دۇيسەنبى, 30 ناۋرىز 2020
1319 5 پىكىر 26 ناۋرىز, 2020 ساعات 17:28

الماتى وبلىسىندا كوروناۆيرۋسقا قاتىستى جالعان اقپاراتتاردى انىقتايتىن «موبيلدىك توپ» قۇرىلدى

سوڭعى كەزدە  كوروناۆيرۋسقا قاتىستى جالعان اقپاراتتار جەلىدە جيىلەپ بارادى. مەسسەندجەرلەردەگى ءارتۇرلى الىپقاشپا اڭگىمەدەن حالىقتىڭ دۇرلىگىپ جاتقانى تاعى بار. الماتى وبلىسىندا ءوڭىر باسشىسى اماندىق باتالوۆتىڭ تىكەلەي تاپسىرماسىمەن «ءتاجدى» تاجالعا قاتىستى شىققان جالعان اقپاراتتاردى انىقتايتىن موبيلدىك توپ قۇرىلدى. وسىلايشا، جۇمىس توبى حابارلاردىڭ جالعان، شىنىن انىقتاپ، فەيك مالىمەتتەردىڭ تارالۋىنا توسقاۋىل قويماق.

ماماندار ازاماتتاردى تەك رەسمي دەرەككوزدەگى اقپاراتقا سەنۋگە شاقىرادى. ول ءۇشىن الماتى وبلىسى بويىنشا 41 12 13, 8 800 080 88 28 نومىرلەرى ارقىلى call-ورتالىققا تەگىن قوڭىراۋ شالۋعا بولادى. رەسپۋبليكا بويىنشا 1406 بىرىڭعاي سەنىم تەلەفونى تاۋلىك بويى جۇمىس ىستەپ تۇر.

ايتا كەتۋ كەرەك، الماتى وبلىسىندا Covid-19 ىندەتىن جۇقتىرعان ءبىر ادام بار. كوروناۆيرۋس جۇقتىرعان سىرقاتتىڭ جاعدايى جاقسى. قازىر ول قاراساي اۋداندىق اۋرۋحاناسىنىڭ جۇقپالى اۋرۋلار بولىمىندە ەم الۋدا. سونىمەن قاتار، 282 ادام مەديتسينا قىزمەتكەرلەرىنىڭ باقىلاۋىندا تۇر.  ستاتسيونارلىق ەمدەلۋدە – 84, ءۇي كارانتينىندە 198 ادام جاتىر.

وڭىردە كوروناۆيرۋس ينفەكتسياسىنىڭ ودان ءارى تارالۋىنا جول بەرمەۋ ءۇشىن قاجەتتى شارالار جاسالىپ جاتىر. وبلىستا ءتاجدى ىندەتكە شالدىققانداردى ەمدەۋ ءۇشىن 150 جۇقپالى اۋرۋعا ارنالعان توسەك، 800  پروۆيزورلىق جانە 1217 كارانتيندىك توسەك-ورىن دايىندالعان. دارىگەرلەر مەن ەمدەلىپ جاتقان ناۋقاستار بارلىق قاجەتتى قۇرال مەن دارىلىك پرەپاراتپەن قامتاماسىز ەتىلگەن.

ايمان اسىل

Abai.kz

5 پىكىر