بۇل تۋرالى قازاقستاننىڭ ادىلەت مينيسترلىگى حابارلادى. ۇلتتىق بانكتىڭ ەسەپشوتى Bank of New York Mellon (BNYM) لوندونداعى بولىمشەسىنەن اشىلعاندىقتان قازاقستان ۇكىمەتى مەن بيزنەسمەندەر اراسىنداعى سوتتىڭ ءبىر بولىگى لوندوندا وتكەن.
2017 جىلى جەلتوقساندا New York Mellon بانكى اناتول ءستاتيدىڭ قازاقستان ۇكىمەتىنە قارسى ارىزى بويىنشا قازاقستان ۇلتتىق قورىنىڭ 22 ميلليارد دوللار قارجىسىن بۇعاتتاعان. مينيسترلىكتىڭ ايتۋىنشا، قازاقستان ۇكىمەتى بۇعاتتالعان قارجى كولەمىن 530 ملن دوللارعا دەيىن ازايتا العان.
2018 جىلى 25 مامىردا بەلگيا سوتى قارجى داۋىن شەشۋ ءۇشىن ءىستى انگليا سوتىنا جىبەرگەن. 2020 جىلى ءساۋىر ايىندا انگليا سوتى ءتورت كۇنگە سوزىلعان پروتسەسس كەزىندە ءىستى قاراپ، 22 ساۋىردە سوت شەشىمىن شىعارعان.
"ستاتي زاڭگەرلەرى سوتتا 530 ملن اقش دوللارى بۇل BNYM-نىڭ قازاقستان الدىنداعى قارىزى، سول سەبەپتى وعان بەلگيا سوتىنىڭ بۇعاتتاۋ تۋرالى شەشىمىن قولدانۋعا بولادى دەپ حابارلاعان. سۋديا تير ولاردىڭ كەلتىرگەن دالەلدەرىن قابىلداماي، مىناداي شەشىم قابىلداعان: قازاقستان رەسپۋبليكاسى BNYM مەن ۇلتتىق بانك اراسىنداعى جاھاندىق دەپوزيتارلىق كەلىسىمنىڭ تارابىنا جاتپايدى; جاھاندىق دەپوزيتارلىق كەلىسىم بويىنشا BNYM مىندەتتەمەلەرىنىڭ قازاقستانعا ەمەس، تەك ۇلتتىق بانككە قاتىسى بار; BNYM-ءنىڭ قازاقستان الدىندا قاراجات تولەۋ بويىنشا مىندەتتەمەلەرى جوق; قازاقستاننىڭ BNYM دەپوزيتتەرىندەگى اقشاعا قاتىستى قانداي دا ءبىر تالاپ قويۋ قۇقىعى جوق" دەلىنگەن مينيسترلىك حابارلامادا.
مولدوۆالىق بيزنەسمەن ستاتي مەن قازاقستان بيلىگى اراسىنداعى سوت بىرنەشە جىلدان بەرى جالعاسىپ كەلەدى. قازاقستاننىڭ مۇناي سالاسىنا ينۆەستيتسيا سالعان اناتول ستاتي مەن ونىڭ ۇلى گابريەل ستاتي قازاقستاننىڭ مەملەكەتتىك ورگاندارى ءوزىن "ينۆەستيتسياسىن تىم ارزانعا ساتۋعا ماجبۇرلەۋ ءۇشىن قىسپاققا العانىن" ايتادى.
بۇل ءىس بويىنشا نەگىزگى شەشىمدى 2013 جىلى جەلتوقساندا شۆەتسيانىڭ اربيتراج سوتى شىعارعان. شۆەتسيا سوتى قازاقستان ينۆەستورلار الدىنداعى حالىقارالىق مىندەتتەمەلەرىن بۇزدى دەپ تانىپ، ستاتيگە 500 ميلليون دوللار كولەمىندە ءوندىرىپ بەرۋ تۋرالى شەشىم شىعارعان. كەيىنىرەك نۇر-سۇلتان بۇل ايىپتاۋدى تەرىستەپ، ءستاتيدى "الاياقتىق جاسادى" دەپ ايىپتادى.
سودان بەرى ستاتي بىرنەشە مەملەكەتتە سوت شەشىمىن كۇشپەن ورىنداتۋعا كۇش سالىپ كەلەدى.
2019 جىلى مامىردا نيدەرلاند سوتى قۇنى 5,2 ميلليارد دوللار تۇراتىن نيدەرلاندتىڭ KMG Kashagan B.V. كومپانياسىنداعى "سامۇرىق-قازىنا" مەملەكەتتىك قورى اكتسيالارىنا سالىنعان تىيىمدى كۇشىندە قالدىردى. بۇل اكتسيالارعا قازاقستان ۇكىمەتى مەن اناتول ستاتي اراسىنداعى داۋ اياسىندا تىيىم سالىنعان ەدى.
وسىدان بىرنەشە جىل بۇرىن ۇلتتىق قور اكتيۆتەرىنىڭ بۇعاتتالۋى تۋرالى حابار قازاقستان قوعامىندا قىزۋ تالقىلانىپ، كەيبىر ساراپشىلار ماسەلەگە الاڭداعان.
Abai.kz
