«Bek Air» اۋە كومپانياسىنىڭ 27-31 جەلتوقسان ارالىعىنا جوسپارلانعان بارلىق رەيستەرى ورىندالمايدى. بۇل تۋرالى قر يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى. 

«Bek Air» اۋە كومپانياسى ۇشىرىلىمدارىنىڭ ۋاقىتشا توقتاتىلۋىنا بايلانىستى 2019 جىلعى 27-31 جەلتوقسان كۇندەرى ارالىعىنا جوسپارلانعان اۋە كومپانياسىنىڭ نۇرسۇلتان-قىزىلوردا، قىزىلوردا - نۇر-سۇلتان، نۇر-سۇلتان - اتىراۋ، اتىراۋ - شىمكەنت، شىمكەنت - نۇر-سۇلتان، نۇر-سۇلتان - الماتى، الماتى - ورال، ورال - الماتى، الماتى - اقتاۋ، اقتاۋ - الماتى، الماتى - پاۆلودار، پاۆلودار - الماتى، اقتاۋ - شىمكەنت، اتىراۋ - الماتى، نۇر-سۇلتان - شىمكەنت، الماتى - نۇر-سۇلتان، شىمكەنت - اتىراۋ، اتىراۋ - نۇر-سۇلتان، نۇر-سۇلتان - الماتى، شىمكەنت - اقتاۋ باعىتتارى بويىنشا 100-گە جۋىق رەيسى ورىندالمايدى.

بۇل باعىتتارعا بارلىعى 9157 بيلەت (8180 ەرەسەك، 765 بالا، 212 نارەستە) ساتىلعان.

«قازىرگى ۋاقىتتا اۋە كومپانياسى 2019 جىلعى 31 جەلتوقسانعا دەيىن جوسپارلانعان بارلىق رەيستەرگە بيلەتتەردىڭ تولىق قۇنىن قايتارىپ جاتىر» دەپ ءمالىم ەتتى مينيسترلىكتەن.

2020 جىلعى قاڭتاردىڭ 3-10 ارالىعىنا (2020 جىلعى 1-2 قاڭتارعا رەيستەر الدىن الا جوسپارلانباعان) «Bek Air» اۋە كومپانياسىنىڭ رەيستەرىنە 9785 (8307 ەرەسەك، 1153 بالا، 325 نارەستە) بيلەت ساتىلعان.

وسىعان وراي ۇشىرىلمايتىن رەيستەردىڭ جولاۋشىلارىنا وزگە اۋە كومپانيالاردىڭ قىزمەتىن پايدالانۋعا، سونداي-اق باسقا كولىك تۇرلەرىن قاراستىرۋعا كەڭەس بەرىلەدى.

«وتاندىق اۋە كومپانيالارىنىڭ مالىمەتىنشە، «Bek Air» اۋە كومپانياسىنىڭ رەيستەرى ورىندالمايتىنىنا بايلانىستى بيلەتتەردىڭ قۇنى كوتەرىلگەن جوق. تيىسىنشە، بولعان اپاتقا وراي اۋە بيلەتتەرى باعاسىنىڭ شارىقتاپ كەتكەنى جونىندەگى اقپارات شىندىققا جاناسپايدى. ويتكەنى، جاڭا جىل قارساڭىندا جانە دەمالىس كۇندەرى بيلەتتەردىڭ قۇنى باسقا كۇندەرگە قاراعاندا بۇرىننان قىمباتىراق بولادى. جالپى بيلەتتى ءوز باعاسىنا الۋ ءۇشىن دەلدالداردىڭ قىزمەتىنە جۇگىنبەي، اۋە كومپانيالارىنىڭ رەسمي سايتتارىنان جانە اككرەديتتەلگەن ساتۋ نۇكتەلەرىنەن الۋعا كەڭەس بەرىلەدى» دەلىنگەن حابارلامادا.

«Air Astana» جانە «Qazaq Air» اۋە كومپانيالارىنىڭ مالىمەتىنشە، توقتاتىلعان رەيستەردىڭ جولاۋشىلارى 2019 جىلعى 31 جەلتوقسانعا دەيىن سايكەس باعىتتارعا بوس ورىن بولعان جاعدايدا «Bek Air» اۋە كومپانياسىنىڭ رەيستەرىنە الىنعان بيلەت قۇنىمەن تاسىمالدانادى. ول ءۇشىن بيلەتتەردى تىكەلەي «Air Astana» جانە «Qazaq Air» اۋە كومپانيالارىنىڭ كاسسالارىنان الۋ كەرەك. «SCAT» اۋە كومپانياسى كورسەتىلگەن مەرزىمگە دەيىن بوس ورىندار بولعان جاعدايدا «Bek Air» اۋە كومپانياسى جولاۋشىلارىن قابىلدايدى. وعان «Bek Air» اۋە كومپانياسىنىڭ وكىلى ۇسىنعان جولاۋشىلاردىڭ مالىمەتتەرى كورسەتىلگەن تابىستاۋ تىزىمدەمەسى نەگىز بولا الادى.

سونىمەن قاتار، «Air Astana» 2019 جىلعى 28 جەلتوقسانعا نۇر-سۇلتان مەن الماتى قالالارى اراسىندا قوسىمشا رەيستەر اشتى. ولار جەرگىلىكتى ۋاقىتپەن ساعات 05:00-دە جانە 10:00-دە ۇشادى. اپاتتان زارداپ شەككەندەردىڭ جاقىن تۋىستارى تەگىن تاسىمالدانادى. وعان قوسا، جاڭاجىلدىق مەرەكەلەر مەن دەمالىس كەزەڭىندە «Air Astana» اۋە كومپانياسى الماتىدان نۇر-سۇلتان، اقتوبە، اقتاۋ جانە اتىراۋ قالالارىنا قوسىمشا رەيستەر اشادى.

كولل-ورتالىق تەلەفوندارى:

- «قازاقستاننىڭ اۆيتسيالىق اكىمشىلىگ» اق +77172613187;

- «Air Astana» اۋە كومپانياسى +77172584477, +77272444477, +77027024477;

- «SCAT» اۋە كومپانياسى +77252998880 (ىشكى 277, 278);

- «Qazaq Air» اۋە كومپانياسى +77273561414;

- «Bek Air» اۋە كومپانياسى +77273545000, +77017334576.

Abai.kz