سارسەنبى, 19 اقپان 2020
اقمىلتىق 2567 40 پىكىر 10 قاڭتار, 2020 ساعات 15:10

بۇلدىرشىندەر مەشىتكە ەمەس، بالاباقشاعا مۇقتاج!

ەلوردادا تاعى دا مەشىت سالىنباقشى. بيىكتىگى 130 مەتر، 4 باعانالى بولادى ەكەن. قۇرىلىسى 2021 جىلى اياقتالادى دەپ جوسپارلانۋدا.

جالپى مۇسىلمان بولىپ بەتىڭدى قاعباعا بۇرىپ، جىعىلىپ بەس ۋاقىت ناماز وقىعان دۇرىس قوي. بىراق، ەلىمىزدە سوڭعى جىلدارى مەشىت سالۋ ءۇردىسى كەڭ ەتەك الدى. قمدب-نىڭ مالىمەتى بويىنشا ەلىمىزدە وتكەن جىلى 38 مەشىت سالىنىپتى. جالپى مەشىتتەر سانى 2626. مەشىت سپونسورلاردىڭ اقشاسىنا سالىنادى-مىس دەگەن سىبىس بار. ونىڭ بيۋدجەتى قانشا بولاتىنىن ەشكىم اشىق ايتىپ جاتقان جوق.

ەندى مىنا دەرەككە قاراڭىز، ەلىمىزدە بالا سانىنىڭ وسكەنىمەن، بالا-باقشا سانى وسپەي وتىر. قر بعم سايتىنا كىرىپ ۇڭىلسەك، قازىرگى تاڭدا مەكتەپ جاسىنداعى بالالاردىڭ سانى 424 مىڭدى قۇراپ وتىر. ونىڭ ىشىندە 3-6 جاس ارالىعىنداعى بۇلدىرشىندەردىڭ سانى 118 مىڭ. سوڭعى ەكى جىلدا بالا-باقشاعا كەزەك سانى 168 مىڭنان 118 مىڭعا قىسقارىپتى. نە دەگەن ستاتيستيكا؟ بار جوعى 50 مىڭ بالانى باقشامەن قامتىپ وتىر ما سوندا ەلىمىز؟

ال، نۇر-سۇلتانعا كەلەتىن بولسا، شۇبەرەك الىپ جىلاۋعا بولادى. باعانالى باقوردادا 369 بالا-باقشا بار ەكەن. ونىڭ 90-ى مەملەكەتتىك، 43-ءى ميني-ورتالىقتار، قالعان 214-ءى جەكە مەنشىككە تيەسىلى باقشالار. كەزەك كۇتىپ تۇرعان تاعى 14 000 ءبۇلدىرشىن بار. ەلوردادا جىلىنا مەملەكەتتىك 1-2 عانا بالا-باقشا سالىنادى ەكەن.

سانداردىڭ ءوزى سايراپ تۇر. بۇلدىرشىندەر مەشىتكە ەمەس، باقشاعا مۇقتاج. ءبىر بالا-باقشا سالۋ ءۇشىن 1 ملرد. تەڭگە كەتەدى ەكەن. وسى جەردە ەسىمە دۋبايداعى ەكسپو-نىڭ قاڭىراعان پاۆيلونىنا 9 ملرد. تەڭگە بولنگەنى ءتۇسىپ كەتتى. تاعى دا اريفمەتيكا ايقايلاپ تۇر.

ال الەۋمەتتىك تەگىن ۇيگە مۇقتاج كوپ بالالى انالاردىڭ كەزەگى جىل وتسە دە جىلجىمايدى. مەشىتتى سالدى دەلىك. جۇما نامازعا جۇرت جينالادى. قالعان كۇندەرى قاڭىراپ بوس تۇرادى نەمەسە باي-باعلاندار اس بەرىپ، ورازا كۇندەرى تەگىن تاماق تاراتادى. ءبىزدىڭ قوعام، جالپى اقشاسى بار سپونسورلار ناعىز مۇقتاج جاندارعا كومەك بەرسە ەكەن.

ايتپاقشى، مەشىتكە كەلىپ جاتقان كەلىمسەكتەردى ەشكىم باقىلاپ وتىرعان جوق. قاي مازحاب، قاي اعىمدا ەكەنى بەيمالىم. ونى يمام دا، يۆان دا تەكسەرىپ جاتقان جوق. مەشىتكە بارىپ، باسقا اعىمعا كىرىپ كەتىپ، اقىرى سۇيەگى سيريانىڭ ساحاراسىندا شاشىلىپ كەتكەن «سوقىر» قازاقتىڭ ۇلدارى قانشاما...

ءتۇيىن. بىلتىر رىسكەلدى قاجىنىڭ اتىنا اشىلعان «اللانىڭ گۇلى» دەپ اتالاتىن مەشىت استانامىزدا 9-شى ەكەن. ال شىنداپ كەلگەندە، اللانىڭ گۇلى دە، نۇرى دا – باۋىر ەتىڭ بالاڭ عوي. سول سەبەپتى، قۇرمەتتى سپونسورلار بالالارعا باقشا سالىپ جارىسايىق!

سالتانات ءاشىرباي،

نۇر-سۇلتان قالاسى.

Abai.kz

40 پىكىر