مەملەكەت باسشىسى قاسىم-جومارت توقاەۆ قورعانىس ءمينيسترى نۇرلان ەرمەكباەۆتى قابىلدادى.

قازاقستان پرەزيدەنتىنە قارۋلى كۇشتەردى قالىپتاستىرۋ جانە دامىتۋ، قورعانىس سالاسىنىڭ شىعىندارىن وڭتايلاندىرۋ جۇمىستارى تۋرالى باياندالدى.

ءمينيستردىڭ ايتۋىنشا، جۇرگىزىلگەن تالداۋ جۇمىستارى مەن شتابتىق-ۇيىمداستىرۋ شارالارى بيىل 10 ميلليارد تەڭگە ۇنەمدەۋگە مۇمكىندىك بەرەدى.

نۇرلان ەرمەكباەۆ قاسىم-جومارت توقاەۆقا ارميانى زاماناۋي قارۋ-جاراقپەن جابدىقتاۋ، اسكەري تەحنيكالاردى جوندەۋ جانە جاڭعىرتۋ جونىندەگى جوسپارى، سونداي-اق، ەلەكتروندى اسكەري كوميسساريات جوباسىن ەنگىزۋ ۇدەرىسى تۋرالى ايتتى.

كەزدەسۋدە ارىس قالاسىندا بولعان توتەنشە جاعدايدىڭ سالدارىن جويۋ جانە وق-ءدارى ساقتاۋ ينفراقۇرىلىمىن جەتىلدىرۋ ءۇشىن جۇرگىزىلگەن جۇمىستارعا باسا ءمان بەرىلدى.

مەملەكەت باسشىسى قورعانىس مينيسترىنە حالىقارالىق اسكەري-تەحنيكالىق ىنتىماقتاستىقتى نىعايتۋ، ارميانى ءتيىمدى ءارى باسەكەگە قابىلەتتى قارۋ-جاراقپەن جابدىقتاۋ، اسكەري ءبىلىم بەرۋ ءىسىنىڭ جانە اسكەري دايىندىق ۇدەرىسىنىڭ ساپاسىن ارتتىرۋ، سونىمەن قاتار، اسكەري پارادقا دايىندىق بارىسى جونىندە بىرقاتار تاپسىرما بەردى.

Abai.kz