مەملەكەت باسشىسىنىڭ تاپسىرماسىمەن قر ءىىم الماتى وبلىسى گۇلدالا اۋىلىنىڭ اۋماعىندا «Fokker-100» جولاۋشىلار اۋە كەمەسىنىڭ اپاتقا ۇشىراۋ فاكتىسى بويىنشا قر قىلمىستىق كودەكسىنىڭ 344-بابىنىڭ 3-بولىگىنە سايكەس سوتقا دەيىنگى تەرگەۋ جۇرگىزۋدە. بۇل تۋرالى اتالعان مينيسترلىكتىڭ ءباسپاسوز قىزمەتى مالىمدەدى.

«ءىىم ۇشاقتىڭ اپاتقا ۇشىراۋىنا اكەپ سوققان سەبەپتەر مەن جاعدايلاردى ساپالى جانە وبەكتيۆتى تەكسەرۋ جۇرگىزەدى. تەرگەۋ بارىسىندا بارلىق قۇجاتتار، اۋديو جانە بەينەجازبالار زەرتتەلەدى. اۋە كەمەسىنىڭ جاي-كۇيىنە بىرقاتار ساراپتاما، ونىڭ ىشىندە ءورت-تەحنيكالىق جانە كولىكتىك - تراسسولوگيالىق ساراپتاما تاعايىندالدى»، - دەدى ىشكى ىستەر ءمينيسترى ەرلان تۇرعىمباەۆ،

ءىىم باسشىسى تەرگەۋشىلەر اۋە اپاتىنا اكەپ سوقتىرعان بارلىق وقيعالاردىڭ حرونولوگياسىن قالپىنا كەلتىرۋ كەرەكتىگىن اتاپ ءوتتى. وسى ماقساتتا قىزمەتكەرلەر ۇشۋدى ۇيىمداستىرۋ مەن وتكىزۋگە قاتىساتىن بارلىق جەردەگى جانە اۆياتسيالىق قىزمەتتەردىڭ جۇمىسىن تەكسەرەدى، جاۋاپتى تۇلعالاردان جاۋاپ الۋ جانە وسى رەيستىڭ جولاۋشىلارىنان ساۋالناما الۋ جۇرگىزىلەدى.

ۇشۋ-قونۋ جولاعىنا تەكسەرۋ جۇرگىزىلدى. اۋە كەمەسىنەن وزدىگىنەن جازعىش قۇرالدارى مەن بورت جۋرنالى الىندى. قازىرگى ۋاقىتتا ۇشاقتىڭ قۇلاۋ اۋدانىن تەكسەرۋ جالعاسۋدا.

حالىقارالىق تالاپتارعا جانە وسى ساناتتاعى قىلمىستىق ىستەردى تەرگەۋ ەرەكشەلىكتەرىنە سايكەس وعان حالىقارالىق اۆياتسيا كوميتەتىنىڭ (حاك) جانە ۇشاقتى دايىنداۋشى زاۋىتتىڭ وكىلدەرى قاتىسادى، ولارمەن بىرگە الىنعان وزدىگىنەن جازۋ قۇرالدارىنداعى جازبالاردىڭ ءمانىن انىقتاۋ، كەمە قوزعالتقىشى مەن وقيعا ورنىن تەكسەرۋ جۇرگىزىلەدى.

اپاتقا ۇشىراعان اۋە كەمەسى 1996 جىلى گوللانديادا «Fokker» زاۋىتىندا جاسالىپ، 2020 جىلدىڭ 21 مامىرىنا دەيىن ۇشۋ جارامدىلىعى سەرتيفيكاتىنا يە بولعانى انىقتالدى.

جەدەل-تەرگەۋ توبى بىرنەشە نۇسقالاردى، سونىڭ ىشىندە كەمەنىڭ تەحنيكالىق اقاۋىن، اۋا رايى جانە مەتەورولوگيالىق جاعدايلاردى، سونداي-اق ۇشۋ كەزىندە جىبەرىلۋى مۇمكىن قاتەلەردى پىسىقتايدى.

28 جەلتوقسانداعى جاعداي بويىنشا الماتى قالاسىنىڭ مەديتسينالىق مەكەمەلەرىندە 47 زارداپ شەككەن، ونىڭ ىشىندە 9 بالا ستاتسيونارلىق ەمدەلۋدە. زارداپ شەككەن 4 ادامعا مەديتسينالىق تەكسەرۋدەن كەيىن امبۋلاتورلىق ەم تاعايىندالىپ، ۇيلەرىنە جىبەرىلدى. قازا بولعانداردىڭ سانى وزگەرگەن جوق (12 ادام).

Abai.kz