قازاقستاندىق «Steppe & WORLD Publishing» باسپاسى بەلگيالىق جازۋشى، اقىن ەلەن دەلفورج جازعان، ال ونىڭ وتانداسى، سۋرەتشى كۆەنتين گرەبان يلليۋستراتسيالارىن سالعان «ماما» كىتابىن تۇڭعىش رەت قازاق تىلىنە اۋدارىپ، وقىرماندارعا ۇسىنىپ وتىر. 

«Steppe & WORLD Publishing» باسپاسىنىڭ باسشىسى رايسا سايرانقىزى قادىر بۇل ەڭبەكتىڭ ەۋروپالىق كىتاپ كورمەلەرىندە ۇلكەن جاڭالىق بولىپ، حالىقتىڭ زور قىزىعۋشىلىعىن تۋدىرعانىن اتاپ ءوتتى. 

«بۇل كىتاپتا ءار داۋىردەگى، ءار كونتينەنتتەگى انا تاعدىرىنىڭ قۋانىشى مەن قايعىسى ولەڭ تۇرىندە سۋرەتتەلگەن. اۆتور انا ماحابباتىنىڭ قانشالىقتى تەرەڭ ەكەندىگىن كورسەتەدى. قازىر «ماما» ولەڭمەن جازىلعان زاماناۋي كىتاپتار اراسىندا ەڭ تانىمال شىعارمالار قاتارىنا كىرەدى»، - دەيدى رايسا سايرانقىزى. 

«ماما» كىتابىن قازاق تىلىنە زاۋرە جانە ساۋلە باتاەۆالار اۋدارعان. 

«اۋدارما كەزىندە ءماتىننىڭ تۇپنۇسقاعا بارىنشا سايكەس بولۋىنا باسا نازار اۋداردىق. ولەڭدەر فرانتسۋز تىلىندە جازىلعاندىقتان، ولار ءار مادەنيەتكە ءتان ۇلتتىق قۇندىلىقتار مەن ۇلتتىق دىلگە تۇنىپ تۇرعان قازىنا بولىپ شىقتى. اۋدارماشى رەتىندە بىزگە، ارينە، ەڭ باستى قيىندىق ۇلتتىق ۇعىمداردى قازاق تىلىنە اۋدارعان كەزدە ولاردىڭ مادەني ەرەكشەلىكتەرىن ساقتاي وتىرىپ، قازاق حالقى ءۇشىن اسا قاسيەتتى بولىپ سانالاتىن انا دەگەن اسىل بەينەنى قالاي دا وقىرمانعا جەتكىزۋ بولدى»، - دەيدى اۋدارماشىلار. 

رايسا سايرانقىزىنىڭ ايتۋىنشا، «ماما» 2018 جىلى جارىق كورىپ، الەمنىڭ 25 تىلىنە اۋدارىلعان. 

«بۇل جىر جيناعى تەك تاماشا شۋماقتارىمەن عانا ەمەس، بەلگيالىق اۆتور كۆەنتين گرەباننىڭ 32 اكۆارەل سۋرەتىمەن دە ءتانتى ەتەدى»، - دەپ اتاپ ءوتتى باسپا وكىلى. 

ال اۆتور ەلەن دەلفورجدىڭ ءوزى كىتابىنىڭ قازاق تىلىندە جارىق كورۋىنە وراي وقىرماندارعا ارنايى حات جولداعان. 

«ماما» اتتى جىر كىتابىنىڭ قازاق تىلىندە باسىلىپ شىققانىن كورەمىن دەگەن ويدىڭ ءوزى مەنى شەكسىز قۋانتادى! بۇل ماتىندەردىڭ، ءوز سوزدەرىمنىڭ ءارتۇرلى تىلدەرگە اۋدارىلىپ، جاڭا دىبىستار مەن جاڭا اۋەنگە يە بولىپ جاتقانى – مەن ءۇشىن كەرەمەت سىيلىق. انا تۋرالى جىرلارىمنىڭ قازاق تىلىندەگى «سازىن» ەستۋگە اسىقپىن. ەڭبەگىمدى ءوز سوزىمەن بايىتقان اۋدارماشىعا جانە كوپ ىشىنەن ءبىزدى تاڭداپ، ءوز قورجىنىنا قوسقان باسپاگەرگە مىڭ دا ءبىر العىس!» - دەيدى بەلگيالىق اقىن. 

قوسىمشا اقپارات: 

«Steppe & WORLD Publishing» باسپاسى بالالارعا ارنالعان جۋليا دونالدسوننىڭ «اقىن قويان»، «گرۋففالو»، ەريك كارلدىڭ «قوماعاي جۇلدىزقۇرت»، سونداي-اق «اننا فرانكتىڭ كۇندەلىگى» سەكىلدى كىتاپتاردى قازاق تىلىنە اۋدارىپ، شىعارعان. 2020 جىلى باسپا جوان ءروۋليڭتىڭ «ءحارري پوتتەر مەن ءپالساپا تاس» كىتابىن ۇسىندى. قازىر «ءحارري پوتتەر» سەرياسىنا كىرەتىن قالعان التى كىتاپ اۋدارىلىپ جاتىر.  

Abai.kz