"قوردايداعى وقيعا بويىنشا بەس ادام ۇستالدى. بۇزاقىلىق، قارت ادامدى ۇرىپ-سوعۋ جانە پوليتسەيگە باعىنباۋ ءىسى بويىنشا ۇستالعان. بۇل اقپارات قۇرالدارىندا كەڭىنەن قامتىلدى. ورتەۋ، ادام ءولتىرۋ فاكتىلەرى بويىنشا تەرگەۋ جالعاسىپ جاتىر. ازىرگە ەشكىم ۇستالعان جوق. سەبەبى وندا ماتەريال كوپ" دەدى دەمباەۆ 11 ناۋرىزدا.
ونىڭ ايتۋىنشا "بارلىق ۆيدەوماتەريالدار زەرتتەلگەننەن كەيىن شەشىم قابىلدانادى".
7 اقپان كەشكە جامبىل وبلىسى قورداي اۋدانىندا قازاقتار مەن دۇنگەندەر جانجالداسىپ، رەسمي دەرەك بويىنشا، 10 ادام قازا تاۋىپ، 180-نەن اسا ادام زارداپ شەككەن. كەيىن جانجال بولعان ماسانچي اۋىلىندا قيراعان عيماراتتان تاعى ءبىر ادامنىڭ مۇردەسى تابىلىپ، پوليتسيا ونىڭ جانجالدان قازا بولعانىن راستادى.
قوردايداعى جانجال كەزىندە قىرعىزستانمەن شەكاراعا جاقىن ورنالاسقان، نەگىزىنەن ەتنيكالىق دۇنگەندەر تۇراتىن ماسانچي، سورتوبە، اۋقاتتى اۋىلدارىندا، رەسمي مالىمەت بويىنشا، 20 ساۋدا ورنى مەن 39 ءۇي ءبۇلىنىپ، 47 كولىك ورتەندى. ۇكىمەت قاقتىعىستا قيراعان ۇيلەر مەن ساۋدا ورىندارىن قالپىنا كەلتىرۋگە كومەكتەسەتىنىن مالىمدەگەن.
بيلىك جانجال قارت ەر ادامنىڭ جارالانۋىمەن اياقتالعان جول ۇستىندەگى كيكىلجىڭنەن شىققان دەپ مالىمدەدى. كيكىلجىڭنەن سوڭ قازاقتار (كوبى – قاراكەمەر اۋىلىنىڭ تۇرعىنى) جينالىپ، دۇنگەندەر تۇراتىن اۋىلدارعا بارعان.
قازاقستان ۇكىمەتى جانجالعا بايلانىستى 120-دان استام قىلمىستىق ءىس قوزعالعانىن مالىمدەدى. ("ادام ءولتىرۋ" بابى بويىنشا 11 ءىس). قوردايداعى جانجالدان سوڭ جامبىل وبلىسىنىڭ اكىمى اسقار مىرزاحمەتوۆ باستاعان بىرنەشە شەنەۋنىك جانە پوليتسيا دەپارتامەنتىنىڭ باسشىسى قىزمەتتەن كەتتى. ونىڭ ورنىنا سول كەزدە پرەمەر-ءمينيستردىڭ ورىنباسارى بولعان بەردىبەك ساپارباەۆ تاعايىندالدى.
1 ناۋرىزدا قورداي اۋدانىنا بارعان پرەزيدەنت قاسىم-جومارت توقاەۆ زاڭسىز كونتراباندامەن اينالىسقان ەكى قىلمىستىق توپتىڭ اراسىنداعى تەكەتىرەستەن جانجال شىققانىن، سونىڭ كەسىرىنەن 11 ادام قازا بولعانىن ايتىپ، جەرگىلىكتى بيلىككە پارا الۋ مەن شەكارا ارقىلى زاڭسىز ساۋدا جاساۋ ماسەلەلەرىن شەشۋدى تاپسىردى.
Abai.kz
