جۋىردا عانا قىزىلوردا وبلىسىنىڭ اكىمى بولىپ تاعايىندالعان گۇلشارا ابدىقالىقوۆا كۇنى كەشە «Nur Otan» پارتياسىنىڭ قىزىلوردا وبلىستىق فيليالىنا توراعا بولىپ سايلاندى.

ناقتىراق ايتساق، جەتەكشى پارتيانىڭ كەزەكتەن تىس كونفەرەنتسياسى بارىسىندا گۇلشارا ناۋشاقىزى پارتيانىڭ وبلىستىق فيليالىنىڭ تىزگىنىن ۇستادى. ال، ەلىمىزدە ەنگىزىلگەن كوروناۆيرۋس پاندەمياسىمەن كۇرەس شارالارىنىڭ نەگىزىندە ەنگىزىلگەن شەكتەۋلەرگە بايلانىستى پارتيا جيىنى العاش رەت ونلاين رەجيمدە وتكىزىلدى.

ونلاين جيىن بارىسىندا پارتيا توراعاسىنىڭ ءبىرىنشى ورىنباسارى باۋىرجان بايبەك بەينەكونفەرەنتس بايلانىسى ارقىلى ءسوز سويلەپ، ەلىمىزدەگى قازىرگى كەزدەگى احۋالعا توقتالىپ ءوتتى. پارتيا ليدەرى نۇرسۇلتان نازارباەۆتىڭ تاپسىرماسىمەن «Nur Otan» پارتياسىنىڭ قىزمەتى قايتا باعدارلانعانىن ايتتى.

ايت كەتۋ كەرەك، بۇگىندە نۇروتان پارتياسىنىڭ بارلىق رەسۋرسى ەل پرەزيدەنتى قاسىم-جومارت توقاەۆتىڭ باستاماسىمەن قولعا الىنعان كوروناۆيرۋسپەن كۇرەس جاعدايىندا مۇقتاج قازاقستاندىقتارعا كومەك ۇيىمداستىرۋ شارالارىن قولداۋعا جۇمىلدىرىلعان.

-ەلباسىنىڭ بۇگىن جارىق كورگەن ماقالاسىندا «ءار مينيستر، ءاربىر وبلىس، قالا جانە اۋدان باسشىلارى جۇيەمەن، تارتىپپەن، ۇيلەسىممەن، ناقتى جوسپارمەن، نىق سەنىممەن ارەكەت ەتىپ، ۋاقىتشا قيىندىقتان شىعۋعا بارلىق كۇش-قۋاتتى جۇمىلدىرۋى قاجەتتىگىن ايتتى. «Nur Otan» پارتياسىنىڭ مۇشەلەرى دە وسى ءبىر ساۋاپتى ءىستىڭ الدىڭعى قاتارىنان تابىلۋعا ءتيىس، - دەدى باۋىرجان بايبەك.

ال، پارتيانىڭ وڭىرلىك فيليالى وسى باعىتتاعى جۇمىستاردى كۇشەيتىپ، مەملەكەت باسشىسى جاريالاعان داعدارىسقا قارسى بارلىق شارالاردىڭ ورىندالۋىن قاتاڭ باقىلاۋدا ۇستاۋ كەرەكتىگى جونىندە ايتىلدى.

بۇگىندە پارتيا توراعاسى نۇرسۇلتان نازارباەۆتىڭ تاپسىرماسىنا سايكەس، كارانتين تارتىبىنە وراي، 13 ناۋرىزدان باستاپ پارتيانىڭ بارلىق قوعامدىق قابىلداۋ بولىمدەرىندە ازاماتتاردى قابىلداۋ جۇمىستارى ۋاقىتشا توقتاتىلىپ، ونلاين رەجيمگە كوشىرىلگەن. سايكەسىنشە، اتالعان پارتياعا ونلاين رەجيمدە ءوتىنىش بەرۋ 2 ەسەگە، Facebook, Instagram الەۋمەتتىك جەلىلەرىندە - 4 ەسە، WhatsApp جەلىسى ارقىلى - 7 ەسەگە ارتقان.

جولدانعان ماسەلەلەرگە بايلانىستى پارتيانىڭ ايماقتىق فيليالدارىنا الەۋمەتتىك جەلىلەر ارقىلى كەلىپ تۇسكەن بارلىق وتىنىشتەردى تىركەۋ جانە قوعامدىق-ساياسي جاعدايعا مونيتورينگ جاساۋ ءۇشىن ناقتى تاپسىرما بەرىلگەن. بۇل تۇرعىدا باۋىرجان بايبەك ازاماتتاردىڭ ءوتىنىشىن قاناعاتتاندىرۋ ماقساتىندا سەنىم تەلەفوندارىن ەنگىزۋ قاجەتتىگىن ايتتى.

-پارتيانىڭ ايماقتىق جانە اۋماقتىق فيليالدارى قيىن جاعدايعا تاپ بولعان ازاماتتارعا كومەك كورسەتۋ جانە تۇرعىنداردان تۇسكەن تەلەفون قوڭىراۋلاردى رەتتەۋ ماقساتىندا سەنىم تەلەفوندارى جۇمىستارىن ۇيىمداستىرۋ قاجەت -, دەدى پارتيا توراعاسىنىڭ ءبىرىنشى ورىنباسارى.

ونىڭ ايتۋىنشا، پرەزيدەنت تاپسىرماسىنا سايكەس «حالىق ۇنىنە قۇلاق اساتىن مەملەكەت» كونتسەپتسياسى اياسىندا پارتيالىق باقىلاۋ كوميسسياسى مەن سىبايلاس جەمقورلىققا قارسى كۇرەس كەڭەستەرىنىڭ جۇمىسى كۇشەيتىلگەن. بارلىق وڭىرلىك «Birgemiz» قورلارىندا جۇمىس قىزۋ جۇرگىزىلۋدە. تەك قىزىلوردا وبلىسىنىڭ وزىندە 2 مىڭداي وتباسى اتاۋلى كومەككە يە بولعان.

باۋىرجان بايبەك جۋىردا قىزىلوردا وبلىسىنىڭ اكىمى بولىپ تاعايىندالعان گۇلشارا ابدىقالىقوۆانىڭ كانديداتۋراسىن پارتيانىڭ وبلىستىق فيليالىنىڭ توراعالىعىنا ۇسىنا وتىرىپ، ونىڭ مەملەكەتتىك حاتشى، ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى رەتىندە ەلىمىزدە گەندەرلىك ساياساتتىڭ ىسكە اسىرىلۋىنا ەلەۋلى ۇلەس قوسقانىن اتاپ ءوتتى.

-جۋىردا قىزىلوردا وبلىسىنا ەلباسى كەلىسىمىمەن، مەملەكەت باسشىسىنىڭ جارلىعىمەن ابدىقالىقوۆا گۇلشارا ناۋشاقىزى اكىم بولىپ تاعايىندالدى. ول – ەلىمىزدە وبلىس باسقارۋعا تاعايىندالعان ءبىرىنشى ايەل اكىم. وسى سىر ءوڭىرىنىڭ تۋماسى. ەلباسى ەلىمىزدىڭ سايلانبالى ورگاندارىندا ايەل ازاماتتاردىڭ ۇلەسىن 30%-كە جەتكىزۋدى تاپسىرعانىن بىلەسىزدەر.  بۇل قادام وسى ۇردىسكە جاقسى جول اشىپ وتىر. سونىمەن بىرگە ورتالىق اپپارات قازىرگى كەزدە پارتياىشىلىك تاڭداۋ – پرايمەريزدى وتكىزۋدە ونلاين-تەحنولوگيانى پايدالانۋ جولدارىن پىسىقتاۋدا، سول كەزدە وسىنى ەسكەرەتىن بولامىز, - دەدى ول.

ءوز كەزەگىندە گۇلشارا ابدىقالىقوۆا پارتيا ليدەرى نۇرسۇلتان نازارباەۆ پەن پارتيالاستاردىڭ وزىنە ارتقان سەنىمى ءۇشىن العىسىن ءبىلدىردى.

-ءبىزدىڭ الدىمىزدا ەڭ ءبىرىنشى كەزەكتە، ەلباسى اتاپ وتكەندەي، پارتيانىڭ بارلىق رەسۋرستارىن پرەزيدەنت قاسىم جومارت كەمەلۇلى توقاەۆتىڭ باسشىلىعىمەن جۇزەگە اسىرىلاتىن جۇمىستارعا باعىتتاۋ مىندەتى تۇر. سوندىقتان پارتيا ءۇشىن ەڭ ماڭىزدى ماسەلە - وسىنداي قيىن كەزەڭدە حالىقپەن بىرگە بولىپ، ولارعا بارىنشا قولداۋ كورسەتۋ - گۇلشارا ناۋشاقىزى.

بۇگىندە «Nur Otan» پارتياسى ەلىمىزدەگى ءاربىر وبلىستىڭ، اۋدان مەن قالانىڭ الداعى 5 جىلعا ارنالعان جاڭا دامۋ باعدارلامالارىن ازىرلەۋ بويىنشا اۋقىمدى جۇمىس جۇرگىزدى. اتالعان ايماقتىق دامۋ باعدارلامالارىندا ءاربىر ءوڭىردىڭ جەرگىلىكتى ەرەكشەلىگى ەسكەرىلە وتىرىپ، ءاربىر ازاماتتىڭ ناقتى قاجەتتىلىكتەرى كورىنىس تابادى. ەلباسىنىڭ تاپسىرماسى بويىنشا پارتيا توراعاسىنىڭ ءبىرىنشى ورىنباسارى وسى كەزگە دەيىن اتىراۋ، پاۆلودار، تۇركىستان، جامبىل جانە باسقا دا وبلىستاردىڭ شالعاي اۋىلدارىنا دەيىن ارالاپ، وڭىرلەردىڭ جاي-كۇيىمەن تىكەلەي تانىسىپ شىقتى.

ال، سوڭعى جارتى جىلدا باۋىرجان بايبەك قىزىلوردا وبلىسىنىڭ بىرقاتار اۋداندارىندا ەكى رەت بولىپ، تۇرعىندارمەن كەزدەسكەن بولاتىن.

كەزدەسۋ بارىسىندا باۋىرجان بايبەك "Nur Otan" پارتياسىنىڭ الداعى ۋاقىتتاعى مىندەتتەرىن بەلگىلەپ، سايلاۋالدى شتابتىڭ جۇمىسىنا بەلسەندى قاتىسقان پارتيا مۇشەلەرىن پرەزيدەنتتىڭ العىس حاتىمەن ماراپاتتاعان ەدى.

ايتا كەتەيىك، قىزىلوردا وبلىسىندا "Nur Otan" پارتياسىنىڭ 51333 مۇشەسى  مەن 245 باستاۋىش پارتيا ۇيىمى جۇمىس ىستەيدى. 2018 جىلى پارتيا فيليالدارىنىڭ قوعامدىق قابىلداۋلارىنا ايماق تۇرعىندارىنان 3196 ءوتىنىش ءتۇسىپ، ولاردىڭ 35,5 پايىزى وڭ شەشىمىن تاپقان. ال اعىمداعى جىلدىڭ 6 ايىندا 1738 ءوتىنىش كەلىپ تۇسكەن. ولاردىڭ 80 پايىزعا جۋىعى الەۋمەتتىك قامسىزداندىرۋ، تۇرعىن ءۇي، جۇمىسپەن قامتۋ سەكىلدى ماسەلەلەردەن قۇرالعان. وسى وتىنىشتەردىڭ 28,1 پايىزى وڭ ناتيجەسىن تاپقان.

وسىلايشا، ەلىمىزدەگى قيىن جاعدايدا ەل جانىنان تابىلعان جەتەكشى پارتيا جۇمىسى ءار ايماقتا دا قارقىندى جۇرگىزىلمەك. سونىمەن قاتار اتالعان پارتيانىڭ الداعى ۋاقىتتا دا حالىقپەن تىعىز بايلانىسى ءوز جالعاسىن تاپپاق.

Abai.kz