پارلامەنت سەناتى حالىقارالىق قاتىناستار، قورعانىس جانە قاۋىپسىزدىك جانە اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتتەرى بىرلەسىپ وتكىزگەن دوڭگەلەك ۇستەلدە مەملەكەتتىڭ ازىق-تۇلىك قاۋىپسىزدىگىن قامتاماسىز ەتۋ ماسەلەلەرى تالقىلاندى. 

سەنات كوميتەتىنىڭ توراعاسى مۇحتار قۇل-مۇحاممەد شارانى اشا كەلىپ، ازىق-تۇلىك قاۋىپسىزدىگى – ەلىمىزدىڭ ۇلتتىق قاۋىپسىزدىگىن قامتاماسىز ەتۋدەگى باستى باعىتتارىنىڭ ءبىرى ەكەنىن، سونداي-اق بەلسەندى ءارى سالاۋاتتى ءومىر سالتىن ۇستانۋعا قاجەتتى مولشەردە ساپالى تاعام كولەمىنىڭ قولجەتىمدى بولۋىن قامتاماسىز ەتۋ ارقىلى ازاماتتاردىڭ ءومىر ساپاسىن ارتتىرۋ باسىمدىعىن ىسكە اسىرۋدىڭ قاجەتتى شارتى بولىپ تابىلاتىنىن اتاپ ءوتتى.

ازىق-تۇلىك قاۋىپسىزدىگى ماسەلەسىن شەشۋ، ەڭ الدىمەن، وتاندىق اگروونەركاسىپ كەشەنىن دامىتۋعا بايلانىستى. سونىمەن قاتار، اسىل تۇقىمعا، كوشەتتەر مەن تۇقىمداردىڭ يمپورتىنا تاۋەلدىلىك ساقتالىپ وتىر، وتاندىق اۋىل شارۋاشىلىعىنىڭ قايتا وڭدەۋ ونەركاسىبىنىڭ دامىماي وتىرعانى، ءتيىستى ۆەتەريناريالىق جانە سانتارلىق-ەپيدەميولوگيالىق باقىلاۋدىڭ بولماۋى سالدارىنان ساپاسىز ازىق-تۇلىك ونىمدەرىنىڭ كەزدەسەتىنى بايقالىپ وتىر. 

دوڭگەلەك ۇستەل بارىسىندا اۋىل شارۋاشىلىعى ءمينيسترىنىڭ ورىنباسارى نۇربەك دايىربەكوۆ، ساۋدا جانە ينتەگراتسيا ءمينيسترىنىڭ ورىنباسارى ازامات اسقارۇلى، دەنساۋلىق ساقتاۋ ءمينيسترىنىڭ ورىنباسارى قامالجان ءنادىروۆ ءسوز سويلەدى. 

سەناتورلار جەرلەردى قاشىقتىقتان زوندتاۋدى پايدالانۋ، پايدالانىلمايتىن جەرلەردى قايتارۋ، قۇس ەتىنىڭ يمپورتىنا تاۋەلدىلىك، بالالاردىڭ جانە سپورتتىق تاعامداردىڭ ساپاسىن قامتاماسىز ەتۋ، الەۋمەتتىك ماڭىزى بار تاماق ونىمدەرىنە رەترو-بونۋستارعا تىيىم سالۋ جانە باسقا دا بىرقاتار ماسەلەلەردى كوتەردى. 

حالىقارالىق قاتىناستار، قورعانىس جانە قاۋىپسىزدىك كوميتەتىنىڭ حاتشىسى تولەۋبەك مۇقاشەۆ قازاقستاندىقتاردى قولجەتىمدى وتاندىق جەمىستەرمەن جانە كوكونىستەرمەن قامتاماسىز ەتۋ ماسەلەسىنە الاڭداۋشىلىق ءبىلدىردى. 

«بىزگە يمپورتتىق تۇقىمدار مەن كوشەت ماتەريالدارى ارقىلى كەلگەن جەمىس اعاشتارىنىڭ باكتەريالدى كۇيىگى سياقتى اۋرۋ تۋرالى بىرنەشە مارتە ايتقان بولاتىنمىن. وكىنىشكە وراي، وتاندىق قورعاۋ شارالارىنىڭ جۇيەسى ناتيجە بەرگەن جوق، اقىر سوڭىندا قازاقستاننىڭ بارلىق دەرلىك اۋماعىندا تامىرلاردى تۇبىرىنەن قوپارۋ جانە توپىراقتى ورتەۋ پروتسەسى جۇرگىزىلۋدە»، دەپ اتاپ ءوتتى ت.مۇقاشەۆ. 

اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى ءالي بەكتاەۆ دوڭگەلەك ۇستەلدى قورىتىندىلاي كەلىپ، سەنات توراعاسى د.نازارباەۆانىڭ تاپسىرماسى بويىنشا الداعى جىلدىڭ اقپان ايىندا اگروونەركاسىپ كەشەنىن دامىتۋ ماسەلەلەرى بويىنشا پارلامەنتتىك تىڭداۋ وتەتىنىن، ونىڭ ىشىندە ازىق-تۇلىك قاۋىپسىزدىگىن قامتاماسىز ەتۋ ماسەلەلەرى جان-جاقتى قارالاتىنى تۋرالى حاباردار ەتتى. پارلامەنتتىك تىڭداۋعا دايىندىق اياسىندا اۋىلشارۋاشىلىعى ونەركاسىبى سالاسىنىڭ ونىمدەرىن وندىرۋشىلەردىڭ بىرلەستىكتەرى مەن قاۋىمداستىقتارىنىڭ باسشىلارىمەن بىرقاتار كەزدەسۋلەر بولدى. 

دوڭگەلەك ۇستەلدىڭ قورىتىندىسى بويىنشا ۇسىنىمدار ازىرلەنىپ، ۇكىمەتكە جولداناتىن بولادى. 

قر پارلامەنتى سەناتىنىڭ ءباسپاسوز قىزمەتى

Abai.kz