رەداكتسيادان: 30 جەلتوقسان، 2019 جىلى «Abai.kz» سايتىندا اقىن، قوعام قايراتكەرى اۋىت مۇقيبەكتىڭ پرەزيدەنت قاسىم-جومارت توقاەۆتىڭ اتىنا جازعان «قانداستارىڭىزدى باسپاناسىز تاستاماڭىز...»  اتتى «اشىق حاتى» جاريالانعان بولاتىن.

بۇگىن رەداكتسيامىزدىڭ ەلەكتروندى پوشتاسىنا اتالعان ماسەلەنىڭ شىندىعى مەن وزەكتىلىگىن دالەلدەيتىن كۋندۋز يبرايموۆا اتتى قانداسىمىزدىڭ حاتى كەلىپ ءتۇستى.

حات مازمۇنىنا قاراعاندا، الداعى جەردە مۇنداي جاعدايلار ءتىپتى دە كوبەيە جانە ۋشىعا ءتۇسۋى مۇمكىن. ۇكىمەت قانداستارىمىزدىڭ باسپانا كەزەگىنە قاتىستى زاڭنامانىڭ شيكى تۇسىن ۋاقىت وتكىزبەي تۇزەتەدى دەپ سەنەمىز.

قازاقستان  رەسپۋبليكاسىنىڭ

پرەزيدەنتى ق.ك.توقاەۆقا

اسا قۇرمەتتى قاسىم-جومارت كەمەلۇلى!

مەن وتباسىممەن 2009 جىلى وزبەكستان رەسپۋبليكاسىنان كوشىپ كەلدىم. 2010 جىلى قازاقستان رەسپۋبليكاسىنىڭ ازاماتتىعىن الدىق. ءتورت بالانىڭ اناسىمىن. «ورالماندار» ساناتى بويىنشا 2009 جىلى 16 ساۋىردە نۇر-سۇلتان قالاسىنا باسپانا كەزەگىنە تۇردىق.

2019 جىلى 10 شىلدەدە ماعان نۇر-سۇلتان قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسىنان حات كەلدى.

اتالعان حاتتا ءبىزدىڭ قازاقستان رەسپۋبليكاسىنىڭ ازاماتتىعىن العاندىعىمىز سەبەپتى، «ورالمان» مارتەبەمىز جويىلىپ، باسپانا كەزەگىنەن شىعارىلاتىنىمىز حابارلانىپتى.

سونداي-اق، كوپبالالى وتباسى رەتىندە قايتا قۇجات تاپسىرىپ، كەزەككە تۇرۋىمىزعا بولاتىنى دا ەسكەرتىلىپتى.

بىراق، كەزەگىم «كوپبالالى وتباسى» ساناتىمەن كەزەككە تۇرعان كۇننەن باستاپ ەسەپتەلەدى ەكەن.

سوندا، مەنىڭ ون جىلدان بەرگى كەزەك ستاجىم تۇگەل جويىلىپ كەتكەلى تۇر. وتباسىمىزبەن پاتەردەن-پاتەرگە كوشىپ ءجۇرىپ، ون جىل كۇتكەن ءۇمىتىمىز ءۇزىلىپ، سەلگە كەتكەلى تۇر. قازىرگى تاڭدا كەزەگىمىز 1500-شىگە جاقىنداپ قالىپ ەدى. ەندى قايتا قۇجات جيىپ، «كوپبالالى وتباسى» ساناتىمەن پاتەر كەزەگىنە تىركەلسەك، كەزەگىمىز ەڭ سوڭىنا ءبىر-اق سەكەرەدى. تاعى جيىرما جىل كۇتۋىمىز مۇمكىن. ءبىزدى قويشى، بالالارىمنان ۇيات ەكەن. ەس كىرىپ قالدى ەمەس پە، ەستىگەندە كادىمگىدەي كوڭىلدەرى ءتۇسىپ، يىقتارى سالبىراپ، كوزدەرى جاۋتەڭدەپ قالدى...

مۇنداي جاعداي ءبىزدىڭ عانا ەمەس، ءبىز تانيتىن ءبىراز اۋىلداستارىمىزدىڭ سالىندىسىن سۋعا كەتىردى. الدى ايعايلاپ، اقوردانىڭ الدىنا باردى. مەن سىزدەن كومەك سۇراپ، حات جازۋدى ءجون كوردىم.

ءسويتىپ، قۇدايعا تاۋبە، وتانىمىز وزەكتەن تەپكەن جوق. بىراق كەزەكتەن شىعارىپ تاستاعالى وتىر...

اسا قۇرمەتتى قاسىم-جومارت كەمەلۇلى!

سوندىقتان، سىزدەن وسى ماسەلەنى ءوز نازارىڭىزعا الىپ، قاتىستى زاڭنامالارعا تولىقتىرۋ ەنگىزۋگە، ءبىز سەكىلدى شەتتەن ورالىپ، قازاقستان ازاماتتىعىن العان سوڭ، باسپانا كەزەگىنەن شىعىپ قالعان قانداستارىڭىزدىڭ قۇقىعىن قالپىنا كەلتىرۋگە كومەكتەسۋىڭىزدى سۇرايمىن.

قۇرمەتپەن،

كوپبالالى انا

يبرايموۆا كۋندۋز كاريسباەۆنا

Abai.kz