پرەزيدەنتتىك كادر رەزەرۆىنە ەنگەندەردىڭ بويىنان ۇلى ابايدىڭ «تولىق ادام» سيپاتتاماسىنىڭ بەلگىلەرىن كورۋگە بولادى. مۇنداي پىكىردى جاستار رەزەرۆىنەن كورىنگەن الىبەك ىدىرىس ءبىلدىردى.

«پرەزيدەنتتىك جاستار كادر رەزەرۆىنە ەنۋگە ارنالعان بايقاۋ 6 كەزەڭنەن تۇردى. نەگىزىندە، بايقاۋعا دايىندالۋدىڭ قاجەتى بولمادى. سەبەبى، كريتەريلەر قاتىسۋشىلاردىڭ بويىندا بۇرىننان قالىپتاسقان قۇزىرەتتىلىكتەرىنە جانە جيناعان تاجىربيەلەرىنە نەگىزدەلگەن. بۇل نەگىزدەمە - باسشىلىق قىزمەتتەگى ادامنىڭ رياسىز تۇلعاسى جانە حالىقپەن ەتەنە جۇمىس جاساۋ، ياعني حالىق ۇنىنە قۇلاق اساتىن، سونىمەن بىرگە الەۋمەتتىك-ەكونوميكالىق ماسەلەلەردى شەشۋ قابىلەتىنە ساي جاسالعان. سوندىقتان، رەزەرۆشىلەردىڭ بويىنان ۇلى اباي اتامىزدىڭ «تولىق ادام» سيپاتتاماسىنىڭ بەلگىلەرىن كورۋگە بولادى»، - دەدى الىبەك ىدىرىس.

ونىڭ ايتۋىنشا، پرەزيدەنتتىك كادر رەزەرۆى بويىنشا قىزمەتكە ورنالاسۋعا كوپتەگەن ۇسىنىستار تۇسكەن جانە ءالى دە ءتۇسىپ جاتىر. دەگەنمەن، جاس رەزەرۆشى ءال-فارابي اتىنداعى قازۇۋ رەكتورى عالىمقايىر مۇتانۇلىنىڭ جەكە قابىلداۋىندا بولىپ، ونىڭ ۋنيۆەرسيتەت جانىنان قۇرىلعان بيومەديتسينا عىلىمي زەرتتەۋ ورتالىعىنىڭ باشىسى بولۋ تۇرالى ۇسىنىسىن قابىل العان.

«بۇل قىزمەت مەنىڭ وسى كونكۋرسقا تۇسۋدەگى ماقساتىمنان باسقاشا بولعانىمەن، تاجىريبە جيناۋ ءۇشىن جانە بۇل سالا بويىنشا ەلىمىزدە تۇڭعىش رەت اشىلىپ وتىرعان ورتالىقتىقتىڭ اياقتان تۇرىپ كەتۋى ءۇشىن تۇسكەن ۇسىنىستى قابىل الدىم. جاستارعا وقۋ-پراكتيكالىق، عىلىمي-زەرتتەۋ ورتالىقتىڭ اشىلۋى كەزەك كۇتتىرمەيتىن ماسەلە ەدى. الدا ءبىزدىڭ ورتالىق حرونومەديتسينا، بيوماسساج، اكۋپۋنتۋرا، فيتوپرەپاراتتار، ەندوكرينولوگيا، يممۋنولوگيا، پروفيلاكتيكا، مەديتسينالىق بيوفيزيكا، پتسر اناليز جانە تاعى باسقا باعىتتار بويىنشا جۇمىس جاسايدى. بولاشاقتا وسى ورتالىقتى ينستيتۋت، ودان ارى رەسپۋبليكالىق ۇلتتىق زەرتتەۋ ورتالىعىنا اينالدىرساق دەگەن جوسپارىمىز بار»، - دەدى جاس رەزەرۆشى.

«ءبىز سەكىلدى جاستارعا مەملەكەت باسشىسى قاسىم-جومارت توقاەۆ ءوزىنىڭ كەمەڭگەرلىگىمەن «پرەزيدەنتتىك جاستار كادر رەزەرۆى» اتتى جوبا ۇسىنىپ، ەلگە قىزمەت ەتىپ، قازاقستاندى دامىتۋعا ۇلەس قوسۋعا مۇمكىندىك بەرىپ وتىر. نەگىزىندە، اۋىل شارۋاشىلىعى سالاسى بويىنشا «قازاقستاننىڭ بولاشاق فەرمەرلەرى» دەپ اتالاتىن جوبامدى قورعاپ، ەلىمىزدە اۋىل شارۋاشىلىعىن دامىتۋ بويىنشا ءوز يدەيامدى ۇسىنعان ەدىم. ەكىنشىدەن، ءالى دە بولسا ەلمىزدىڭ سولتۇستىك وبلىستارىن قازاقىلاندىرۋ جانە دامىتۋ بويىنشا جۇمىس جاساپ، سول وڭىرلەرگە باسشىلىق قىزمەتكە بارۋ ويىمدا بار. ەندى بەس جىلدان كەيىن ءوزىمدى حالىق جانە پرەزيدەنت سەنىپ تاپسىرعان مىندەتتى ادالدىقپەن ورىنداپ، ساياسىن جايا باستاعان بايتەرەك رەتىندە كورەمىن»، - دەدى الىبەك ىدىرىس.

ايتا كەتەيىك، الىبەك ىدىرىس ءال-فارابي اتىنداعى قازاق ۇلتتىق ۋنيۆەرسيتەتى بيولوگيا جانە بيوتەحنولوگيا فاكۋلتەتى، بيوفيزيكا جانە بيومەديتسينا كافەدراسىنىڭ مەڭگەرۋشىسى، حالىقارالىق بايلانىستار جونىندەگى رەكتور ورىنباسارى قىزمەتىن اتقارعان. اتالعان جوعارى وقۋ ورنىنىڭ اعا وقىتۋشىسى.

ەسكە سالا كەتسەك، وسىدان بىرنەشە كۇن بۇرىن اقوردادا مەملەكەت باسشىسى قاسىم-جومارت توقاەۆ پرەزيدەنتتىك كادر رەزەرۆىنە ەنگەن 300 جاسپەن كەزدەسۋ وتكىزگەن بولاتىن. جيىندا قاسىم-جومارت توقاەۆ ەل جاستارىنا ۇندەۋ جولدادى.

Abai.kz