ۇستىمىزدەگى جىلدىڭ 28 ناۋرىزىندا قر پرەزيدەنتى ق.توقاەۆتىڭ جارلىعىمەن گۇلشارا ناۋشاقىزى ابدىقالىقوۆا قىزىلوردا وبلىسىنىڭ اكىمى بولىپ تاعايىندالدى. پرەزيدەنت اكىمشىلىگىنىڭ باسشىسى ە.قوشانوۆ وبلىستىق ءماسليحاتتىڭ كەزەكتەن تىس سەسسياسىنا قاتىسىپ، دەپۋتاتتارعا مەملەكەت باسشىسىنىڭ گۇلشارا ابدىقالىقوۆانى وبلىس اكىمى لاۋازىمىنا تاعايىنداۋعا كەلىسىمىن بەرۋ تۋرالى ۇسىنىسىن جەتكىزدى. ولار ۇسىنىلعان كانديداتۋرانى ءبىراۋىزدان قابىلدادى.

ءبىز گۇلشارا ناۋشاقىزىن بۇرىنعى قىزمەتتەرىنەن جاقسى بىلگەندىكتەن، وعان سىر ەلىنىڭ تاربيەسى ارقىلى بويىنا سىڭىرگەن جاقسى قابىلەتتەرىن ءار سالاداعى باسشىلىق قىزمەتتەرىنەن جيناعان تاجىريبەسىنە ۇشتاستىرا وتىرىپ، ءوز ەلىنە لايىقتى ەڭبەك سىڭىرۋىنە جانە ابىروي بيىگىنەن كورىنۋىنە تىلەكتەستىگىمىزدى بىلدىرەمىز.

***

دەگەنمەن، بۇرىنعى وبلىس اكىمى قۋانىشبەك دوسمايىلۇلى ىسقاقوۆتىڭ ورنىنان الىنۋى جايلى ايتپاي كەتە المايمىز. وبلىستىڭ دارداي باسشىسىنىڭ ءبىر عانا سىبايلاس جەمقورلىققا قارسى قىزمەت تەرگەۋشىسىنىڭ قاۋلىسىمەن قامالعانى جانە اراسىنا ءبىر-اق كۇن سالىپ جاڭا اكىمنىڭ تاعايىندالعانى كوپشىلىكتىڭ كوڭىلىنە كۇدىك ۇيالاتتى. ءتىپتى ارنايى جوسپارلاعان وپەراتسياسى سياقتى كورىندى. بۇل اۋىس-ءتۇيىستىڭ ىلدىم-جىلدىم ءوتۋىن ەلدەگى توتەنشە جاعدايعا بايلانىستى شىعار دەپ تە ويلايمىز. 

ال، كەشە عانا سول اكىمنىڭ ءاربىر قادامىن، ءاربىر ايتقان ءسوزىن قالت جىبەرمەي جازىپ جۇرگەن رەسمي باق-تاردىڭ تۇك بولماعانداي، سول اكىمنىڭ ورنىنان كەتۋى جايلى ءبىر اۋىز ءۇن قاتپاي قالۋى جۋرناليستىك ەتيكاعا سىيمايتىن ءىس بولدى. دەموكراتيامىزدىڭ دەڭگەيى دە بەلگىلى بولدى. 

الەۋمەتتىك جەلىدە جۇرگەن حابارلامادا وبلىس اكىمى «ارىس قالاسىن قالپىنا كەلتىرۋگە ارنالعان اقشاعا قول سالدى»، دەلىنگەن. وزىمەن بىرگە ورىنباسارى مەن بىرنەشە كاسىپكەر كۇدىككە ىلىنگەن. ونداعى حابارلاماعا سەنسەك، اكىمگە «سىر مەيرىمى» اتتى الەۋمەتتىك قورعا جينالعان 80 ملن. تەڭگە قاراجاتتى قۇرىلىس كومپانيالارىنا اۋدارتىپ، قولما-قول اقشاعا اينالدىرعان دەگەن ايىپ تاعىپ وتىر. ايىپ تاعىلعانىمەن ادامنىڭ كىنالى ەكەنىن سوت شەشىمى عانا انىقتاماي ما؟ بىراق سوت ورگاندارى ول اقپاراتتى راستامادى. جوققا دا شىعارعان جوق.

«ونىڭ راستىعىن ءبىز ايتا المايمىز، ويتكەنى تەرگەۋ قۇپيالىعىنا بايلانىستى كىمنىڭ كىنالى، كىنالى ەمەستىگى ءالى انىقتالعان جوق. سوندىقتان دا بۇل سۇراقتاردى قاداعالاۋشى ورگان پروكۋراتۋرا ورگاندارىنان سۇراۋعا قۇقىلىسىز»،– دەيدى قىزىلوردا قالاسىنىڭ مامانداندىرىلعان تەرگەۋ سوتىنىڭ سۋدياسى تالانت تىلەپ. 

وسىلاي بىلدەي وبلىس اكىمى جانە «نۇر وتان» پارتياسىنىڭ وبلىستىق فيليالىنىڭ جەتەكشىسىنىڭ قۇقى اياققا باسىلىپ وتىرعاندا ەلدەگى قاراپايىم ادامنىڭ قۇقى قالاي قورعالادى؟ دەموكراتيالى، زايىرلى، قۇقىقتىق ەلدە ءبارى زاڭعا سايكەس بولۋى ءتيىس ەمەس پە؟ 

مەن ق.ىسقاقوۆتى ون جىلدان بەرى، كورشى بولىپ تا، جۇمىس بابىندا دا قارىم-قاتىناس جاساعان كەزىمدە، ونىڭ قىزمەت بابىن جەكە پايداسىنا جاراتۋعا اياق باسپايتىن ادام رەتىندە بىلەتىنمىن. ونى اكىمدىككە تاعايىنداپ، وبلىس اكتيۆىنە تانىستىرعاندا قىرىمبەك ەلەۋۇلى: «اۋعان سوعىسىندا ءجۇرىپ وق تيمەگەن، كوپ جىلداردان بەرى قارجى سالاسىنداعا قىزمەتىندە ارتىنان ءسوز ەرمەگەن ازامات»، دەگەن باعاسىنا تولىق قوسىلامىن. سول سەبەپتى، وڭىرىمىزدە بۇرىن-سوڭدى بولماعان وبلىس باسشىسىنىڭ اياق استىنان بوساتىلۋى، جەمقورلىقپەن كۇرەستەن گورى، تۇپتەپ كەلگەندە توپتاردىڭ تەكەتىرەسىنەن بولۋى مۇمكىن دەگەن كۇدىككە جول اشۋدا. بۇل جاعداي ءوز كەزەگىندە، بيلىككە دەگەن سەنىمدى ازايتىپ، قاشاندا جاقسى اتىمەن شىعىپ جۇرگەن وبلىسىمىزدى ۇياتقا قالدىرعان ءىس بولدى. 

سادۋاقاس اڭسات

Abai.kz