ۇكىمدى تۇسىندىرگەن سۋديا قۇيقاباەۆا سوتتىڭ تابارىكۇلىنىڭ 2020 جىلدىڭ ماۋسىم ايىنا دەيىن جارامدى ىقتيارحاتى بولعانىن ەسكەرگەنىن، بۇعان قوسا اكە-شەشەسى (قازاقستان ازاماتتارى) وسىندا بولعاندىقتان ونى جاقىندارىنان ايىرماۋدى قاجەت دەپ تاپقانىن ايتتى. سۋديانىڭ ايتۋىنشا، "ەكى كۇن ءبىر كۇن بولىپ سانالاتىندىقتان" تابارىكۇلىنىڭ قاماۋدان شىعۋىنا از ۋاقىت قالدى.
شىڭجاڭدا تۋعان 30 جاستاعى قىتاي ازاماتى تىلەك تابارىكۇلىنىڭ ۇستىنەن قازاقستاننىڭ قۇقىق قورعاۋ ورگاندارى 2019 جىلى تامىز ايىندا قىلمىستىق ءىس قوزعاپ، قازان ايىندا ۇستاعان. ول شامامەن ءبىر جارىم-ەكى ايدان بەرى تالدىقورعانداعى تەرگەۋ يزولياتورىندا قاماۋدا وتىر.
ايىپتاۋ تارابىنىڭ ايتۋىنشا، ول 2018 جىلى مامىر ايىندا قازاقستان مەن قىتاي اراسىنداعى "شەكارانى زاڭسىز كەسىپ وتكەن". ونىڭ الدىندا قازاقستاندا ىقتيارحاتپەن جۇرگەن ول 2017 جىلى جەلتوقسان ايىندا قىتايعا ء"بىلىم جەتىلدىرۋ ماقساتىندا" بارىپ قايتا الماي قالعان. قىتايدىڭ قۇقىق قورعاۋ ورگاندارى "بەلگىسىز سەبەپتەرمەن" قۇجاتىن الىپ، قايتارماعان. ول بىرنەشە ايدان سوڭ قورعاس بەكەتىنە بارىپ، رەتى كەلگەندە قازاقستان جاققا قاراي ءوتىپ كەتكەن.
قورعاۋ تارابىنىڭ ايتۋىنشا، پوليتسيا ىقتيارحاتى بار تىلەك تابارىكۇلىن "قازاقستان ازاماتتىعىن الايىن دەپ جۇرگەن كەزدە" ۇستاعان. تابارىكۇلى 2017 جىلى قاراشا ايىندا قازاقستاننان ازاماتتىق الۋ تۋرالى ءوتىنىش تۇسىرگەن.
بۇعان دەيىن پروكۋرور ازامات بايساروۆ تىلەك تابارىكۇلىن التى ايعا باس بوستاندىعىنان ايىرىپ، بەس جىلعا دەيىن قازاقستان اۋماعىنان شىعارۋدى سۇراعان. قورعاۋ تارابى پروكۋروردىڭ ايتقانىنا قارسى بولىپ، تابارىكۇلىن ءۇش ايعا سوتتاپ، قازاقستان ازاماتتىعىن بەرۋدى سۇراعان. قورعاۋ تارابى "كەز كەلگەن جازاعا "رازى" بولاتىنىن، تەك قىتايعا قايتارماۋدى" سۇراعان.
Abai.kz
