سەنبى, 4 ءساۋىر 2020
COVID-19 قازاقستاندا. جۇقتىرعاندار — 525. جازىلعاندار — 36. قايتىس بولعاندار — 5
ساڭلاق 2183 7 پىكىر 30 قاڭتار, 2020 ساعات 13:32

«جەتىسۋ» كلۋبى ءوز تۇلەكتەرىن وزەككە تەۋىپ ءجۇر

ادەتتە، ءبىز سپورت جايلى اڭگىمە قوزعاي قالساق، جەتىسۋ ولكەسىن تالانتتار مەكەنى دەيمىز. راسىندا دا سولاي. سپورتتىق سالادا تالايدى تاڭعالدىرىپ، الەمدە اتوي سالعان ۇلاندارىمىز از ەمەس. ايتسە دە، فۋتبولعا كەلگەندە كەنجەلەپ قالامىز.

جەتىسۋ جەرىندە فۋتبولشى جوق دەۋگە كەلمەيدى. بار، بىراق ولار وزگە وڭىرلەردە دوپ تەۋىپ ءجۇر. ماسەلەن، جەتىسۋ فۋتبول مەكتەبىنەن قاناتتانعان سەرىكجان مۋجيكوۆ، بەرىك شايحوۆ، رافحات اسلان سەكىلدى ۇزدىكتەرىمىز وزگە كلۋبتاردا. ولار العاشىندا «جەتىسۋ» كومانداسىندا ونەر كورسەتىپ، شەبەرلىكتەرىن تانىتقان سوڭ باسقا كلۋبتار «قۇدا ءتۇستى». «بولايىن دەگەن بالانىڭ بەتىن قاقپا، بەلىن بۋ» دەگەندەي،  نەگىزگى قۇرامدا ونەر كورسەتەمىن دەگەن ويىنشىلارعا باتامىزدى بەرىپ، شىعارىپ سالدىق. بۇل قالىپتى جاعداي.

ال سوڭعى ۋاقىتتا پرەمەر-ليگا قاتارىنان جەتىسۋلىق جەرلەستەردى بايقاي الماي ءجۇرمىز. «جەتىسۋ» كومانداسىنىڭ وزىندە تالدىقورعاندىق فۋتبولشىلار ساۋساقپەن سانارلىق. ولاردىڭ ورنىن وزگە وڭىردەن، بولماسا سىرتتان كەلگەن ويىنشىلار الماستىرعان. سوندا قالاي، «اۋىلداعىنىڭ اۋىزى ساسىق» بولعانى ما؟!

«جەتىسۋ» كومانداسىنىڭ ساپىندا بار بولعانى جەتىسۋلىق ەكى بالا عانا بار: ايبار جاقسىلىقوۆ پەن راۋان ورىنباسار. قالعان بالالارعا ورىن جوق. ماسەلەن، ايبار وتكەن ماۋسىمدا 24 ويىن وتكىزىپ، 6 گول سوققان. 33 تۋردا 678 مينۋت ويناعان. ەگەر ايباردىڭ ستاتيستيكاسىنا ۇڭىلەتىن بولساق، الاڭداعى ەڭ كوپ كورسەتكىشى 90 مينۋت. قالعانى كەزدەسۋدىڭ ورتاسىندا الماسقان.

مۇنى فۋتبولدىڭ زاڭدىلىعى دەپ اتايىق. دەگەنمەن دە، جەتىسۋلىق جالعىز ويىنشى كىمنىڭ كوڭىلىن جامايدى؟ راۋان ورىنباسار الاڭعا مۇلدە شىقپاعان. تەك جەرگىلىكتى ويىنشى بولۋ كەرەك دەگەن اڭگىمەنىڭ ورنىن تولتىرۋ ءۇشىن كوماندا ساپىنا ەنگىزىپ، ماۋسىم بويى الاڭعا شىعارماعان.

وسى جەردە ءبىر ماسەلەنى قوزعاي كەتكەندى ءجون كورىپ وتىرمىن. جاڭا ماۋسىم باستالار الدىندا الماتى وبلىسىنىڭ باسشىسى اماندىق باتالوۆ «جەتىسۋ» كلۋبىنىڭ باسشىلارى مەن جاتتىقتىرۋشىلارىنا ناقتى تاپسىرما بەرگەن بولاتىن. "كوماندا ساپىنا جەرگىلىكتى ويىنشىلاردى تارتۋ كەرەك. ءبىرىنشى، ەكىنشى ليگاداعى ويىنشىلار وبلىستان قۇرالعان جانە نەگىزگى قۇرامعا ۇمىتكەر ويىنشىلار بولۋى ءتيىس", - دەگەن.

بۇل تاپسىرمانى كلۋب جاتتىقتىرۋشىلارى نەگە ەسكەرمەيدى؟ ەگەر «جەتىسۋ» ساپىندا جەرلەستەرى جوق بولسا، جەرگىلىكتى جانكۇيەرلەر كىمگە قولداۋ كورسەتەدى؟ مەنىڭ وسىعان تاڭىم بار. ارينە، دميتري وگاي مەن رۋسلان بالتيەۆتىڭ شەبەرلىگىنە شەك كەلتىرمەيمىن. ءوز ىستەرىنىڭ ماماندارى. ءوز داۋىرىندە ەل نامىسىن قورعاعان تالانتتى فۋتبولشىلار. ايتسە دە، جەرگىلىكتى جاس جەتكىنشەكتەردىڭ جولىن بايلاۋعا بولمايدى دەپ ەسەپتەيمىن.

ءبىرىنشى ليگا مەن ەكىنشى ليگادا مىقتىلارىمىز جوق ەمەس. وندا دا نەگىزگى قۇرامعا جارايتىن ويىنشىلار بار. سول فۋتبولشىلارىمىز نەگە قۇرامعا تارتىلماعان؟! وز جەرىنىڭ نەگىزگى قۇرامىنان ورىن تاپپاعانسىن باسقا كلۋبتارعا اۋىسۋعا ءماجبۇر.

مىسالى، 2018 جىلى ەلامان بەيسەمباەۆ، نۇرجان جەڭىسبەكوۆ، ديدار مارلەنوۆ، شىڭعىسحان كەنجەبەكوۆ، اسىلبەك قاپانوۆتار ناعىز شيىرشىق اتقان شاعىندا كومانداعا شاقىرتۋ الماعاسىن فۋتبولدى مۇلدەم تاستاپ كەتۋگە ءماجبۇر بولدى. 2019 جىلى الىبەك باتىربەكوۆ، سارقىت يمانعازى دا الدىڭعى ارىپتەستەرىنىڭ كەبىن كيدى. بۇل ازاماتتار دا باسقا كوماندالاردىڭ ەسىگىن قاعۋدا. جەلپىلدەپ جەتىسۋدان بارعان ۇلاندارعا وزگە كلۋبتار ەسىگىن اشا قويسا جاقسى، اشپاسا ولار دا فۋتبولدى دوعارادى.

2020 جىلى ەركەبۇلان مۇسابەكوۆ، راحات وتىزباەۆ تالدىقورعاننىڭ كومانداسىنان اۋىسىپ جاتىر. بۇل ەكى ۇزدىگىمىز دە تاباندارىنان تاۋسىلىپ، پانالايتىن كوماندا قاراپ ءجۇر. تالانتتاردى تارتىپ، تالابىن ۇشتاي الماساق، قىرۋار قارجى جۇمساپ، كوماندا جاساقتاۋدىڭ قاجەتى قانشا؟ ودان دا سول قاراجاتتى باسقا سالاعا سالۋ كەرەك شىعار؟ ەگەر ءوز جەرلەستەرىمىزدى ءوزىمىز جارىلقاماساق، وزگە كلۋبتار قۇشاعىن اشا قويادى دەگەنگە سەنە قويۋ قيىن.

مۇنى جالعىز مەنىڭ عانا ەمەس، كۇللى جەتىسۋلىق جانكۇيەردىڭ كوكەيىندە جۇرگەن ساۋال دەپ ۇعۋ قاجەت. ءيا، ءبىر كەزدەرى «جەتىسۋ» كلۋبىنىڭ كورسەتكىشى تىم تومەندەپ كەتكەن بولاتىن. قارجىلىق داعدارىستاردى دا كورىپ، قۇرامىنا كوپ رەتتە ورتاڭقول ويىنشىلار جيناقتالعان كەز بولدى. ءبىر مارتە پرەمەر-ليگا ساپىنان دا ءتۇسىپ قالدى.

جالعىز وگاي كەلىپ كوتەردى دەۋگە بولماس. اماندىق عابباسۇلى ۇلكەن قولداۋ ءبىلدىرىپ، قارجى ماسەلەسىن شەشىپ، جەر باۋىرلاپ جاتقان كلۋبتىڭ تامىرىنا قايتا قان جۇگىرتتى. بۇگىندە 3 ملرد.تەڭگەگە جۋىق قاراجاتى بار. بىراق قارجى ءبولىندى دەگەن وسى ەكەن دەپ وزگە ەلدەن كەلگەن ويىنشىنىڭ قالتاسىن تولتىرۋعا نەگىز جوق. مىسالعا، ءبىرىنشى مەن ەكىنشى ليگانىڭ تەڭ جارتىسى وزگە ءوڭىردىڭ ويىنشىلارى. ولار كلۋبتىڭ نەگىزگى بازاسىندا ورنالاسقان. ال نەگىزگى قۇرام «سالتانات سارايى» دەگەن قوناقۇيدە تۇرىپ جاتىر.

بۇل - قاراجاتتى بەكەرگە شاشۋ. مەنىڭشە، ءبىرىنشى مەن ەكىنشى ليگانىڭ ويىنشىلارى تولىقتاي وبلىس ويىنشىلارىنان قۇرالۋ كەرەك. سوندا ولار ءوز ۇيلەرىنەن كەلىپ، جاتتىعۋ مەن ويىنداردى  وتكىزىپ تۇرادى. ال نەگىزگى قۇرامنىڭ كلۋب بازاسىندا تۇرعانى ءجون. سوندا قارجى ۇنەمدەلەدى.

ءيا، قارجى ۇنەمدەۋ مەنىڭ مىندەتىم ەمەس شىعار. وعان جاۋاپ بەرەتىن باسشىلىق بار. تەك جەرگىلىكتى جەردىڭ ويىنشىلارى سىرت قالىپ جاتىر. باس باپكەر مەن سپورتتىق ديرەكتور وسىعان كوڭىل بولسە دەيمىن. تىزگىن قولدا، قالاي تارتسام دا ءوز ەركىم دەگەندى قويعان ءجون. ال ءسىز نە دەيسىز، جەتىسۋلىق جانكۇيەر؟

ريشاد تۇرعانباەۆ

Abai.kz

7 پىكىر