زەلەنسكي كەلىسسوزدەردەن كەيىن وتكىزگەن ءباسپاسوز ءماسليحاتىندا ەكىجاقتى قارىم-قاتىناستان بولەك رەسەيدىڭ قىرىمدى اننەكسيالاۋى مەن دونباسستاعى جانجالدى تالقىلاعانىن جەتكىزدى. ۋكراين ليدەرى بۇل ماسەلەدە كيەۆ ۇستانىمىن قولداعانى ءۇشىن انكاراعا ريزاشىلىعىن جەتكىزدى.

زەلەنسكيدىڭ ايتۋىنشا، تۇركيا رەسەيدە قامالىپ وتىرعان ۋكراين ازاماتتارىن، ونىڭ ىشىندە قىرىم تاتارلارىن بوساتۋعا كومەكتەسەتىنىن جەتكىزگەن.

ءوز كەزەگىندە ەردوعان تۇركيا قىرىمدى رەسەيدىكى دەپ ەسەپتەمەيتىنىن، ماسكەۋدىڭ تۇبەكتى ارەكەتىن اننەكسيا دەپ باعالايتىنىن مالىمدەدى.

ەردوعاننىڭ بۇل ساپارى سيرياداعى وقيعالارعا بايلانىستى تۇركيا مەن رەسەي بايلانىسى ۋشىعىپ تۇرعانمەن تۇسپا-تۇس كەلدى. وتكەن اپتادا تۇرىك بيلىگى رەسەي قولداعان سيريانىڭ ۇكىمەتتىك كۇشتەرى يدليبتەگى قارۋلى وپپوزيتسياعا شابۋىل جاساعانىن، ماسكەۋدىڭ ونى توقتاتپاعانىن جەتكىزگەن. وسىدان كەيىن ەردوعان تۇركيا قارسى جاۋاپ بەرۋگە دايىن ەكەنىن ەسكەرتكەن.

رەسەي 2014 جىلى قىرىمدى باسىپ العان. حالىقارالىق قاۋىمداستىق تۇبەك ۋكراينانىڭ اۋماعى دەپ ەسەپتەيدى. بۇدان بولەك ماسكەۋ ۋكراينا شىعىسىنداعى قارۋلى قاقتىعىستا سەپاراتيستەرگە قولداۋ كورسەتىپ كەلەدى. 2014 جىلدىڭ ءساۋىر ايىنان بەرى قاقتىعىستان 13 مىڭنان استام ادام قازا تاپقان.

Abai.kz