دۇيسەنبى كۇنى، 10 اقپاندا قورداي اۋدانىنىڭ اۋقاتتى اۋىلىندا قر پرەمەر-ءمينيسترىنىڭ ورىنباسارى بەردىبەك ساپارباەۆ باستاعان ۇكىمەت كوميسسياسى قورداي اۋدانىنىڭ قاراكەمەر، ماسانچي، اۋقاتتى، سورتوبە، بۇلان باتىر اۋىلدارىنىڭ اقساقالدارىمەن كەزدەسۋ وتكىزدى. 

جيىنعا وبلىس اكىمى اسقار مىرزاحمەتوۆ، اۋىل اقساقالدارى، بەدەلدى تۇرعىندار، ارداگەرلەر كەڭەستەرىنىڭ توراعالارى، ورتالىق مەملەكەتتىك ورگانداردىڭ باسشىلارى، پارلامەنت دەپۋتاتتارى قاتىستى.

كەزدەسۋدە پروبلەمالىق ماسەلەلەردى شەشۋ جولدارى، قوعامدا كەلىسىم مەن بىرلىكتى ساقتاۋ تالقىلاندى. اقساقالدار جاستارمەن رۋحاني تاربيە جۇمىستارىندا كەمشىلىكتەر بار دەگەن توقتامعا كەلدى، وسىنىڭ سالدارىنان تۇرمىستىق كيكىلجىڭ بارشا جۇرتقا جاريا بولعان وقيعاعا اينالدى.

اقساقالدار اتالعان ەلدى مەكەندەردى قامتيتىن بىرلەسكەن اقساقالدار كەڭەسىن قۇرۋ تۋرالى كەلىسىمگە كەلدى. بۇل اۋىلدارداعى تۇرمىستىق پروبلەمالاردى اۋىل اقساقالدارى ورتاق كەڭەستە شەشەتىن بولادى. ولار جاستارمەن تاربيە جۇمىستارىن جۇرگىزىپ، قورداي اۋدانىندا تۇراتىن بارلىق ۇلتتاردىڭ اراسىندا بىرلىك رۋحىن نىعايتۋ ءۇشىن بىرلەسكەن مادەني-سپورتتىق سيپاتتاعى ويىن-ساۋىق شارالارىن ۇيىمداستىرۋ مىندەتتەمەلەرىن الدى.

«ءبىز بالا كەزدەن دوسپىز، بىرگە وستىك، بىرگە جۇمىس ىستەدىك، قايعىدا دا، تويدا دا بىرگە جۇرەمىز. جاستار ءبىر-بىرىمەن ارالاسۋى كەرەك، سوندا ولار ءبىر-بىرىنە جاقىنداي تۇسەدى. ءبىز 11 اقپاندا سورتوبەدە باس قوسۋعا كەلىستىك. ءبىز ءوز اقساقالدارىمىزدى، ولار وزدەرىنىڭ اقساقالدارىن الىپ كەلەدى. الداعى ۋاقىتتا قايتالانباۋى ءۇشىن تۋىنداعان بارلىق ماسەلەلەردى تالقىلايمىز», — دەدى قوعام قايراتكەرى، اۋداندىق ارداگەرلەر كەڭەسىنىڭ توراعاسى ابدىبەك سەيىلحانوۆ.

ماسانچي اۋىلىنىڭ تۇرعىنى لۋ يسحار دا قوعامدا بىرلىكتىڭ ساقتالۋىنا قاتىستى ءوز ويىن جەتكىزدى.

«ۇستەل باسىندا باس قوسىپ، ماسەلەگە نۇكتە قويۋ ءۇشىن بارلىق قۇرمەتتى اقساقالدار جينالادى. ارعى كۇنى ماسانچيدە مەشىتتە باس قوسامىز. نەلىكتەن مەشىتتە؟ ءبىز بارلىعىمىز مۇسىلمانبىز، دوستىقتى نىعايتىپ، قۇران وقىپ، وسىنداي جاعدايلار قايتالانباۋى ءۇشىن باتا بەرۋ ءۇشىن مەشىتتە جينالامىز. ءجۇز قىرىق جىلداي بىرگە تاتۋ ءومىر ءسۇرىپ جاتىرمىز، ادامدىق قاسيەتتەرى جوقتاردىڭ كەسىرىنەن وسىنداي جاعداي ورىن الدى. بۇل ءبىز ءۇشىن وتە ايىپتى جاعداي بولدى. ءبىز بۇل ماسەلەلەردىڭ بارلىعىن شەشۋگە تىرىسامىز», —  دەدى ول.

وسى اۋداننان شىققان كاسىپكەرلەر تۋعان ولكەسىن قالپىنا كەلتىرۋ جانە دامىتۋ ءۇشىن قارجىلاي جانە ماتەريالدىق كومەك كورسەتۋگە نيەت ءبىلدىردى.

«مەنى تۋعان اۋىلىمنىڭ جاعدايى اسا تولعاندىرادى. مەن مۇندا بالاباقشا، سپورت كەشەنىن سالدىم. قازىر ساۋىقتىرۋ ورتالىعىن سالىپ جاتىرمىن. بيزنەسمەندەردى وزدەرىنىڭ تۋعان اۋىلدارىن اباتتاندىرۋعا شاقىرامىن. وكىنىشكە وراي، بۇل بۇرىننان بار ماسەلە. اعارتۋشىلىق جۇمىستار جۇرگىزىپ، بىرلەسكەن مادەني-بۇقارالىق شارالار وتكىزىپ، جەرگىلىكتى حالىقتىڭ باسىن بىرىكتىرۋ كەرەك»، — دەدى بيزنەسمەن، قاراكەمەر اۋىلىنىڭ تۋماسى قايرات مولداسەيىتوۆ.

Abai.kz