بىراق ول رۇقسات قانشالىقتى زەردەلەنگەن؟

ول ادامدار سۋرەتى ينتەرنەتكە ءبىر ەنسە، جوعالمايتىنىن بىلە مە؟ بالالارىمەن بىرگە تۇسەتىندەر بار. ول سۋرەت بالاسىنىڭ بۋللينگ قۇربانى بولۋىنا اكەلۋى مۇمكىن ەكەنىن بىلە مە؟

“جۋرناليستيكا ەتيكاسى” دەپ اتالاتىن ساباقتا پروفەسسورىمىز جاعدايى اۋىر ادامنىڭ سۋرەتىن نە اتى-ءجونىن جاريالاردا كەلىسىمنىڭ زەردەلەنگەنىنە كوز جەتكىزىڭدەر دەپ ءجيى ايتاتىن. بۇل ماسەلە نيۋ-يورك سەكىلدى مەگاپوليستە اسا ماڭىزدى. سەبەبى ونداي قالادا ميگرانتتار كوپ بولادى. ول ميگرانتتار اقش-تا مەديانىڭ قالاي جۇمىس ىستەيتىنىن، جاريالانعالى وتىرعان ماقالانىڭ كەيىن زاردابى ءتيۋى ىقتيمال ەكەنىن اڭعارماۋى مۇمكىن.

ونىڭ ۇستىنە ءدال قازىر اش وتىرىپ، ءتىرى قالۋدان باسقانى ويلاي الماي جۇرگەن ميگرانت ەرتەڭ اياققا تۇرىپ، ۇيلەنىپ، جۇمىس تاۋىپ، جاڭا ورتاعا ەنۋى مۇمكىن. ينتەرنەت تەلەديدار نە گازەت ەمەس، اتى-ءجونىڭىزدى Google-گە تەرسە جيىرما جىلعى ماقالانى دا شىعارىپ بەرەدى. بۇگىندە تاسى ورگە دومالاپ تۇرعان تۇلعا كەشە قايىرشى بولعانىن جۇرتقا جاريا ەتكىسى كەلمەۋى مۇمكىن. Privacy دەگەن نارسە بار.

ماسەلەنىڭ كەلەسى قىرى

تاراپتاردىڭ سالماعى تەڭ بولماعاندا ءوتىنىش بۇيرىققا تەڭ. ماسەلەن، باستىعىڭىزدىڭ ءوتىنىشى سىزبەن دارەجەسى بىردەي ارىپتەسىڭىزدىڭ وتىنىشىمەن بىردەي ەمەس. ارىپتەسىڭىزگە وپ-وڭاي جوق دەي العانىڭىزبەن، باستىعىڭىزعا ولاي ايتا المايسىز. ء“وتىنىشتى” ورىنداماساڭىز، كەيىن باسەكەڭ قىر كورسەتەدى.

جاعدايى مۇشكىل ەكەنىن كورسەتۋگە ءماجبۇر بولعاندىقتان، كىسى قولىنان اۋاداي قاجەت ازىق-تۇلىكتى تەگىن الىپ تۇرعان سوڭ، ەرىكتىنىڭ وتىنىشىنە جوق دەپ ايتۋ اۋىر.

مۇندايدا كىسىنى ىڭعايسىز جاعدايعا قالدىرماۋ - ەرىكتىنىڭ جاۋاپكەرشىلىگى.

P.S. “ەرىگىپ سىناعانىم” ەمەس، قىزمەتتەرىڭىزدى باعالايمىن، ەلگە كومەكتەسكەن دۇرىس. بىراق ايتپاعىم، ءسىز كوزدەگەن اۋديتوريا ءسىزدىڭ سوزىڭىزگە فوتوسىز سەنبەيتىن بولسا، سەنىمدى ورناتۋدىڭ باسقا جولىن دا قاراستىرۋدى ۇمىتپاساڭىز يگى.

دارحان ومىربەكتىڭ الەۋمەتتىك جەلىدەگى جازباسى

Abai.kz