ساياساتتانۋشى، ۇلتتىق قوعامدىق سەنىم كەڭەسىنىڭ مۇشەسى ەرلان سايروۆ قوعامدىق تالقىلاۋلار بارىسىندا بەيبىت جينالىستار تۋرالى زاڭ جوباسى جەتىلدىرىلگەنىن ايتتى.

«بۇل زاڭ جوباسى ءبىر جارىم اي بويى قوعامدا تالقىلاندى. وسى ورايدا قۇجاتتىڭ باستاپقى مودەلى مەن قازىرگى نۇسقاسىن سالىستىراتىن بولساق، ەلەۋلى وزگەرىستەر ەنگىزىلدى. ويتكەنى ءارتۇرلى ازاماتتاردىڭ، ازاماتتىق قوعام مۇشەلەرىنىڭ ۇسىنىستارى ارقىلى زاڭ جوباسى جەتىلدى»، - دەدى ە. سايروۆ تىلشىلەرگە بەرگەن سۇحباتىندا.

ونىڭ سوزىنە قاراعاندا، قۇجات جوباسىنداعى نورمالار ليبەراليزاتسيا جاعىنا اۋىسىپ وتىر. «ماجىلىسكە تۇسكەن كەزدە زاڭ جوباسى حالىقتىڭ مۇددەسى تۇرعىسىنان تاعى دا ۇشتالا تۇسەدى دەگەن ۇمىتتەمىز. نەگىزى، بۇل قۇجاتتىڭ قابىلدانۋى ءبىزدىڭ ەلىمىزدەگى ادامداردىڭ ەركىندىگىنىڭ جاڭا مودەلىن الىپ كەلىپ وتىر»، - دەپ توقتالدى ساياساتتانۋشى.

بۇل ۇلتتىق قوعامدىق سەنىم كەڭەسىندە ۇسىنىلعان زاڭ جوباسى ەكەنىنە توقتالعان ول «وسى ورايدا پرەزيدەنت قاسىم-جومارت توقاەۆتىڭ ساياسي رەفورمالارى ءبىرىنشى پاكەتىنىڭ ەڭ نەگىزگى بولىگى دەپ ايتۋعا بولادى. بۇل - ەلىمىزدە قوعامدىق پروتسەستەردى جەتىلدىرۋدە ۇلكەن پروگرەسس»، - دەدى.

ايتا كەتەيىك، بۇگىن پارلامەنت ماجىلىسىندە «قازاقستان رەسپۋبليكاسىندا بەيبىت جيىنداردى ۇيىمداستىرۋ جانە وتكىزۋ ءتارتىبى تۋرالى» زاڭ جوباسى تانىستىرىلدى.

Abai.kz