بۇگىن وبلىس اكىمى اماندىق باتالوۆتىڭ توراعالىعىمەن ايماقتا قۇرىلعان داعدارىسقا قارسى ۆەدومستۆوارالىق جەدەل شتابتىڭ ءبىرىنشى وتىرىسى ءوتتى. جيىندا ەل ۇكىمەتىنىڭ داعدارىسقا قارسى ءىس-شارالار جوسپارىن وڭىردە جۇزەگە اسىرۋدىڭ نەگىزگى باعىتتارى ايقىندالدى.

اماندىق باتالوۆ جيىندا داعدارىسقا قارسى شارالار قابىلداۋ مەن ولاردى جۇزەگە اسىرۋدى ەلباسى مەن پرەزيدەنت ءوز باقىلاۋلارىنا العانىن اتاپ ءوتتى. ۇكىمەتتە ارنايى شتاب قۇرىلىپ، ونىڭ ءىس-شارالار جوسپارى ازىرلەنگەنىن ايتتى. سوعان وراي وراي وبلىستا دا وسىنداي شتاب جۇمىس ىستەيتىن بولادى. جانە اماندىق باتالوۆتىڭ تاپسىرماسىمەن الداعى ەكى كۇندە ونىڭ ءىس-جوسپارى ايقىندالماق.

شتاب جۇمىسىن وبلىس اكىمى اماندىق باتالوۆ باسقارادى. جۇمىس توبىنىڭ قۇرامىنا وبلىس اكىمىنىڭ ورىنباسارلارى، وبلىستىق باسقارما، دەپارتامەنت باسشىلارى، اۋدان، قالا اكىمدەرى، «جەتىسۋ» اكك باسشىلىعى جانە ت.ب. ەنگىزىلدى.

وبلىس اكىمى ءوز سوزىندە وسى باعىتتاعى باستى شارالار رەتىندە الەۋمەتتىك ماڭىزى بار ازىق-تۇلىك باعاسىنىڭ وسۋىنە جول بەرمەۋ ءۇشىن تۇراقتاندىرۋ قورىنىڭ جۇمىسىن جانداندىرۋ، تاۋارلار، قىزمەتتەر، تاريفتەر مەن كوممۋنالدىق قىزمەتتەر باعاسىن باقىلاۋ، ەڭبەك نارىعىندا تۇراقتىلىقتى ساقتاۋ جانە جاعدايدى مونيتورينگىلەپ وتىرۋ، «ەڭبەك» باعدارلاماسى بويىنشا اۋىل تۇرعىندارىنا نەسيە بەرۋدى جالعاستىرۋ، ەڭبەك قاتىناستارىن قورعاۋ ماقساتىندا ورتا جانە ءىرى كاسىپورىندارمەن مەموراندۋمدارعا وتىرۋ، جالاقى قارىزدارىن بولدىرماۋ كەرەكتىگىن قاتاڭ ەسكەرتتى. سول سياقتى كوكتەمگى دالا جۇمىستارىن ۋاقىتىلى باستاۋدى، ازىق-تۇلىك قاۋىپسىزدىگىن، نارىقتى اۋىل شارۋاشىلىعى ونىمدەرىنىڭ قاجەتتى كولەمىمەن قامتاماسىز ەتۋدى دە باستى نازاردا ۇستاۋى كەرەكتىگىن تاپسىردى. ءوز كەزەگىندە «دامۋ» قورىمەن بىرلەسىپ شاعىن جانە ورتا بيزنەس سۋبەكتىلەرىنە نەسيە بەرۋدى قوسىمشا قارجىلاندىرۋ جايىن دا قاراستىرعان ءجون. وبلىستاعى ءىرى كاسىپورىندار ءوز جاعدايلارىنىڭ دامۋىنا قاتىستى بولجامدى نۇسقالار جاساۋى ءتيىس. قازاقستاندىق مازمۇندى ۇلعايتۋعا ەرەكشە كوڭىل ءبولىنۋى كەرەك.

سونىمەن قاتار ا.باتالوۆ يميدجدىك شارالاردى وتكىزۋگە باعىتتالعان شىعىنداردى جانە بيۋدجەتتىڭ باسىمدىق بەرىلمەيتىن شىعىندارىن قىسقارتۋ، كولىك، جيھاز ساتىپ الۋدى توقتاتۋ قاجەتتىگىن دە ايتتى. وبلىس اۋماعىندا كورونوۆيرۋس ينفەكتسياسىنىڭ تۋىنداۋى مەن تارالۋىنا جول بەرمەۋدى باستى مىنتەت رەتىندە اتاپ ءوتتى.

- مەملەكەت باسشىسى ەڭ الدىمەن حالىقتىڭ الدىنداعى الەۋمەتتىك مىندەتتەمەلەردىڭ ورىندالۋىن قامتاماسىز ەتۋدى قاتاڭ تاپسىردى. وعان بىزدە قارجى تولىق كولەمدە قاراستىرىلعان. قاجەت بولسا، ماڭىزدى ەمەس شىعىنداردى قىسقارتۋ ەسەبىنەن بۇل قارجى كولەمىن ارتتىرا الامىز. بيىلعى جىلى 46 مىڭنان استام جۇمىس ورنىن قۇرۋدى جوسپارلاپ وتىرمىز. وعان قوسا ءبىز ەڭبەك نارىعىنىڭ قاجەتتىلىگىن زەرتتەپ ءبىلىپ وتىرۋىمىز كەرەك، جانە سوعان قاراي كادرلاردى قايتا وقىتىپ، جۇمىسقا ورنالاستىرۋعا ءتيىسپىز. وبلىستا جۇزەگە اسىرىلىپ جاتقان ءىرى-ءىرى جوبالار بار، سولارعا قاجەتتى ماماندىقتاردى ايقىنداپ، ازاماتتاردى تۇراقتى جۇمىس ورىندارىمەن قامتۋدى بەلسەندى اتقارۋىمىز كەرەك. دۇرلىگۋدىڭ قاجەتى جوق، بۇرىن قالاي جۇمىس ىستەسەك، ءدال سولاي جۇمىس جاسايمىز، تەك قوعامدىق-ساياسي تۇراقتىلىقتى باقىلاۋ، باعانى مونيتورينگىلەۋ سياقتى ماڭىزدى جۇمىستاردىڭ قارقىنىن كۇشەيتۋىمىز كەرەك. بۇل وبلىسقا عانا ەمەس، بارلىق اۋدان، قالالارعا دا قاتىستى، - دەدى ا. باتالوۆ.

Abai.kz