزمەتتىڭ تيىمدىلىگىن ارتتىرۋ ءۇشىن دايىندىعى تولىسقان جاس كادرلاردى تارتۋ كەرەك دەگەن ەدى. كادرلىق رەزەرۆ وسى ماقساتتى كوزدەيتىنىن جانە بۇل باستاما بۇگىن ماڭىزدى ءبىر مەجەنى باعىندىرعانىن كورىپ وتىرمىز. مۇنىڭ بارلىعى جالپى العاندا مەملەكەتىمىزدىڭ ستراتەگيالىق كادرلىق جوسپارلاۋ ساياساتى جۇيەلەنىپ كەلە جاتقانىن كورسەتەدى»، - دەدى جاسۇلانبەك مايلىباي.

ايتا كەتەيىك، بۇگىن ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا قر پرەزيدەنتى اكىمشىلىگى باسشىسىنىڭ ورىنباسارى ماۋلەن اشىمباەۆ پرەزيدەنتتىك جاستار كادر رەزەرۆىنە ەنگەن 300 قازاقستاندىقتىڭ انىقتالعانىن مالىمدەدى. جەڭىمپازداردىڭ ورتاشا جاسى 31-دە.

جوبا جەڭىمپازدارىنىڭ تولىق ءتىزىمىن پرەزيدەنتتىك جاستار كادر رەزەرۆىنىڭ رەسمي سايتىنان كورۋگە بولادى.

Abai.kz