مەملەكەت باسشىسى ەۋروپالىق قايتا قۇرۋ جانە دامۋ بانكىنىڭ پرەزيدەنتىن قابىلدادى
مەملەكەت باسشىسى قاسىم-جومارت توقاەۆ ەۋروپالىق قايتا قۇرۋ جانە دامۋ بانكىنىڭ پرەزيدەنتى سۋما چاكرابارتيدى قابىلدادى.
كەزدەسۋدە قاسىم-جومارت توقاەۆ پەن سۋما چاكرابارتي قازاقستان مەن ەۋروپالىق قايتا قۇرۋ جانە دامۋ بانكى اراسىنداعى قاتىناستاردىڭ قازىرگى احۋالى مەن ىنتىماقتاستىقتىڭ الداعى پەرسپەكتيۆالارىن، ونىڭ ىشىندە بىرلەسكەن ينۆەستيتسيالىق جوبالاردىڭ جۇزەگە اسىرىلۋ بارىسىن تالقىلادى.
تاراپتار كوروناۆيرۋس ىندەتىنىڭ تەرىس اسەرى جاعدايىنداعى الەمدىك ەكونوميكانىڭ دامۋى تۋرالى پىكىر الماستى.
سۋما چاكرابارتي قاسىم-جومارت توقاەۆتى قازاقستان پرەزيدەنتى قىزمەتىنە كىرىسكەنىنە ءبىر جىل تولۋىمەن قۇتتىقتاپ، وسى ارالىقتا ەلىمىزدە اتقارىلعان ساياسي جانە ەكونوميكالىق رەفورمالارعا، اسىرەسە، «حالىق ۇنىنە قۇلاق اساتىن مەملەكەت» تۇجىرىمداماسىنا جوعارى باعا بەردى.
– لوندونداعى باس وفيسىمىزدەگى كوماندا مەن قازاقستانداعى وكىلدىكتىڭ پىكىرىنشە، ءسىزدىڭ ءبىلىمىڭىز بەن حالىقارالىق قاتىناستارداعى مول تاجىريبەڭىز ەلىڭىزدىڭ دامۋىنا ەلەۋلى ۇلەس قوسادى. ءبىز ءسىزدىڭ بارلىق باستامالارىڭىزدى قولدايمىز، پرەزيدەنت رەتىندە ءبىر جىلدا اتقارعان تابىستى جۇمىستارىڭىزعا ريزاشىلىق بىلدىرەمىز، – دەدى ەۋروپالىق قايتا قۇرۋ جانە دامۋ بانكىنىڭ باسشىسى.
Abai.kz
