پرەزيدەنتتىك كادرلىق رەزەرۆ باعدارلاماسى جاستارعا دا، مەملەكەتكە دە قولايلى. مۇنداي پىكىردى پرەزيدەنتتىك جاستار كادرلىق رەزەرۆىنىڭ مۇشەسى ولجاس ساكەنوۆ ءبىلدىردى.

«پرەزيدەنتتىك كادرلىق رەزەرۆ باعدارلاماسىنىڭ ءمانى ەرەكشە. بۇل باستاما جاستارعا دا، مەملەكەتكە دە قولايلى. ويتكەنى مەملەكەتتىك قىزمەتكە كەلگەن جاستار، جاڭا بۋىن جۇيەگە قانداي دا ءبىر جاڭالىق ەنگىزەتىنى بەلگىلى. اسىرەسە، جەكە سەكتور تۇرعىسىنان العاندا تىڭ سەرپىن بەرمەك. ماسەلەن، كادرلىق رەزەرۆكە ەنگەن جاستاردىڭ 30 پايىزعا جۋىعى جەكە سەكتوردا، حالىقارالىق كومپانيالاردا جۇمىس ىستەگەن نەمەسە ءالى كۇنگە دەيىن سوندا جۇمىس ىستەيدى. الدا-جالدا ولار مەملەكەتتىك قىزمەتكە كەلىپ جاتسا، تاجىريبەسى مەن بىلىكتىلىگىن ەلىمىزدىڭ ەرتەڭى، حالقىمىزدىڭ بولاشاعى جولىنا ارناماق. ال جاستارعا كەلسەك، باعدارلامانىڭ ولارعا دا پايدالى ەكەنى انىق. ياعني، ءبىز جەكە يدەيالارىمىزدى ۇسىنىپ، تاجىريبەمىزبەن بولىسۋگە زور مۇمكىندىك تۋدى. سونداي-اق باستامانى «الەۋمەتتىك ليفت» رەتىندە دە قاراستىرۋعا بولادى. جوعارى لاۋازىمعا جەتۋ ءۇشىن مەملەكەتتىك قىزمەتتە ەڭبەك ءوتىلى قاجەت. ال كادرلىق رەزەرۆ ارقىلى بىردەن باسقارۋشىلىق لاۋازىمعا تاعايىندالۋعا جاعداي جاسالعان. وسى ارقىلى سالاعا قانداي دا ءبىر وزگەرىس ەنگىزۋگە مۇمكىندىك تۋادى. بۇل رەزەرۆكە ەنگەن جاستاردىڭ الداعى جۇمىس مانسابىنا وڭ ىقپال ەتەتىنى انىق»، - دەدى ول.

جاس مامان پرەزيدەنتتىك كادرلىق رەزەرۆكە سىناق بىرنەشە كەزەڭنەن تۇرعانىن ايتادى.

«ونىڭ تورتەۋى ونلاين رەجىمدە جۇرگىزىلدى. ەكەۋىندە ساراپشىلارمەن بەتپە-بەت كەزدەسىپ، اڭگىمەلەستىك. بۇل – بۇرىن-سوڭدى بولماعان تاجىريبە دەپ ويلايمىن. ويتكەن مەملەكەتتىك باسقارۋ اكادەمياسى، سونداي-اق تالانتيس، SHL دەگەن دۇنيەجۇزىنە ءمالىم كومپانيالاردىڭ جيناعان ادىستەمەسىن پايدالانىپ، مۇنداي شىنايى تۇردە باعالاۋ وتە ءتيىمدى بولعانى انىق. سىناق كەزىندە مەن ءۇشىن SHL تاراپىنان ازىرلەنگەن سۇراقتار وڭايعا سوققان جوق. ويتكەنى ولارعا مۇقيات ازىرلەنۋ قاجەت. سونىمەن قاتار ءبىر مينۋت ىشىندە سۇراققا جاۋاپ بەرۋ دە جەڭىل تاپسىرما ەمەس. الايدا وسىنداي قيىندىققا قاراماستان، ءبارىن ءساتتى تاپسىرىپ شىقتىم»، -دەدى ولجاس ساكەنوۆ.

ولجاس ساكەنوۆ وتكەن اپتادا رەزەرۆكە ەنگەن جاستار مەملەكەت باسشىسى قاسىم-جومارت توقاەۆپەن كەزدەسكەنىن، سول جيىننان كوپ نارسە ءتۇيىپ شىققانىن باسا ايتتى.

«مەملەكەت باسشىسىنىڭ سوزىنەن تۇيگەنىم، پرەزيدەنتتىڭ كادرلىق رەزەرۆى جوباسى ءبىر رەتتىك قانا جوبا ەمەس. جالپى، بۇكىل ساياسي جۇيەنى، مەملەكەتتىك قىزمەتتى وزگەرتەتىن جوبالاردىڭ لەگى عانا. ونداي وزگەرىستەر ءالى دە بولادى. بۇل – وزگەرىستەردىڭ باسى عانا. سوندىقتان وسىنداي وزگەرىستەردىڭ بولعانىنا، رەفورمالار جاساۋدى قولدايمىن. ويتكەنى رەزەرۆكە ەنگەن جاستاردىڭ ارقايسى ءوز سالالارىندا قاندايدا ءبىر يدەيالار مەن وزگەرىستەر ەنگىزۋگە سەپتىگىن تيگىزەدى. جالپى، زامانداستارىما ايتارىم. جاستارعا قازىرگى زاماندا وتە كوپ مۇمكىندىك بار. سولاردى جىبەرىپ الماۋ كەرەك. كەز كەلگەن جوباعا قاتىسىپ، ءوز كۇشىڭىزدى سىناعىڭىز كەلسە، بىلىكتىلىگىڭىز بەن ءبىلىمىڭىزدى بايقاپ كورۋدى كوزدەسەڭىز، جوبالارعا مىندەتتى تۇردە قاتىسىڭىز. مۇنداي قادام سىزگە جاقسى اسەر تيگىزەتىنى انىق. ءتىپتى ىرىكتەۋدەن وتە الماساڭىز دا، كوكجيەگىڭىز كەڭەيەدى»،- دەدى جاس رەزەرۆشى.

Abai.kz