"ماسانچي، بۇلار باتىر، اۋقاتتى جانە قاراسۋ اۋىلدارىندا جالپى سانى 40 تۇرعىن ءۇي، 20 كوممەرتسيالىق نىسان، بەس شارۋاشىلىق عيمارات ورتەنگەن. بارلىق جۇمىستار "شيۆون" قايىرىمدىلىق قورىنىڭ ەسەبىنەن جۇرگىزىلەدى" دەدى اكىمدىك وكىلدەرى.

اكىمدىك دەرەگىنشە، ءۇيى ورتەنگەن 39 وتباسىنىڭ ءۇيىن قالپىنا كەلتىرۋ ءۇشىن وبلىستىق بيۋدجەتتەن شامامەن 20,6 ملن تەڭگە قارجى بولىنگەن. بۇعان قوسا، مەملەكەتتىك ماتەريالدىق قورى قۇرىلىسشىلاردى بىرقاتار قۇرىلىس ماتەريالدارمەن قامتاماسىز ەتەدى.

توعىز وتباسىنا اسىراۋشىسىنان ايىرىلۋىنا بايلانىستى 8,2 ملن تەڭگە كولەمىندە كومەك بەرىلگەن. ال كولىكتەرى بۇلىنگەن نەمەسە ورتەنگەن ادامدارعا قانشا وتەماقى تولەنەتىنى تەرگەۋ اياقتالعاننان كەيىن بەلگىلى بولماق.

7 اقپان كەشكە جامبىل وبلىسى قورداي اۋدانىندا قازاقتار مەن دۇنگەندەر جانجالداسىپ، رەسمي دەرەك بويىنشا، 11 ادام قازا تاۋىپ، 180-نەن اسا ادام زارداپ شەككەن.

قوردايداعى جانجال كەزىندە قىرعىزستانمەن شەكاراعا جاقىن ورنالاسقان، نەگىزىنەن ەتنيكالىق دۇنگەندەر تۇراتىن ماسانچي، سورتوبە، اۋقاتتى اۋىلدارىندا، رەسمي مالىمەت بويىنشا، 20 ساۋدا ورنى مەن 39 ءۇي ءبۇلىنىپ، 47 كولىك ورتەندى. ۇكىمەت قاقتىعىستا قيراعان ۇيلەر مەن ساۋدا ورىندارىن قالپىنا كەلتىرۋگە كومەكتەسەتىنىن مالىمدەگەن.

بيلىك جانجال قاريانىڭ سوققىعا جىعىلۋىمەن اياقتالعان جول ۇستىندەگى كيكىلجىڭنەن شىققان دەپ مالىمدەدى. كيكىلجىڭنەن سوڭ قازاقتار (كوبى – قاراكەمەر اۋىلىنىڭ تۇرعىنى) جينالىپ، دۇنگەندەر تۇراتىن اۋىلدارعا بارعان.

قازاقستان بيلىگى جانجالعا بايلانىستى 120-دان استام قىلمىستىق ءىس قوزعالعانىن مالىمدەدى. ناۋرىز ايىنىڭ باسىندا باس پروكۋراتۋرا بۇزاقىلىق، ادامدى ۇرىپ-سوعۋ جانە پوليتسياعا باعىنباۋ ءىسى بويىنشا بەس ادام ۇستالعانىن حابارلاعان.

قوردايداعى جانجالدان سوڭ جامبىل وبلىسىنىڭ اكىمى اسقار مىرزاحمەتوۆ باستاعان بىرنەشە شەنەۋنىك جانە پوليتسيا دەپارتامەنتىنىڭ باسشىسى قىزمەتتەن كەتتى. ونىڭ ورنىنا سول كەزدە پرەمەر-ءمينيستردىڭ ورىنباسارى بولعان بەردىبەك ساپارباەۆ تاعايىندالدى.

Abai.kz