بۇگىن باق-تا مەملەكەت باسشىسى قاسىم-جومارت توقاەۆتىڭ «اباي جانە ءححى عاسىرداعى قازاقستان» اتتى ماقالاسى جارىق كوردى. ماقالادا پرەزيدەنت اباي شىعارمالارىنىڭ بۇگىنگى قوعام ءۇشىن ءمان-ماڭىزىنا توقتالدى. سونىمەن قاتار بيىل ۇلى اقىننىڭ 175 جىلدىعىنا وراي ەلىمىز بويىنشا 500-دەن استام ءىس-شارا ۇيىمداستىرىلاتىنىن ايتتى. 

قاسىم-جومارت توقاەۆ ءوز ماقالاسىندا ابايدىڭ ويىنان دا، تويىنان دا كەلەر ۇرپاق تاعىلىم الۋى ءتيىس، دەدى.

- بيىل ابايدىڭ 175 جىلدىعىنا وراي حالىقارالىق، رەسپۋبليكالىق جانە ايماقتىق دەڭگەيدە 500-دەن استام ءىس-شارا ۇيىمداستىرىلادى. تامىز ايىندا سەمەي قالاسىندا يۋنەسكو-مەن بىرلەسىپ وتكىزىلەتىن «اباي مۇراسى جانە الەمدىك رۋحانيات» اتتى حالىقارالىق عىلىمي-پراكتيكالىق كونفەرەنتسيا ەڭ باستى شاراعا اينالادى. سونداي-اق، قازان ايىندا نۇر-سۇلتان قالاسىندا «اباي جانە رۋحاني جاڭعىرۋ ماسەلەلەرى» دەگەن تاقىرىپتا حالىقارالىق كونفەرەنتسيا وتەدى. بۇل جيىنداردا ابايدىڭ تۇلعاسى مەن مۇراسى جان-جاقتى زەردەلەنىپ، ونىڭ شىعارماشىلىعىن ءححى عاسىرداعى جاڭا قازاقستاننىڭ يگىلىگىنە پايدالانۋعا جول اشىلادى، - دەلىنگەن ماقالادا.

سونىمەن قاتار، ۇلى اقىننىڭ مەرەيتويىنا وراي، اباي شىعارمالارىن الەمنىڭ 10 تىلىنە اۋدارىپ، باسىپ شىعارۋ جۇمىستارى قولعا الىناتىن بولادى. ول تۋرالى پرەزيدەنت:

- ماڭىزدى جوبانىڭ ءبىرى – ۇلى اقىننىڭ شىعارمالارىن ون تىلگە اۋدارىپ، باسىپ شىعارۋ. اتاپ ايتقاندا، اباي ەڭبەكتەرى اعىلشىن، اراب، جاپون، يسپان، يتاليان، قىتاي، نەمىس، ورىس، تۇرىك، فرانتسۋز تىلدەرىنە ءتارجىمالانادى. اقىننىڭ ءومىرى، مۇراسى، قازاق مادەنيەتىن دامىتۋداعى ءرولى تۋرالى بىرنەشە دەرەكتى فيلم جانە «اباي» تەلەسەريالى تۇسىرىلەدى.