ەلىمىزدە 2006 جىلدان بەرى جوعارى وقۋ ورىندارىنىڭ رەيتينگى جاسالىپ كەلەدى. رەيتينگ - ءبىلىم بەرۋ ساپاسىن انىقتايتىن ينديكاتور عانا ەمەس، ول كوپشىلىك دۇرىس شەشىم قابىلداۋى ءۇشىن جوو-نىڭ ەرەكشەلىكتەرى، ماتەريالدىق-تەحنيكالىق جانە اقپاراتتىق بازاسىنىڭ جاعدايى، يننوۆاتسيالىق ادىستەمەلەر مەن تەحنولوگيالاردى ەنگىزۋى، تۇلەكتەرىنىڭ ەڭبەك نارىعىنداعى قاجەتتىلىگى ت.ب. جايىندا اقپارات بەرەدى. سونداي-اق، جوو-لاردى سارالاۋ ولاردىڭ اراسىندا باسەكەلەستىكتىڭ ارتۋىنا دا ىقپال ەتەدى.

ەلىمىزدە 2006 جىلدان بەرى جوعارى وقۋ ورىندارىنىڭ رەيتينگى جاسالىپ كەلەدى. رەيتينگ - ءبىلىم بەرۋ ساپاسىن انىقتايتىن ينديكاتور عانا ەمەس، ول كوپشىلىك دۇرىس شەشىم قابىلداۋى ءۇشىن جوو-نىڭ ەرەكشەلىكتەرى، ماتەريالدىق-تەحنيكالىق جانە اقپاراتتىق بازاسىنىڭ جاعدايى، يننوۆاتسيالىق ادىستەمەلەر مەن تەحنولوگيالاردى ەنگىزۋى، تۇلەكتەرىنىڭ ەڭبەك نارىعىنداعى قاجەتتىلىگى ت.ب. جايىندا اقپارات بەرەدى. سونداي-اق، جوو-لاردى سارالاۋ ولاردىڭ اراسىندا باسەكەلەستىكتىڭ ارتۋىنا دا ىقپال ەتەدى.
2009 جىلدىڭ رەيتينگىندە قاي وقۋ ورىنىنىڭ بەدەلدى سانالارى ازىرگە بەلگىسىز. ۇلتتىق اككرەديتتەۋ ورتالىعى بىزگە بيىلعى رەيتينگتىڭ ناتيجەسى 20 ماۋسىمنان سوڭ عانا بەلگىلى بولاتىندىعىن ايتتى. ال بۇعان دەيىن ءۇش رەت جۇرگىزىلگەن سارالاۋ ناتيجەسىندە ءال-فارابي اتىنداعى قازاق ۇلتتىق ۋنيۆەرسيتەتى كوش باسىن باسقالارعا بەرمەي كەلدى. بىلتىرعى زەرتتەۋ ناتيجەسى ەلىمىزدىڭ 60 جەتەكشى جوو-سىنىڭ باس رەيتينگىندە ءبىرىنشى، ەكىنشى ورىنداردى ءال-فارابي اتىنداعى قازاق ۇلتتىق ۋنيۆەرسيتەتى مەن ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى الدى. بۇلاردان كەيىنگى ورىندى ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتى قايتادان (2006 جىلداعىداي) يەمدەندى. ال 2007 جىلى وسى ءۇشىنشى ورىننان ق.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتى كورىنىپ ەدى. بىلتىر بۇل ۋنيۆەرسيتەت ءتورتىنشى ورىنعا تابان تىرەسە، بەسىنشى ورىندى م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى الدى. س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتى، اباي اتىنداعى قازاق ۇلتتىق پەداگوگيكالىق ۋنيۆەرسيتەتى، قاراعاندى مەملەكەتتىك مەديتسينا اكادەمياسى، قۇرمانعازى اتىنداعى قازاق ۇلتتىق كونسەرۆاتورياسى، قازاقستان مەنەدجمەنت، ەكونوميكا جانە بولجاۋ ينستيتۋتى (كيمەپ) ۇزدىك وندىقتىڭ قاتارىندا.
ەلىمىزدەگى ۇلتتىق اككرەديتتەۋ ورتالىعى وسى جىلدىڭ رەيتينگىن كەيىنگە قالدىرىپ وتىرسا، ەسەسىنە، شەتەلدىك رەيتينگ اگەنتتىكتەرى جوو-لاردىڭ الەمدىك رەيتينگىن جاريالاپ جىبەردى. ماسەلەن، رەسەيلىك «رەيتەر» تاۋەلسىز اگەنتتىگى بيىل تۇڭعىش رەت الەمدەگى الدىڭعى قاتارلى ۋنيۆەرسيتەتتەردىڭ رەيتينگىن سارالاعان. دۇنيەجۇزىندەگى 15 مىڭ ۋنيۆەرسيتەتتىڭ ىشىنەن 500-ءى ەڭ ۇزدىكتەر قاتارىنا ەنگىزىلدى. ونىڭ ىشىندە ماسساچۋسەت تەحنولوگيالىق ۋنيۆەرسيتەتى كوش باستاسا، م.لومونوسوۆ اتىنداعى ممۋ - بەسىنشى، گارۆارد ۋنيۆەرسيتەتى - التىنشى، كەمبريدج - سەگىزىنشى، وكسفورد - ون ءتورتىنشى، پەكين ۋنيۆەرسيتەتى 103-ءىنشى ورىننان كورىندى. وسى تىزىمگە ەلىمىزدىڭ جەتى جوعارى وقۋ ورنى ەنگەن جانە ءال-فارابي اتىنداعى قازمۇۋ - 372-ءنشى، ل.گۋميلەۆ اتىنداعى ەۇۋ - 379-نشى، م.وتەمىسۇلى اتىنداعى بقمۋ 418-ءنشى ورىنعا تۇراقتادى. ال تمد مەن بالتىق ەلدەرى جوو-لار اراسىندا باتىسقازاقستاندىق ۋنيۆەرسيتەت 79-ورىندى يەلەندى.
ەندى تاعى ءبىر شەتەلدىك اگەنتتىكتىڭ سارالاۋىنا سۇيەنسەك، قازاقستانداعى №1 بيزنەس-مەكتەپ بولىپ حالىقارالىق بيزنەس اكادەمياسى (حبا) تابىلادى. EDUNIVERSAL الەمدىك رەيتينگ اگەنتتىگى اتالعان ماراپاتتى 8 ماۋسىمدا حبا مەن كوممەرتسيالىق جوعارى مەكتەپ (نەس، فرانتسيا) ىنتىماقتاستىعىنىڭ ون جىلدىعىنا وراي وتكەن حالىقارالىق كونفەرەنتسيا بارىسىندا تاپسىردى. EDUNIVERSAL رەيتينگى الەمنىڭ 150 ەلىنىڭ مىڭ بيزنەس-مەكتەپتەرىنىڭ اراسىندا جۇرگىزىلىپتى. وعان ەلىمىزدىڭ ەكى جوو: حالىقارالىق بيزنەس اكادەمياسى مەن قازاقستان مەنەدجمەنت، ەكونوميكا جانە بولجاۋ ينستيتۋتى عانا ەنگىزىلگەن.
وقۋ ورىندارىنىڭ ساپاسىن سارالاۋ - قازاقستاندىق ديپلومداردىڭ تانىمالدىعىن، ءبىلىمنىڭ جوعارى دەڭگەيىن، ەلىمىزدەگى جوو تۇلەكتەرىنىڭ مەملەكەتتىڭ ءوز ىشىندەگى جانە الەمدىك ەڭبەك نارىعىنداعى قاجەتتىلىگىن قامتاماسىز ەتۋگە ىقپال ەتەتىنى انىق. سوندىقتان دا رەيتينگتىڭ وقۋ ورنىن تاڭداعان تالاپكەردىڭ شەشىم قابىلداۋىنا اسەر ەتەتىنى دە تۇسىنىكتى.

كلارا ناقىپ

«نۇر استانا» گازەتى 18 ماۋسىم 2009 جىل