يسلام ەلدەرىندەگى جاعداي قالاي بولىپ جاتىر؟
قىتايدا ۆيرۋس شىققاندا، "بۇل مۇسىلماندارعا جاساعان جاماندىعى ءۇشىن" دەپ وسىنداعى ءبىراز جان ايدالاعا قۋىپ كەتىپ ەدى. قازىر ەندى بۇل بالەكەت ءدىن مەن دىلىڭە قاراماستان، كۇللى الەمگە تاراپ ۇلگەردى. سونىمەن يسلام ەلدەرىندەگى جاعداي قالاي بولىپ جاتىر؟
سونىمەن يراندا 38309, تۇركيادا 9217, كۋۆەيتتە 255, باحرەيندە 499, وماندا 167, يوردانيادا 259, اۋعانستاندا 120, پاكىستاندا 1625, سيريادا 5, ليۆاندا 438, پالەستينادا 109, كاتاردا 634, ءباا 570, ماروككودا 479, ساۋد ارابياسىندا 1299, يراكتا 547, تۋنيستە 312, الجيردە 511, ليۆيدا 8, مىسىردا 609 ادام جۇقتىرىپ ۇلگەرگەن. كوز جۇمعاندار دا جەتەرلىك. قاراپ تۇرساڭ بارلىق مۇسىلمان ەلدەرىندە بۇل ۆيرۋس بار. تاياۋ شىعىستان بولەك ورتالىق ازيا مەن افريكانىڭ ورتا شەگىندەگى، وڭتۇستىك شىعىس ازياداعى مۇسىلمان ەلدەرىندە دە بۇل ەپيدەميا ءورشىپ تۇر.
بىراق وسى فاكتىنى كورە تۇرا، بىزدەگى كەي جاندار ءالى ورتاعاسىرلىق دوگماتيكامەن اۋىرىپ ءجۇر. ولاردىڭ ارىسىندا "ۆيرۋستان قىرىلىپ جاتقاندىقتان يتاليا مەن يسپانيا يسلام دىنىنە جاپپاي ءوتىپ جاتىر" دەگەن فەيك ۆيدەولارعا ماساتتانىپ جۇرگەندەرى دە بار. بۇعان دەيىن دە بۇدان دا قۋاتتى ۆيرۋستار بولعان، ءالى دە بولادى. سونىڭ ءبىرى دە دىنگە قاتىسى جوق. سوندىقتان قۋا بەرمەي، بۇل جاعدايعا دۇرىس قاراۋ لازىم. "سەنى ماسكا ەمەس، يمانىڭ عانا قورعايدى" دەگەن سىندى يديوتيزمدىك ۆيدەولاردى كورۋدەن اۋلاق بولىپ، قورعانىشتى بارىنشا ارتتىرىڭىز.
دۇعا مەن سۇرەنى دە وقي بەرىڭىز. "دىنگە سەنبە" دەگەن ەشكىم جوق قوي. سەنىڭىز، مەن دە سەنەمىن. بىراق ماسكا كي، قولىڭدى جۋ، ۇيدەن شىقپاۋعا تىرىس، نامازدى مەشىتكە بارىپ ەمەس، ۇيدەن وقىڭىز. ەسىڭىزدە بولسىن، بۇل جاعدايدا ماسكا كيمەگەن دىندارعا قاراعاندا، ماسكا كيگەن ءدىنداردىڭ ءتىرى قالۋ مۇمكىندىگى ەكى ەسە كوپ.
اسحات قاسەنعاليدىڭ الەۋمەتتىك جەلىدەگى جازباسى
Abai.kz
