پرەزيدەنت قاسىم-جومارت توقاەۆتىڭ ۇلتتىق قوعامدىق سەنىم كەڭەسىندە اۋىل شارۋاشىلىعى جەرىن پايدالانۋ تيىمدىلىگىن ارتتىرۋعا بايلانىستى بەرگەن تاپسىرمالارىن سولتۇستىكقازاقستاندىقتار قۋانا قولداپ وتىر.

كەشە "Nur Otan" پارتياسى سولتۇستىك قازاقستان وبلىستىق فيليالىندا ءبىز وتكىزگەن قوعامدىق قابىلداۋعا كەلگەن جەرگىلىكتى تۇرعىندار كوتەرگەن ەڭ وزەكتى ماسەلە وسى بولدى. ولار كوپتەگەن شارۋاشىلىقتاردىڭ باسشىلارى وزدەرىنە تيەسىلى جەر ۇلەستەرىن سەنىپ تاپسىرعان اۋىلدىقتارعا ماردىمسىز اقى تولەيتىندىگىن، اۋىلداردىڭ الەۋمەتتىك پروبلەمالارىن شەشۋگە كومەكتەسپەيتىندىگىن ايتىپ شاعىمداندى. ونداي باسشىلار جەر ۇلەستەرىن قايتارۋدى سۇراعان ادامداردىڭ وتىنىشتەرىن قۇلاققا ىلمەيتىن بولىپ شىقتى.

بىزبەن كەزدەسكەن وبلىس اكىمى قۇمار اقساقالوۆ تا مىڭداعان گەكتار ەگىنشىلىك جەردى يەمدەنىپ الىپ، جۇرتقا قارايلاسپايتىن، ءتىپتى وزدەرىن "باي" سانايتىن باسشىسىماقتار بارلىعىن ايتتى. ولاردى جونگە سالۋدىڭ جولى - قولدانىستاعى زاڭنامانى جەتىلدىرۋ دەپ، ءوز ۇسىنىستارىن ورتاعا سالدى.

ءبىز بۇل ماسەلەنى الداعى زاڭشىعارۋشىلىق جۇمىسىمىزدا جان-جاقتى قاراستىرامىز.

كارىباي مۇسىرماننىڭ الەۋمەتتىك جەلىدەگى جازباسىنان

Abai.kz