اتىراۋ وبلىسى يساتاي اۋدانىنىڭ جانباي اۋىلىندا كەزىندە اتى اڭىزعا اينالعان ۇستاز، نارىن ولكەسىندە وقۋ-اعارتۋ ءىسىن العاشقى ۇيىمداستىرۋشىلاردىڭ ءبىرى بولعان، ەكى مارتە لەنين وردەنىنىڭ يەگەرى اتانعان حاميدوللا ناۋبەتوۆتىڭ ەسىمىمەن اتالاتىن ورتا مەكتەپ بار. بيىل شاڭىراق كوتەرگەنىنە 80 جىل تولاتىن وسى وقۋ ورنىندا ۇلاعاتتى ۇستاز جانبولات قاسىمۇلى قاسىموۆتىڭ تابان اۋدارماي ۇستازدىق ەتكەنىنە بيىل قىرىق بەس جىل تولعان ەكەن. دەمەك اۋىل مەن اۋدانداعى ءوزىنىڭ الدىنداعى اعا تولقىن مەن تۇستاستارىنىڭ بالالارىنا، نەمەرەلەرىنە ساباق بەرسە، ەندى ولاردىڭ شوبەرەلەرى وزىنەن ءدارىس الۋدا. ۇستاز باقىتى دەگەن دە وسى شىعار... بۇعان جانبولات قاسىمۇلىمەن اڭگىمەلەسكەنىمىزدە كوزىمىزدى جەتكىزە تۇستىك.

اتىراۋ وبلىسى يساتاي اۋدانىنىڭ جانباي اۋىلىندا كەزىندە اتى اڭىزعا اينالعان ۇستاز، نارىن ولكەسىندە وقۋ-اعارتۋ ءىسىن العاشقى ۇيىمداستىرۋشىلاردىڭ ءبىرى بولعان، ەكى مارتە لەنين وردەنىنىڭ يەگەرى اتانعان حاميدوللا ناۋبەتوۆتىڭ ەسىمىمەن اتالاتىن ورتا مەكتەپ بار. بيىل شاڭىراق كوتەرگەنىنە 80 جىل تولاتىن وسى وقۋ ورنىندا ۇلاعاتتى ۇستاز جانبولات قاسىمۇلى قاسىموۆتىڭ تابان اۋدارماي ۇستازدىق ەتكەنىنە بيىل قىرىق بەس جىل تولعان ەكەن. دەمەك اۋىل مەن اۋدانداعى ءوزىنىڭ الدىنداعى اعا تولقىن مەن تۇستاستارىنىڭ بالالارىنا، نەمەرەلەرىنە ساباق بەرسە، ەندى ولاردىڭ شوبەرەلەرى وزىنەن ءدارىس الۋدا. ۇستاز باقىتى دەگەن دە وسى شىعار... بۇعان جانبولات قاسىمۇلىمەن اڭگىمەلەسكەنىمىزدە كوزىمىزدى جەتكىزە تۇستىك.

- جانبولات اعا، سىزدەردى اۋىلداس­تارىڭىز «ۇستازدار اۋلەتى» دەپ اتايدى ەكەن. اكەڭىز قاسىم كەزىندە حاميدوللا ناۋبەتوۆپەن ۇزەڭگىلەس بولعان، نارىن وڭىرىنەن شىققان ۇستازدار شوعىرىندا الدىمەن ەسىمى اتالاتىن ازامات ەكەنىن بىلەمىز. اڭگىمەمىزدى وسىدان باستاساق...
- اكەم 1913 جىلى تۋعان ەدى، ول - نارىن وڭىرىندە ۇزاق جىلدار بويى ۇستازدىق ەتىپ، ەل قۇرمەتىنە بولەنگەن ازامات. مەن سىزگە مىناداي ءبىر كونەكوز قارتتاردان ەستىگەن اڭىز-اڭگىمەمدى ايتايىن. ەرتەرەكتە جالمۇقانۇلى قاراباي اتامنىڭ ۇيىنە جولشىباي قۇدايى قوناق كەلىپ قونىپتى. قوناعىن ويداعىداي كۇتكەن قاراباي اتام ەرتەڭىنە جۇرۋگە جينالعان جولاۋشىعا جىلقىسىنداعى ءمىنىس اتتارىنىڭ بىرەۋىن ەرتتەپ مىنگىزىپ جىبەرىپتى. كوڭىلى كوتەرىلىپ، قۋانىشى قوينىنا سىيماعان جولاۋشى سىيعا العان تايپالعان جورعاسىمەن اۋدەم جەرگە بارىپ، قايتىپ كەلىپتى. اتىنىڭ ۇستىندە تۇرىپ:
«بارامىن جولىم بولىپ الايىعا،
زەرگەرلەر مىس قوسادى قالايىعا.
سىيلاساڭ قاباقاي بابا ەلىن سىيلا،
ۇلدارى ات مىنگىزەر تالايىڭا!
بالا - ءسۇت، نەمەرە - قايماق. ادام­نىڭ بالاسى - «جوسىن»، اللانىڭ بالاسى - «قاسىم». شاڭىراعىڭدا اتاعى جالپاق جۇرتقا جايىلاتىن، بيداي ءوڭدى، كەڭ يىقتى، كەربەز ۇل دۇنيەگە كەلەر، قارا تۇز ەزىلگەن سۋعا شومىلدىرارسىڭ! ۇلىڭنىڭ اتىن «قاسىم» قويارسىڭ»، - دەپ قول جا­يىپ، باتاسىن بەرىپ، مىنگىزگەن اتىنا قامشى باسىپ، ءجۇرىپ كەتىپتى.
سول قۇدايى قوناقتىڭ باتاسىنان كەيىن كوپ ۇزاماي قاراباي اتامنىڭ ايەلى شەكەسى تورسىقتاي ۇلدى دۇنيەگە اكەلگەن. بالانىڭ اتىن ازان شاقىرىپ «قاسىم» دەپ قويعان. ءبىز سول باتا دارىعان قاسىمنان تاراعان ۇرپاقپىز. سول ۇرپاق - بىزدەر اكەمىز تۋرالى قارتتاردان ەستەلىك اڭگىمە، جىلى ءسوز ەستىپ قالعاندا ەلەڭ ەتە تۇسەمىز. جاس كەزىندە ساباققا وتە العىر بولعان ەكەن. ورتا مەكتەپتى اياقتاعان سوڭ اتىراۋ (بۇرىنعى گۋرەۆ) قالاسىنداعى ورىس تىلىندە ءدارىس بەرەتىن ەكى كلاستىق مەكتەپتىڭ مۇعالىمدەر دايارلايتىن ءبولىمىن، سەمەيدەگى جۇمىسشىلار دايىندايتىن فاكۋلتەتىن بىتىرگەن. بۇدان كەيىن ول تاشكەنت قالاسىنداعى ورتا ازيا اسكەري گەودەزيا ينستيتۋتىنا وقۋعا ءتۇسىپ، ونىڭ جوعارى كۋر­سىندا وقىپ جۇرگەندە اكەسى مەن اۋىل اق­ساقالدارى ءارى قاراي وقۋىنا ريزاشىلىق بەر­مەي، اۋىلعا شاقىرتىپ العان. سودان ول سول كەزدەگى سارتوبە مەكتەبىنە وقۋ ءىسىنىڭ مەڭ­­گەرۋشىسى بولىپ قىزمەتكە ورنالاسادى. بۇ­دان كەيىن ماناش اۋىلىنداعى اندرەەۆ اتىنداعى ورتا مەكتەبىنىڭ ديرەكتورى قىز­مەتىن اتقارادى. بۇل مەكتەپتىڭ بۇدان بۇرىنعى باسشىسى سالىق بوتەشكين دەگەن اعامىز ەدى.
ۇلى وتان سوعىسى باستالعان سوڭ 1942 جىلدىڭ اقپان ايىندا اكەم مايدانعا اتتانعان. ەلگە 1944 جىلى ورالدى. ءبىر قولىن مايدان دالاسىندا قالدىرعان اكەم بەيبىت ومىردە دە ۇستازدىق قىزمەتىن ودان ءارى جالعاستىرىپ، شاكىرتتەر تاربيەلەدى. ءومىرىنىڭ سوڭىنا دەيىن اندرەەۆ اتىنداعى ورتا مەكتەپتە ورىس ءتىلى مەن ادەبيەتى پانىنەن ساباق بەردى. ول كەزدە ماناش اۋىلىندا ورىس حالقىنىڭ بىردە-ءبىر وكىلى جوق بولاتىن. تابانىنا قۇلىق جاعىپ، قوزى قايىرعان قىر قازاعىنىڭ بالاسىنا ورىس ءتىلىن ۇيرەتۋ وڭاي شارۋا بولعان جوق. اكەمىز سوعىس سالعان جاراقاتتان 1972 جىلى 59 جاسىندا ومىردەن وزدى.
ءبىر اكە-شەشەدەن ءبىز 10 ۇل-قىز دۇنيەگە كەلدىك. ەڭ ۇلكەنى - مارۋسا اپامىز. بۇدان كەيىن - ماقپۋزا، ايمانگۇل، جان­بولات، بەكبولات، باقتىگەرەي، ەسبولات، باقتىلى، ءناسىپ، باقبەرگەن بولىپ كەتە بەرەمىز. ءىنىم - بەكبولات الماتى قالا­سىندا تۇرادى، ماماندىعى حيرۋرگ-دارىگەر. قازاقستاننىڭ ەڭبەك سىڭىرگەن قاي­راتكەرى، قازاقستان رەس­پۋبليكاسى دەن­ساۋلىق ساقتاۋ ءىسىنىڭ ۇزدىگى. باكتىگەرەي دە اقتوبە مەملەكەتتىك مەديتسينا ينستيتۋتىنىڭ تۇلەگى. باقبەرگەن بولسا قازىر يساتاي اۋدانىنىڭ اكىمى. كەزىندە گۋرەۆ پەدينستيتۋتىن بىتىرگەن. وتىز جىلدان اسا مۇعالىم، مەكتەپ ديرەكتورى، اۋداندىق ءبىلىم ءبولىمىنىڭ مەڭگەرۋشىسى قىزمەتتەرىن ابىرويلى اتقاردى. قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى، ى.التىنسارين توسبەلگىسىنىڭ يەگەرى. بۇگىندە باقبەرگەن ەكەۋمىز اكە جولىن جالعاستىرۋدامىز. مەنەن وربىگەن قىزدارىمنىڭ بارلىعى دا وسى قاسيەتتى ماماندىق ۇستازدىقتى تاڭداعان. اكەم قاسىم مەن انام عاينيجامال عاشيحوۆادان وربىگەن ۇل-قىزداردىڭ ءبارى دە جوعارى ءبىلىم الىپ، ءوز ماماندىقتارىنىڭ ۇزدىكتەرى اتانىپ، قازىر ءار سالادا ەڭبەك ەتىپ ءجۇر.
- «اكە كورگەن وق جونار» دەمەكشى، بۇگىندە ءوزىڭىز دە ەلگە سىيلى ۇستاز اتاندىڭىز. جانبولات اعا، ءسىزدى جەرلەستەرىڭىز قازاقستان رەسپۋبليكاسى ءبىلىم بەرۋ ءىسىنىڭ ۇزدىگى رەتىندە بىلەدى. ەندى ءوزىڭىز جايلى از-كەم ايتا كەتسەڭىز...
- مەن سوناۋ سۇرقاي سوعىس جىلدارى، ياعني 1941 جىلى جانباي سەلوسىندا دۇنيەگە كەلىپپىن. ءومىر سوقپاقتارى دەگەن قىزىق قوي، كەزىندە الدىمدا تالاي سوقپاق، تالاي تاڭداۋ جاتتى. بىراق اقىرى تۋعان اۋىلىم­دا قالۋدى تاڭدادىم. 1958 جىلى ورتا مەك­تەپتى بىتىرگەن سوڭ گۋرەۆتەگى تەڭىز فلو­تى ۋچيليششەسىنە وقۋعا ءتۇستىم. ونداعىلار مەنى استراحان قالاسىنا جىبەرمەكشى بولعاندا وندا بارعىم كەلمەدى. سودان كەيىن قازىرگى استانا قالاسىنىڭ اكىمى يمانعاليدىڭ اكەسى نۇرعالي تاسماعامبەتوۆ ماعان نوۆوبوگات اۋىل شارۋاشىلىعى ۋچيليششەسىنە وقۋعا بارۋعا كەڭەس بەردى. ول وقۋ ورنىن بىتىرگەن سوڭ اۋىلدا تراكتورشى بولىپ ەڭبەك ەتتىم. ءتىپتى گۋرەۆ (قازىرگى اتىراۋ) قالاسىنداعى قىسقا مەرزىمدى كۋرستا وقىپ، «سۋدان قۇتقارۋشى-ۆودولازنيك» دەگەن ماماندىق تا الىپ شىقتىم. 1962 جىلى اسكەر قاتارىنا شاقىرىلىپ، ءتورت جىل قيىر شىعىستاعى اسكەري-تەڭىز فلوتىندا قىزمەت ەتتىم. ۆلاديۆوستوك قالاسىنان كامچاتكاعا ون ءبىر ايلىق كۋرسقا جىبەردى. وندا «موتوريست-ەلەكتريك» ماماندىعىن يگەردىم. اسكەردە جۇرگەندە «ۇلى جەڭىستىڭ 25 جىلدىعى» مەرەكەلىك مەدالىمەن دە ماراپاتتالدىم.
وتان الدىنداعى اسكەري بورىشىمدى وتەپ، 1966 جىلى ەلگە ورالدىم. اۋداندىق اسكەري كوميسساريات باسشىسى، پودپولكوۆنيك دوسجانوۆ ماعان «بىزگە كادر جەتىسپەي جاتىر، اسكەري كوميسسارياتكا جۇمىسكا كەل» دەپ قولقا سالدى. الايدا مايدانگەر مۇگەدەك اكەم مەنى بۇل جۇمىسقا جىبەرمەدى. سودان مەكتەپكە دەنە تاربيەسى، بۇدان كەيىن العاشقى اسكەري دايىندىق ءپانىنىڭ مۇعالىمى بولىپ جۇمىسقا ورنالاس­تىم. 1971 جىلى فرۋنزە (قازىرگى بىشكەك) قالاسىنداعى اسكەري ۋچيليششەگە جولدامامەن وقۋعا جىبەرىلدىم. مۇندا التى اي وقىپ، كىشى لەيتەنانت شەنىن الىپ، اۋىلعا قايتا كەلدىم. سول جىلدارى مەكتەپتەگى ەڭبەكتەن قول ۇزبەي ءجۇرىپ، گۋرەۆ مەملەكەتتىك پەداگوگيكالىق ينستيتۋتىن تامامداعان ەدىم. سونىمەن 1966 جىلدان قازىرگى كەزگە دەيىن ح.ناۋبەتوۆ اتىنداعى ورتا مەكتەپتە العاشقى اسكەري دايىندىق ءپانىنىڭ مۇعالىمى بولىپ قىزمەت جاساپ كەلەمىن. وقۋشىلاردى ءوز وتانىن سۇيۋگە، قازاقستاندىق ءپاتريوتيزمدى قالىپتاستىرۋ باعىتىندا قىرىق بەس جىلدىق تاجىريبەم مەن تەوريالىق ءبىلىمىمدى قولدانۋعا كۇش سالامىن. 1987 جىلى رەسپۋبليكالىق پەداگوگيكالىق وقۋعا قاتىسىپ، جەڭىمپاز اتاندىم. مەكتەبىمىزدەگى «جاس مەرگەندەر» اتتى اسكەري-پاتريوتتىق كلۋبىنىڭ مۇشەلەرى بىرنەشە مارتە وبلىستىق سايىستاردا جەڭىسكە جەتىپ، ءبىرىنشى دارەجەلى ديپلوممەن ماراپاتتالدى. ءوزىم اۋداندىق العاشقى اسكەري دايىندىق ءپانى بىرلەستىگىنىڭ جەتەكشىسىمىن، دالالىق اسكەري جيىندارىنىڭ باتالون كومان­ديرى مىندەتىن اتقارامىن. اسكەري شەنىم - ما­يور، مەكتەپتەردە مۇنداي شەندەگى مۇعالىمدەر قازىر جوق. مەن تاربيەلەگەن جۇزدەگەن شاكىرتتەر بۇگىندەرى رەسپۋبليكامىزدىڭ تۇكپىر-تۇكپىرىندە ءار سالادا جەمىستى ەڭبەك جۇرگەنىن ماقتانىش ەتەمىن.
- جانبولات قاسىمۇلى، ءسىز ءبىر كەزدەرى كەڭشارداعى كومسومول-جاستار شوپاندار بريگاداسىنا جەتەكشىلىك ەتىپسىز... وسى جونىندە نە ايتار ەدىڭىز؟
- ءيا، 1983-1985 جىلدار ارالىعىندا «زابۋ­رىن» كەڭشارىندا قۇرىلعان كومسومول-جاس­تار بريگاداسىنا جەتەكشىلىك ەتكەنىم راس. وعان مەن «قازاقستانداعى قوي سانىن 50 ميل­ليونعا جەتكىزۋ كەرەك» دەگەن ۇران تاستا­عان كوممۋنيستىك پارتيانىڭ تاپسىرماسىمەن بارعان ەدىم. قىس قىستاۋىمىز - قازىرگى «ءبۇر­كىتجارىدا» وتىرعان ابەن قىستاۋى بولسا، جاز جايلاۋىمىز - باتىس قازاقستان وبلىسى­مەن شەكتەسەتىن «24-ءشى اۋىل» ەدى. ول كەزدە كەڭ­شار ديرەكتورى م.جۇماباەۆ، پارتورگ م.ەگىزباەۆ دەگەن اعالار بولاتىن. بريگاداعا ەڭ كوپ كەلەتىن اۋداندىق پارتيا ۇيىمىنىڭ حات­شىسى نۇرجيان ابدولوۆا اپاي ەدى. ول كەز دە ءبىر جاستىق شاقتىڭ قىزىقتى داۋرەنى ەكەنى عوي.
- ءسىز ەلدىڭ قوعامدىق جۇمىستارىنا دا ءجيى ارالاساتىن ۇستازداردىڭ ءبىرىسىز. ءارى اۋداندىق ءماسليحاتتىڭ دەپۋتاتى رەتىندە قانداي يگىلىكتى جۇمىستارعا ۇلەس قوسقانىڭىزدى بىلگىمىز كەلەدى؟
- مەن ەكى شاقىرىلىمدا دا اۋداندىق دەپۋتات بولىپ سايلاندىم. ارينە، حالقىم سەنىم بىلدىرگەن سوڭ، تۋعان جەردىڭ الەۋمەتتىك-ەكونوميكالىق دامۋىنا اتسالىسۋىم كەرەك دەپ شەشتىم. ءوزىمنىڭ تىكەلەي ارالاسۋىممەن جانباي اۋىلىنا تۇگەلدەي گاز جەلىسى تارتىلدى. ەندى جاڭادان سۋ قۇبىرىن جۇرگىزۋ، مال سويۋ پۋنكتىن سالۋ، بالاباقشا، اۋىلدىق ەمحانانى كۇردەلى جوندەۋدەن وتكىزۋ سياقتى شارالاردى جۇزەگە اسىرۋ جوسپارلانۋدا. بۇگىندە «نۇر وتان» حدپ-نىڭ مۇشەسىمىن.
- ءبىز وزىڭىزدەي اعا ۇرپاق وكىلدەرىنىڭ ءىسىن ۇلگى تۇتىپ، ماقتان ەتەمىز. ءبىلىم جانە عىلىم مينيسترلىگىنىڭ قۇرمەت گراموتاسىمەن ماراپاتتالعانىڭىزدى، قازاقستان رەسپۋبليكاسى ءبىلىم بەرۋ ءىسىنىڭ ۇزدىگى توسبەلگىسىنىڭ يەگەرى ەكەنىڭىزدى بىلەمىز. ال 2010 جىلى ۇزاق جىلعى ۇستازدىق ەڭبەگىڭىز ءۇشىن ى.التىنسارين اتىنداعى توسبەلگىگە يە بولدىڭىز. ەل قۇرمەتىنە بولەنگەن ازاماتتىڭ جانۇياسى تۋرالى دا بىلە وتىرعانىمىز ءجون بولار.
- مەن الگىندە كوپ بالالى وتباسىندا تاربيەلەنگەنىمدى ايتىپ ءوتتىم عوي. ال ءوزىمنىڭ اللا بەرگەن ءۇش ۇل مەن بەس قىزىم بار. بۇگىندە ءبارى دە ازامات بولىپ، ءۇيلى-باراندى بولعان. ولاردان نەمەرە مەن جيەندەر ءسۇيىپ وتىرمىن. جۇبايىم بەردەشوۆا رايا اقتوبە كووپەراتيۆ-ساۋدا تەحنيكۋمىن بىتىرگەن سوڭ كوپ جىلدار دۇكەنشى، كەيىن تىگىن سالاسىندا ەڭبەك ەتتى. «باتىر انا» جانە «التىن القا» يەسى، قازىر زەينەتكەر. ۇلدارىم - بەكبەرگەن، وڭبەرگەن، جەڭىسبەكتىڭ ەكەۋى مۇناي سالاسىندا، ال ءۇشىنشى ۇلىم وبلىستىق سوتتا قىزمەت ىستەيدى، ال قىزدارىم گۇلميرا، مارجان، تالشىن، ەلميرا، ۆەنەرا تۇرمىستا، ءبارى دە جوعارىدا ايتىپ وتكەندەي، ۇستازدىق قىزمەتتى تاڭداعان. ءبارىنىڭ دە ارناۋلى، جوعارى بىلىمدەرى بار. وسىنداي باقىتتى سىيلاعان اللاعا ريزامىن. شۇكىرشىلىك دەيمىز. رايا ەكەۋمىز 1968 جىلى شاڭىراق كوتەرگەن ەدىك، وعان قىرىق جىلدان اسقان ەكەن، ءوزىم 70-جاسقا تولامىن، سول ەكى تويدى بىرگە وتكىزسەك دەگەن ويىمىز بار.
- اڭگىمەڭىزگە راحمەت. ۇلاعاتتى ۇستاز وزىڭىزدەي، جاپىراعىن جايعان بايتەرەك ءسىزدىڭ وتباسىڭىزداي-اق بولار! ۇرپاق تاربيەسىندەگى مەرەيىڭىز ۇستەم بولا بەرسىن دەگەن تىلەك ايتامىز، ۇستاز اعا!
اڭگىمەلەسكەن
اياپبەرگەن ساليحوۆ
جانباي اۋىلى،
يساتاي اۋدانى،
اتىراۋ وبلىسى

عيمادي جۇماعازيەۆ، ح.ناۋبەتوۆ اتىنداعى ورتا مەكتەپتىڭ ديرەكتورى:
- حاميدوللا ناۋبەتوۆ اتىنداعى ورتا مەكتەپتىڭ اشىلعانىنا بيىل 80 جىل تولماق. ءبىلىم ورداسىندا وقۋ ۇدەرىسىن تالاپقا ساي جۇرگىزۋگە قازىرگى زامانعى جاعدايلار تولىقتاي جاسالعان. كومپيۋتەرلەرمەن، ينتەراكتيۆتى تاقتالارمەن جەتكىلىكتى قامتاماسىز ەتىلگەن. سونىمەن بىرگە مۇعالىمدەرگە، اسىرەسە اۋىلعا كەلگەن جاس ماماندارعا الەۋمەتتىك-تۇرمىستىق جاعدايلار تۋعىزىلۋدا. مەكتەبىمىزدەن وسى ونداعان جىلدار ىشىندە تۇلەپ ۇشقان مىڭداعان شاكىرتتەر ەلىمىزدىڭ كوركەيۋى مەن وركەندەۋىنە ءوز ۇلەستەرىن قوسىپ، رەسپۋبليكامىزدىڭ بارلىق ايماقتارىندا ەسەلى ەڭبەك ەتىپ ءجۇر. ولاردىڭ اراسىنان مەملەكەت جانە قوعام قايراتكەرلەرىن دە، عالىمداردى دا، جازۋشى-جۋرناليستەردى دە، اكادەميكتەردى دە، مادەنيەت پەن ونەر جۇلدىزدارىن دا تابۋعا بولادى.
سونداي-اق مەكتەبىمىزدە ۇزاق جىلداردان بەرى شاكىرتتەرىن ساپالى ءبىلىم نارىمەن سۋسىنداتىپ، ولارعا سانالى ءتالىم-تاربيە بەرىپ، كەيىنگى تولقىن جاستارعا جالىقپاي ۇستازدىق دەگەن قاسيەتتىڭ ۇلىلىعىن ۇلگى-ونەگەسىمەن ۇعىندىرىپ كەلە جاتقان ۇستاز اعالارىمىز دا بارشىلىق. ماسەلەن، سولاردىڭ قاتارىنان قازاقستان رەسپۋبليكاسى ءبىلىم بەرۋ ءىسىنىڭ ۇزدىگى جانە ى.التىنسارين اتىنداعى ءتوس بەلگىسىنىڭ يەگەرلەرى اتانعان قۇرداستار امانگەلدى قاپارۇلى مەن جانبولات قاسىمۇلى اعالاردى ەرەكشە اتار ەدىم. ەكى اعا دا تابان اۋدارماستان وسى مەكتەپتە قىرىق بەس جىلدان اسا ۋاقىتتان بەرى ەڭبەك ەتىپ كەلەدى. ارداگەر اعالار بيىل ەكەۋى دە 70 جاسقا تولىپ وتىر. سونداي-اق ارداگەر ۇستازىمىز مەڭدىعالي قۋانوۆ اعامىز دا بيىل اسقارالى 60 جاسقا تولدى. بۇل قۋانىشتار بيىل سەكسەن جىل تولعالى وتىرعان ءبىزدىڭ مەكتەبىمىز بەن پەداگوگيكالىق ۇجىمىمىز ءۇشىن ۇلكەن مەرەيلى مەرەكە بولعالى تۇر. مەكتەبىمىزدە قازىر 684 وقۋشى ءبىلىم الۋدا. ولارعا 83 جوعارعى، ءبىرىنشى ساناتتى مۇعالىمدەر ءدارىس بەرۋدە. ۇستازدارىمىز بەن وقۋشىلارىمىز كوپتەگەن رەسپۋبليكالىق نەمەسە وبلىستىق پەداگوگيكالىق وقۋلار مەن عىلىمي-تاقىرىپتىق جوبالار بويىنشا بايقاۋلاردا جۇلدەگەرلەر اتانىپ جۇرگەنىن ماقتانىشپەن ايتا الامىن.