دۇيسەنبى, 6 ءساۋىر 2020
COVID-19 قازاقستاندا. جۇقتىرعاندار — 584. جازىلعاندار — 42. قايتىس بولعاندار — 6
46 - ءسوز 587 17 پىكىر 25 ناۋرىز, 2020 ساعات 12:05

«قازاقى تەرميندى حالىق جاسايدى»

مەملەكەت باسشىسى قاسىم - جومارت توقاەۆ قازىرگى الەمدى جايلاپ وتىرعان ىندەتتىڭ كەسىرىنەن بولىپ وتىرعان داعدارىستى جاعدايدا قول قۋسىرىپ وتىرماي، كارانتين جاعدايىندا دا بەلسەندى بولۋعا ۇندەپ وتىر. بۇل وتە ماڭىزدى. ۋاقىتشا شارانىڭ سالدارى ەلگە وڭاي تيمەگەنىمەن، ۇلت رۋحىن تۇسىرمەۋگە ءتيىس. ءبىز بۇل ورايدا وسىنداي ءار شاڭىراقتا ءتورت كوزىمىز تۇگەل وتىرعاندا وتباسىمىزبەن كەيبىر ۇلتتىق قۇندىلىقتاردى دامىتۋعا ۇلەس قوسا الامىز.

بۇگىن ماعان بەلگىلى مەملەكەت، قوعام قايراتكەرى، ۇلتجاندى ازامات ءاليحان
بايمەن حابارلاستى. قازاقتىڭ تىلدىك قورىن بايىتۋ، ءتىل تازالىعى مەن ءساتتى تەرميندەر جاساۋعا قاتىستى ويىن ايتتى. ءبىراز ازاماتتارمەن اقىلداسىپتى.
مەن وعان ءوز تاراپىمنان تومەندەگى ويلار مەن ۇسىنىستاردى قوسا الامىن.

ءومىر وركەنيەتپەن بىرگە دامىپ وتىرادى. سول وركەنيەتپەن بىرگە ءارتۇرلى زات كەلەدى، تەحنيكا، تەحنولوگيا، قىزمەت تۇرلەرى پايدا بولادى. مىسالى يسلام ءدىنىنىڭ ىقپالىمەن كەلگەن قانشاما سوزدەر تىلىمىزگە ءسىڭىسىپ كەتتى. بىراق ءبىز ولاردى تۋرا ارابشا كوشىرىپ العامىز جوق. قازاقىلاندىردىق. كەيبىرىن قازاقتا بار سوزبەن اتادىق. كەيىن پارسى، ورىس مادەنيەتىنىڭ ۇستەم تۇسىندا دا كوپ ءسوز كەلدى. كەڭەس ۇكىمەتى تۇسىندا عىلىم مەن ءبىلىمنىڭ، مادەنيەتتىڭ سان سالاسى ارقىلى قانشاما ءسوز قولدانىسقا ەندى. ونىڭ دەنى حالىقارالىق تەرميندەر بولسا، كوبى قازاقشا بالاما تابۋعا بولاتىن ورىسشا، اتاۋلار. بۇل تۇرعىدا ءتىل كوميتەتى تەرميندەر مەن ءسوزجاسامدا ۇلكەن جۇمىستار اتقاردى. دەسە دە ءتىل ءتىرى ورگانيزم رەتىندە كۇندە دامىپ، تەرميندەر ەسكىرىپ، جاڭاسى پايدا بولىپ وتىرادى. بۇل - زاڭدىلىق. جاھاندىق دامۋدىڭ سونشالىقتى تەز ءجۇرىپ جاتقانى سونداي، ءار جاڭا قۇبىلىس، زات پايدا بولعان سايىن ونىڭ اتاۋى دا كۇندە جاڭارىپ جاتىر. ەگەر سونىڭ ءبارىن سول وزگە ەلدىڭ تىلىندە سىڭىرە بەرسەك ەندى ءجۇز جىلدان سوڭ قازاق ءوز ءتىلىن تانىماي قالۋى مۇمكىن. سوندىقتان دا بىزدە تەرمين جاساۋ، ءار زاتتىڭ اتاۋىنىڭ قازاقشا بالاماسىن تابۋ، بەكىتۋ ماسەلەسى ۇزدىكسىز ءارى عىلىمي نەگىزدە ءجۇرىپ جاتىر.

بۇل ورايدا ءار ازاماتتىڭ ءسوز جاسامعا ۇلەس قوسۋىنىڭ ماڭىزى زور. الەكەڭنىڭ بۇل باستاماسىن ءتىل كوميتەتى قولدايدى. باستاما اياقسىز قالماۋى ءۇشىن، جانە تىلگە شىنايى پايداسى ءتيۋى ءۇشىن ءتىل كوميتەتى بۇل شاراعا بايلانىستى "قازاقى تەرميندى حالىق جاسايدى" دەگەن كونكۋرس جاريالايدى. وندا بارشا قازاقستاندىقتارعا "سىزدىڭشە قاي ءسوزدىڭ بالاماسى جوق؟قازاقشا قالاي اتار ەدىڭىز؟" دەگەن ساۋال قويىلىپ، جۇرتتان تۇسكەن ۇسىنىستى ارنايى كونكۋرستىق كوميسسيادا قاراپ، ءساتتى بالاما تاپقان ازاماتتاردىڭ اتىن اتاپ، جەڭىمپاز دەپ تانيتىن بولامىز. ونىڭ شارتتارى مەن تالاپتارى جاسالىپ، تانىستىرىلاتىن بولادى. ءبىر سوزبەن ءساتتى تەرمين جاساۋعا بار حالىق، ءار قازاق قاتىسا الادى.

ءتىپتى، قازىردەن باستاساڭىز دا بولادى. ەگەر قانداي دا ۇسىنىسىڭىز بولسا مەنىڭ وسى پاراقشاما جازىڭىز نەمەسە مىنا ادرەسكە (bakytgul.iskakova@mail.ru ) جىبەرىڭىز.

ادىلبەك قابا 

Abai.kz

17 پىكىر