جاساندى ينتەللەكتىنى قولدانۋدان ەكونوميكالىق تيىمدىلىك 25 ملرد اقش دوللارىنا جەتۋى مۇمكىن. بۇل تۋرالى قر ۇكىمەت باسشىسى اسقار مامين الماتىدا ءوتىپ جاتقان ەۋرازيالىق ەكونوميكالىق وداق ەلدەرىنىڭ ۇكىمەتارالىق كەڭەستىڭ وتىرىسىندا ايتتى. 

پرەمەر-مينيستر بۇگىندە تسيفرلىق تەحنولوگيالاردىڭ قارىشتاپ دامۋى الەمدىك ەكونوميكاعا ەداۋىر ىقپال ەتىپ جاتقانىن ايتتى.

ونىڭ ىشىندە بولاشاقتا شەشۋشى ءرول اتقاراتىن جاساندى ينتەللەكتىنى دامىتۋعا باسا ءمان بەرىلۋدە.

اسقار ءماميننىڭ ايتۋىنشا، جاساندى ينتەللەكتىنى قولدانۋدان ەكونوميكانىڭ ءار سالاسىنا تۇسەتىن قوسىمشا قۇن 2030 جىلعا تامان 5 ترلن اقش دوللارىنا جەتۋى مۇمكىن.

-ۇزاق مەرزىمدى ماقساتىمىزدى ورىنداۋ جولىندا 2050 جىلعا تامان الەمنىڭ دامىعان 30 ەلىنىڭ قاتارىنا ەنۋ ءۇشىن جىل سايىن ەكونوميكانىڭ ءوسىمىن 5-6 پايىزعا كوتەرىپ وتىرۋدى كوزدەپ وتىرمىز. بۇل كورسەتكىشكە ەڭبەك ونىمدىلىگىن ارتتىرۋ كوپ ىقپال ەتۋى ءتيىس. وسى جەردە جاساندى ينتەللەكتىنىڭ الەۋەتى زور. قازاقستاندا جاساندى ينتەللەكتىنى دامىتۋدان ەكونوميكانىڭ سالالارىندا ەكونوميكالىق تيىمدىلىك جىلىنا 25 ملرد دوللارعا جەتۋى ءتيىس،- دەدى اسقار مامين.

ونىڭ ايتۋىنشا، ەڭ جاقسى ءوسىم كورسەتكىشتەرى قىزمەت كورسەتۋ سالاسىندا - 15 ملرد دوللارعا، تاۋ-كەن وندىرىسىندە 9 ملرد دوللارعا جەتۋى ءتيىس.

ايتا كەتۋ كەرەك، الماتىدا «جاھاندىق ەكونوميكانىڭ تسيفرلىق بولاشاعى» فورۋمى ءوتىپ جاتىر.

بۇل شاراعا ارمەنيا، بەلارۋس، قازاقستان، قىرعىز رەسپۋبليكاسى، رەسەي فەدەراتسياسىنىڭ، مولدوۆا ۇكىمەتىنىڭ باسشىلارى مەن پرەمەر-مينيسترلەرى قاتىسىپ جاتىر.

ماڭىزدى كەزدەسۋدە كۇن تارتىبىنە 12 ماسەلە قويىلعان.

Abai.kz