قازاقستاننىڭ قارجى ۆيتسە-ءمينيسترى بەرىك شولپانقۇلوۆ بۇگىن «قازاقستان قارىز بەرۋگە قاۋىپسىز ەل. سوندىقتان ءبىز ءالى قارىز الا الامىز»، - دەپ سۇيىنشىلەپتى. «KazTag» حابارلادى.

«مەملەكەتتىك قارىزدى انىقتاۋدىڭ نەگىزگى كريتەريلەرىنىڭ ءبىرى - ونىڭ قاۋىپسىز دەڭگەيدە بولۋى. قازىرگى ۋاقتا قاۋىپسىز دەڭگەي - ءجىو-ءنىڭ 23,6%-ىن قۇرايدى. ءبىز بۇل دەڭگەيدەن اسقان جوقپىز. سوندىقتان مەملەكەتتىك قارىز كورسەتكىشى قاۋىپسىز دەڭگەيدە. بۇل دەگەنىڭىز - بىزگە قارجىلاي قارىز الىپ، ونى ەكونوميكانى دامىتۋعا جۇمساۋعا مۇمكىندىك بار دەگەن ءسوز»، - دەپتى كىشى مينيستر شولپانقۇلوۆ.

ءمينيستردىڭ سوزىنەن ۇققانىمىز - ءبىزدىڭ ۇكىمەت شەتەلدىك كرەديتورلار الدىندا سەنىم ءليميتىن ءالى تاۋىسقان جوق. سوندىقتان، ءالى دە قارىز الۋعا مۇمكىندىك بار ەكەن. سوندىقتان، شەتەلدەن تاعى دا قارىز الاتىن بوپتى.

قازاقستان سىرتقى نارىقتاردان شامامەن 3 ميلليارد دوللار قارىز الادى. مۇنى دا جاڭاعى كىشى مينيستر شولپانقۇلوۆ ايتتى. «Zakon.kz» سايتى جازدى. 

«بيۋدجەت تاپشىلىعىن قارجىلاندىرۋ ءۇشىن 2,4 تريلليون تەڭگە قارىز الۋ كەرەك. ونىڭ ىشىندە 3 ميلليارد دوللاردى شەتەلدىك كاپيتال نارىقتارىنان الۋدى جوسپارلاپ وتىرمىز»، - دەپتى مينيستر.

بۇعان دەيىن ول داعدارىسقا قارسى شارالارعا 5,9 ترلن تەڭگە كولەمىندە شىعىندار قاجەت بولاتىنىن، ونىڭ 2,5 تريلليون تەڭگەسى بيۋدجەتتەن تىس قاراجات ەسەبىنەن جانە 3,5 ترلن تەڭگە رەسپۋبليكالىق بيۋدجەتتەن بولىنەتىنىن ايتقان.

بىلە جۇرىڭىزدەر:

2019 جىلعى قازان ايىنداعى كورسەتكىش بويىنشا قازاقستاننىڭ سىرتقى قارىزى - 157,7 ميلليارد دوللار. 

ونىڭ ىشىندە:

ۇلتتىق بانكتىڭ قارىزى - 634 ميلليون دوللار;

بانكتەردىڭ قارىزى - 4,6 ميلليارد دوللار;

مەملەكەتتىك باسقارۋ ورگاندارىنىڭ قارىزى - 12,8 ميلليارد دوللار;

فيرمارالىق قارىز - 98,5 ميلليارد دوللار;

باسقا سەكتورلاردىڭ قارىزى - 41,2 ميلليارد دوللار.

ال:

قازاقستانداعى ەڭ تومەنگى جالاقى - 42 500 تەڭگە;

قازاقستانداعى ەڭ تومەنگى زەينەتاقى - 38 636 تەڭگە;

قازاقستانداعى ورتاشا ايلىق جالاقى - 203 900 تەڭگە;

ايلىق ەسەپتىك كورسەتكىش - 2 651 تەڭگە;

ەڭ تومەنگى كۇنكورىس دەڭگەيى - 31 183 تەڭگە.

ال ۇلتتىق قور مەن ۇلتتىق بانكتىڭ جالپى رەزەرۆى 90 ميلليارد 425 ميلليون دوللار بولعان.

Abai.kz