بيىل قوستاناي وبلىسىندا 50 مىڭ اۆتوكولىك نارىققا شىعارىلماق. ماماندار مۇنى وتاندىق ونىمگە دەگەن سۇرانىستىڭ ارتقانى دەپ وتىر. «قازاقپارات» ءتىلشىسى جەرگىلىكتى اۆتوزاۋىتقا بارىپ، كولىك شىعارۋ ىسىمەن ەتەنە تانىسىپ قايقان بولاتىن.

قازاقستاننىڭ اۆتوموبيل ونەركاسىبىنىڭ تاريحى جول تالعامايتىن «نيۆا» جەڭىل كولىك قۇراستىرۋدان باستاۋ العان. مۇنان كەيىن ەلىمىزدە «سارىارقااۆتوپروم»، «سەماز»، «كاماز-ينجينيرينگ»، «Hyundai Trans Auto»، «Daewoo Bus Kazakhstan» سەكىلدى اۆتوكولىك قۇراستىرۋ كاسىپورىندارى ساپقا قوسىلدى. وسى كاسىپورىندار جۇمىسىنىڭ ناتيجەسىندە ەلىمىزدە اۆتوونەركاسىپ سالاسى پايدا بولدى. جىلدان جىلعا جەتىلىپ، قارقىندى دامىپ كەلە جاتقان قوستاناي وبلىسى كولىك شىعارۋدىڭ زاماناۋي تەتىكتەرىنە كوشكەن. جاڭا يندۋستريالاندىرۋدىڭ ءبىرىنشى بەس جىلدىعىنىڭ قورىتىندىسىندا اۆتوموبيل ءوندىرىسى وڭدەۋ ونەركاسىبىندەگى ەڭ قارقىندى دامۋشى سالا رەتىندە تانىتتى. «سارىارقااۆتوپروم» زاۋىتى الەمدىك برەند سانالاتىن كولىكتەردىڭ 10 شاقتى ءتۇرىن قۇراستىرادى.

قايناعان قىزۋ تىرلىكتىڭ ورتاسىندا دانەكەرلەۋ مەن سىرلاۋ تسەحىنىڭ توبى جۇرەدى. زاۋىت ديرەكتورى سىرىم سەمەيباەۆتىڭ سوزىنشە، زاۋىت العاشقى اشىلعاندا تەك دايىن بولشەكتەر قۇراستىرىلاتىن. قازىر ءونىمنىڭ وتاندىق ۇلەسى ارتقان.

«ءوندىرىس اۋقىمى دا ەسەلەپ ءوسىپ كەلەدى. بىلتىر 25 مىڭ كولىك قۇراستىرسا، بيىل جەلىدەن شىعاتىن كولىك سانىن 50 مىڭعا دەيىن جەتكىزۋ جوسپارلانىپ وتىر. ءوندىرىستىڭ ارتۋى تىكەلەي سۇرانىسقا بايلانىستى»، - دەدى سىرىم سەمەيباەۆ.

داۋلەت نىسانباەۆ – دانەكەرلەۋ تسەحىنىڭ بريگاديرى. قول استىندا 10 جۇمىسكەر بار.

«ءبىز ءونىمنىڭ نەگىزگى جۇمىسىنا جاۋاپتىمىز. اۆتوماشينانىڭ كابيناسىن قۇراستىرىپ، كەلەسى تسەحقا دايىندايمىز. ولار بوياپ، شاناقتارىن ىلەدى»، - دەيدى تسەح بريگاديرى.

جالپى ءبىر اۆتوكولىكتى قۇراستىرۋعا ءبىر-ەكى تاۋلىك ۋاقىت كەتەدى. ماسەلەن، ءبىر عانا JAC ماركالى اۆتوكولىك ۇساق توراپ تاسىلىمەن وندىرىلەدى. بۇل ءتاسىلدىڭ ءوزى ىشىنەن بىرنەشە بولىككە جىكتەلەدى.

«ەڭ اۋەلى كۋزوۆ بولىگىن ولشەيمىز. كەيىن ەسىگىن تاڭداپ، مولشەرىن ەسەپتەيمىز. مۇنان سوڭ دايىن بولشەكتەردى دانەكەرلەۋ جۇمىستارى باستالادى. ۇساق-تۇيەك جۇمىس بولىپ كورىنگەنىمەن، اسا جاۋاپكەرشىلىكپەن قاراۋدى تالاپ ەتەدى. سىرلاپ، بوياۋ جاققان سوڭ شاناقتارىن بىرىكتىرىپ، ءىرى بولشەكتەرىن جالعايمىز. ۇساق توراپتى ادىسپەن كولىك قۇراۋ شامامەن وسىلاي جۇرەدى. ءبىر تاۋلىك ىشىندە 15-16 كولىكتىڭ قورابىن دايىندايمىز»، - دەپ ءتۇسىندىردى داۋلەت نىسانباەۆ.

تسەح بريگاديرىنىڭ زاۋىتتا جۇرگەنىنە 6 جىل. جۇمىسىن دانەكەرلەۋشى مامان بولىپ باستاعان. كورسەتكىشتەرى ەلەنىپ، تسەح باسشىلىعىنا دەيىن كوتەرىلدى. باستاپقىدا وزگە دە جەرگىلىكتى ماماندارمەن بىرگە قىتايداعى زاۋىتقا بارىپ تاجىريبە جيناپ قايتقان. داۋلەت نىسانباەۆتان قىتاي ساپارى تۋرالى سۇرادىق.

«كاسىبىمنىڭ نەگىزى قوستاناي وبلىسىندا قالاندى. قالعانى تەك تاجىريبە جيناۋ عوي. ول جاقتا وزىمە كەرەكتىنى ۇيرەندىم. بىراق جەرگىلىكتى زاۋىتتىڭ دايىنداۋ جۇيەسى ۇنايدى. جۇمىسقا تۇرعان سوڭ كاسىبىڭدى ارتتىرىپ، شىڭدالۋعا مۇمكىندىك بولادى. اۋەلى تەوريانى ۇيرەنەسىڭ، تاجىريبەلىك جۇمىستار ءبىرشاما ۋاقىتتان سوڭ بەرىلەدى. ابدەن مەڭگەرىپ العان سوڭ كولىك قۇراستىرۋعا كىرىسۋگە بولادى. قازىر شەتەلدەن ماماندار كەلىپ، ۇيرەتىپ داتىر عوي. ولار كوبىنە تەحنولوگيا پروتسەسىنە اسا ءمان بەرەدى»، - دەدى د.نىسانباەۆ جۇمىسى تۋرالى.

سونىمەن، قوستاناي وبلىسىنداعى اۆتوزاۋىتتىڭ بۇگىنگى تىنىسى وسى. قازىر قوستانايلىقتار ازەربايجان، رەسەي، تاجىكستان، وزبەكستان ەلدەرىنىڭ نارىعىنا شىققان. مەملەكەتتىك قولداۋدىڭ ارقاسىندا بۇگىندە وتاندىق اۆتوكولىكتەردىڭ ەكسپورتتىق الەۋەتى جوعارى. ەندىگى مەجە – جىل سوڭىنا دەيىن 50 مىڭ اۆتوكولىك قۇراستىرۋ.

Abai.kz