استانا قالاسىنىڭ اكىمى جەڭىس قاسىمبەك Instagram پاراقشاسىندا بەينەروليك ارقىلى تانىلعان ءۇش جاسار بۇلدىرشىنگە ارنايى سىيلىق تابىس ەتكەنىن جازدى، دەپ حابارلايدى ەلوردا اكىمدىگىنىڭ رەسمي سايتى.

«حالىقارالىق بالالاردى قورعاۋ كۇنى LRT-عا العاش مىنگەن ءساتى تۇسىرىلگەن بەينەروليكتىڭ كەيىپكەرى – ءۇش جاسار امىرەمەن كەزدەستىم.

قازاقستاندىقتاردىڭ كوبىسى امىرەنىڭ LRT ونى ەل پرەزيدەنتىمەن كەزدەسۋگە اپاراتىنىنا شىنايى سەنگەن ۆيدەوسىن تاماشالادى. ونىڭ بالالىق اڭعالدىعى، كىرشىكسىز كوڭىلى مەن قاراپايىمدىلىعى كوپشىلىكتى باۋراپ الدى.

مەملەكەت باسشىسىنىڭ تاپسىرماسى بويىنشا امىرەگە قازاقستان رەسپۋبليكاسى پرەزيدەنتىنىڭ العىس حاتىن، سونداي-اق ەستەلىك سىيلىقتار تابىستادىم.

مۇنداي ساتتەر ارمانىڭا قانات ءبىتىرىپ، جاقسىلىققا سەنۋدى، ءومىردىڭ ءاربىر قاراپايىم ساتىنە بالاشا قۋانا الۋ قاسيەتىن جوعالتپاۋ كەرەكتىگىن تاعى ءبىر مارتە ەسكە سالادى. مىنا الەمدى بالالاردىڭ پاك كۇلكىسى مەن شىنايى سەزىمى نۇرلاندىرا تۇسەدى. امىرەگە مىقتى دەنساۋلىق، ارماندارىنىڭ ورىندالعانىن جانە شاتتىققا تولى باقىتتى بالالىق شاق تىلەيمىن!» – دەپ جازدى جەڭىس قاسىمبەك.

Abai.kz