بەيسەنبى, 28 ناۋرىز 2024
46 - ءسوز 3266 0 پىكىر 27 اقپان, 2020 ساعات 12:11

مەكتەپتەگى مەدپۋنكت جۇمىسىنا كوڭىلىڭىز تولا ما؟

2017 جىلدىڭ 1 قاڭتارىنان باستاپ ەلىمىزدەگى مەكتەپتەردەگى مەدپۋنكتتەردىڭ مەديتسينالىق قىزمەتكەرلەرى ءبىلىم بەرۋ جۇيەسىنەن دەنساۋلىق ساقتاۋ جۇيەسىنە بەرىلگەنى ءمالىم.

«دەنساۋلىق» مەملەكەتتىك باعدارلاماسىنا سايكەس ەنگىزىلگەن بۇل وزگەرىستىڭ باستى ماقساتى ءبىلىم الۋشىلارعا كورسەتىلەتىن مەديتسينالىق قىزمەت ساپاسىن جاقسارتۋ بولىپ تابىلادى. الايدا، وسى باعىتتا كەيىنگى ءۇش جىلداي ۋاقىت ىشىندە اتقارىلعان جۇمىس كوپشىلىكتىڭ كوڭىلىنەن شىعىپ وتىر دەۋ قيىن. ءبىز وڭىرلەردە بولعانىمىزدا وسى جونىندە جەرگىلىكتى تۇرعىندار مەن دەنساۋلىق ساقتاۋ قىزمەتكەرلەرى تاراپىنان ورىندى سىن-ەسكەرتپەلەر ايتىلدى.

اتاپ ايتقاندا، دەنساۋلىق ساقتاۋ ءمينيسترىنىڭ 2017 جىلعى
27 اقپانداعى №39 بۇيرىعىنا سايكەس ورتا ءبىلىم بەرۋ ۇيىمدارىنداعى مەديتسينالىق پۋنكتكە 500 ءبىلىم الۋشىعا شاققاندا 1 مەيىرگەر، شاعىن جيىنتىقتالعان مەكتەپتەردىڭ مەديتسينالىق پۋنكتى ءۇشىن 100 ءبىلىم الۋشىعا شاققاندا 1 مەيىرگەر لاۋازىمىن بەلگىلەۋ كوزدەلگەن.

اتالمىش بۇيرىق ەلىمىزدىڭ ورتالىق، سولتۇستىك جانە شىعىس وڭىرلەرىندە قالىپتاسقان دەموگرافيالىق قولايسىز احۋالدى، ياعني ءبىلىم بەرۋ ۇيىمدارىنداعى وقۋشىلاردىڭ سانى كوپ ەمەستىگىن ەسكەرمەي قابىلدانعانعا ۇقسايدى. سونىڭ سالدارىنان، مەكتەپتەردەگى مەديتسينالىق قىزمەتكەرلەردىڭ سانى ەداۋىر ازايعاندىعى بايقالادى. ويتكەنى، بۇرىن مەكتەپتەگى مەديتسينالىق پۋنكتتىڭ مەيىرگەرى وقۋشىلاردىڭ سانىنا قاراماستان، لاۋازىمدىق جالاقىنى تولىق كولەمىندە الاتىن ەدى. ەڭبەككە اقى تولەۋدىڭ جاڭا جۇيەسى ولاردىڭ جالاقىسىنىڭ كەمۋىنە الىپ كەلدى.

مىسال ءۇشىن، پاۆلودار وبلىسىنىڭ 387 مەكتەبىندە 2016-2017 وقۋ جىلىندا 337 مەديتسينالىق قىزمەتكەر تۇراقتى جۇمىس ىستەگەن بولسا، 2018-2019 وقۋ جىلىندا ولاردىڭ سانى 314-كە دەيىن كەمىگەن. كەرىسىنشە، ەلدى مەكەندەردە ورنالاسقان فەلدشەرلىك-اكۋشەرلىك پۋنكتتەردەن جەرگىلىكتى مەكتەپتەرگە كەلىپ، مەديتسينالىق قىزمەت كورسەتەتىن مەديتسينالىق قىزمەتكەرلەر سانى 56-دان 73-كە دەيىن كوبەيگەن.

جەرگىلىكتى اتقارۋشى ورگاندار ءبىلىم بەرۋ مەكەمەلەرى جوعارى قاۋىپتى وبەكتىلەر بولىپ تابىلاتىندىعىنا بايلانىستى، بالالار دەنساۋلىعى ماسەلەلەرىن جۇيەلى باقىلاۋ ءۇشىن ءاربىر ءبىلىم بەرۋ مەكەمەسىندە جەكە مەديتسينالىق قىزمەتكەردىڭ تۇراقتى تۇردە بولۋىن ورىندى سانايدى.

بۇعان قوسا، دەنساۋلىق ساقتاۋ ءمينيسترىنىڭ اتالعان بۇيرىعىندا مەديتسينالىق قىزمەتكەرلەردىڭ ەڭبەگىنە اقى تولەۋدە ادىلدىك قاعيداتى ساقتالماعاندىعىن ايتقان ءجون. ويتكەنى، ءبىلىم بەرۋ ۇيىمدارىنداعى وقۋشىلاردىڭ ءارتۇرلى سانىنا قىزمەت كورسەتكەنىنە قاراماستان، مەديتسينالىق قىزمەتكەرلەر بىردەي جالاقى الىپ ءجۇر. مىسالى، 0,75 مولشەرلەمە الۋ ءۇشىن مەيىرگەر شاعىن جيىنتىقتالعان مەكتەپتە

75 وقۋشىعا، ال ورتا مەكتەپتە – 375 وقۋشىعا قىزمەت كورسەتۋگە ءتيىستى.
وسى ورايدا ەلىمىزدەگى دەنساۋلىق ساقتاۋ ۇيىمدارىندا ورتا بۋىن مەديتسينا ماماندارى جەتىسپەيتىندىگىن دە ەسكەرگەن ءجون. 2020 جىلعى 1 قاڭتارداعى جاعداي بويىنشا مەيىرگەرلەرگە سۇرانىس 2987 بىرلىكتى قۇرادى. ال ەلىمىزدە ورتا بۋىن مەديتسينا كادرلارىن دايارلايتىن مەديتسينالىق كوللەدجدەر سانى – 85. بۇل، ارينە، از ەمەس. ماسەلە ولار دايارلايتىن كادرلاردىڭ ساپاسىندا بولسا كەرەك. ويتكەنى، 8 مەديتسينالىق كوللەدجى بار شىمكەنت قالاسىندا قازىر 36 مەيىرگەر جەتىسپەيتىن بولىپ شىقتى. جەرگىلىكتى دەنساۋلىق ساقتاۋ ماماندارىنىڭ ايتۋىنشا، مەديتسينالىق كوللەدجدى ءبىتىرىپ، ديپلوم الىپ شىقسا دا، ناۋقاسقا ءدارى ەگۋدى بىلمەيتىن شالا مامانداردى دەنساۋلىق ساقتاۋ ۇيىمدارى جۇمىسقا العىلارى كەلمەيدى.

وسى ماسەلەگە ورا پرەمەر-ءمينيستردىڭ ورىنباسارى ەرالى توعجانوۆقا دەپۋتاتتىق ساۋال جولداپ، مىناداي ۇسىنىستاردى ەنگىزدىم:
1.دەنساۋلىق ساقتاۋ ءمينيسترىنىڭ جوعارىدا كورسەتىلگەن بۇيرىعىن قايتا قاراپ، ورتا مەكتەپتەردەگى ءبىلىم الۋشىلاردىڭ سانىنا قاراماستان، ولارداعى مەديتسينالىق پۋنكتتەردىڭ ارقايسىسىنا كەمىندە 1 مەيىرگەر لاۋازىمىن بەلگىلەۋ كەرەك;

2.ەلىمىزدەگى ورتا بۋىن مەديتسينالىق كادرلار تاپشىلىعىن ەسكەرە وتىرىپ، مەديتسينالىق كوللەدجدەردە دايارلاناتىن مەديتسينا كادرلارىنىڭ سانى مەن ساپاسىن ارتتىرۋ ماسەلەسىن قاراۋ قاجەت.

كارىباي مۇسىرماننىڭ الەۋمەتتىك جەلىدەگى جازباسىنان

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1559
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2250
عيبىرات

قايسار رۋحتى عازيز جان

مۇحتار قۇل-مۇحاممەد 3500