قوعام بەلسەندىسى، "دەموكراتيالىق پارتيا" باستاماشىلارىنىڭ ءبىرى جانبولات ماماي اقپاننىڭ 21-نەن 22-سىنە قاراعان ءتۇنى الماتى وبلىسى، قاراساي اۋداندىق سوتىنىڭ شەشىمىمەن 3 تاۋلىككە قامالعان ەدى. كەيىن، جازا مەرزىمى وزگەرتىلىپ، 2 تاۋلىكتەن كەيىن بوساتىلعان.

ال بۇگىن قاراساي اۋداندىق پروباتسيا قىزمەتى شاقىرتىپ، ەسكەرتۋ بەرگەنى بەلگىلى بولدى. وسىعان بايلانىستى ءبىز جانبولات مامايدىڭ وزىنە حابارلاسىپ، ماسەلەنىڭ ءمان-جايىن سۇرادىق...

جانبولات ماماي، قوعام بەلسەندىسى، "دەمپارتيا" ليدەرى:

- 21-ءى كۇنى تۇستەن كەيىن ءبىزدىڭ ۇيىمداستىرۋ كوميتەتىنىڭ مۇشەسى جانبول راحمەتوللانى پوليتسيا ۇستاماق بولدى. مەن بىردەن ول پوليتسيا قىزمەتكەرلەرىنە بارىپ، ولاردىڭ قىزمەتى زاڭسىز ەكەنىن ايتىپ، ولاردىڭ ارەكەتتەرىن ۆيدەوعا ءتۇسىرىپ، بارلىعىن كورسەتكەننەن كەيىن ولار جانبولدى بوساتتى.

كەيىن ءبىز كەشكە قاراي جىگىتتەرمەن جينالىپ، تاماق ىشەتىن ءبىر كافەگە كىرىپ ەدىك، سودان شىعا بەرگەندە 20 شاقتى ادام (پوليتسەي) كەلىپ، جانبولدى سول جەردە الىپ كەتتى. سوسىن، ونىڭ قايدا ەكەنىن ءبىلۋ ءۇشىن الماتى قالالىق پوليتسيا دەپارتامەنتىنە باردىق. ول جاقتا ءبىزدى پوليتسيا قىزمەتكەرلەرى قارسى الدى. پوليتسيا باسقارماسىنىڭ ءبىرىنشى ورىنباسارى "قاراساي اۋداندىق بولىمشەسىنە الىپ كەتتى", دەدى. ول جاقتان، قاراساي اۋداندىق اكىمشىلىك سوتىنا الىپ كەتكەنىن بىلدىك. قاراساي اۋداندىق اكىمشىلىك سوتىنا مەن باردىم. سول مەزەتتە قاراساي اۋداندىق پوليتسيا باسقارماسىنىڭ باسشىسى، ورىنباسارلارى بۇكىل سول جاقتاعى پوليتسيانىڭ باسشىلارى، بارلىعى كەلىپ، مەنى سول جاقتا تۇتقىندادى.

ولار مەنى شامامەن كەشكى 9-داردا ۇستادى. سوسىن ءبىز 11-گە دەيىن پوليتسيا دەپارتامەنتىندە بولدىق. 11-دە قاراساي اۋداندىق سوتىنا الىپ كەتتى. سول سوتتا ءبىز تۇنگى ساعات 3-كە دەيىن بولدىق. تۇنگى ساعات 3-كە دەيىن سوت پروتسەسسى ءجۇردى. اياعىندا سول جەردەگى ۋاقىتشا قاماۋ يزولياتورىنا قامادى.  

سودان مەنى كەشە جىبەردى. باستاپقىدا 3 تاۋلىككە قاماعان. ول نەگىزى بۇگىن كەشكە اياقتالۋى كەرەك ەدى. بىراق، كەشە كەشكە، اياق-استىنان قاراساي اۋداندىق پروكۋرورى الماتى وبلىستىق سوتىنا ارىز جازادى.

ء"بىز ونىڭ كىم ەكەنىن، تاعى ونىڭ بالا-شاعاسى بار ەكەنىن ەسكەرمەپپىز. ونى ءۇش تاۋلىكتەن ەكى تاۋلىككە قىسقارتايىق" دەپ، الماتى وبلىستىق سوتىنا جىبەرەدى. كەشە كەشكە ساعات 6-لار شاماسىندا الماتى وبلىستىق سوتى ۆيدەو بايلانىس ارقىلى سوت وتكىزىپ، جازانى ءۇش تاۋلىكتەن ەكى تاۋلىككە قىسقارتىپ، ەشكىمگە حابارلاماستان، قاراساي اۋداندىق پوليتسيانىڭ باسشىلىعى وزدەرى ۇيگە اكەلىپ تاستادى. ول ەندى ادەيى جاسالعان دەپ ويلايمىن. ويتكەنى، ەگەر بۇگىن بوساتاتىن بولسا، تاعى دا حالىق باراتىن ەدى. سونىڭ الدىن الىپ وتىرعان بولۋى كەرەك. 

بىراق، جانبولدى بوساتقان جوق. ول 15 تاۋلىككە قامالدى. بۇگىن ءبىز  اپپەلياتسيالىق ارىز جازدىق. ەندى سول اپپەلياتسياسىن كۇتەمىز. ءبىر-ەكى كۇندە قارالۋى كەرەك. 

ال كەشەگى ميتينگكە كەلسەك، ماعان قازىر ول جايلى ايتىپ بەردى. ءبىزدىڭ مۇشەلەرىمىزدىڭ كوبى الاڭعا جەتە الماعان. ويتكەنى، پوليتسيا، ومون قىزمەتكەرلەرى الدارىنان توسقان. ءبىزدىڭ پارتيانى قولدايتىن، پارتياعا مۇشە ازاماتتاردىڭ كوبىنىڭ ءۇيىنىڭ الدىندا پوليتسيا تۇردى. ەشكىمدى شىعارعان جوق. شىعىپ كەتكەندەرى الاڭعا جەتە العان جوق. كوپشىلىگىن جولدا ۇستادى. ءبىزدىڭ تاراپىمىزدان وسى الاڭنىڭ وزىندە جانە ونىڭ اينالاسىندا قامالعانداردىڭ سانى 70-تەن استام ادام. ولاردىڭ بارلىعى بوساتىلدى. تەك، تولەگەن جۇكەەۆكە ايىپپۇل سالىندى. 20 اەك.

ءبىز سەزدى كەيىنگە قالدىردىق. جالپى، زاڭ بويىنشا قايتادان باستاماشىل توپتىڭ قاتارىن جيناۋىمىز كەرەك. مىڭ ادام. سول مىڭ ادامنان استام باستاماشىل توپتىڭ ءتىزىمىن قايتادان ادىلەت مينيسترلىگىنە تاپسىرىپ، سەزدى ءبارىبىر وتكىزەمىز. وڭىرلەردەن كەلگەن ازاماتتار بولدى، وسى الماتىداعى ازاماتتار بار، بارلىعى "دەمپارتيانى" ءبارىبىر قۇرۋىمىز كەرەك دەگەن ويدى ايتىپ وتىر. 

Abai.kz