جۋىردا ەلباسى نۇرسۇلتان نازارباەۆتىڭ “بىرلەسە بىلگەن ەل ءبارىن جەڭەدى” اتتى ماقالاسى جارىق كورگەن بولاتىن. بارشى الەمدى الاڭداتىپ وتىرعان كوروناۆيرۋس پاندەياسىنا بايلانىستى جاريالانعان بۇل ماقالاعا قازاقستان حالقى اسسامبلەياسىنىڭ توراعاسى جانسەيىت تۇيمەباەۆ تا ءۇن قوستى.

 تۇيمەباەۆ مىرزانىڭ ايتۋىنشا، ەلباسى ساياسي كوشباسشىلىق جاساعان جىلدارىندا قازاقستاندىقتاردىڭ الەۋمەتتىك ءھام ەكونوميكالىق احۋالى ارتقان.

- قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆ ءوزىنىڭ ساياسي كوشباسشىلىعى جىلدارىندا قازاقستان حالقى اسسامبلەياسىنىڭ توراعاسى رەتىندە «قاۋىپسىزدىك بەلدەۋىن» – حالقىمىزدىڭ بىرلىگى مەن ىنتىماعىن نىعايتىپ،ەلىمىزدىڭ ەكونوميكالىق جانە الەۋمەتتىك الەۋەتىن دايەكتى تۇردە ارتتىردى،-دەدى.

سونىمەن قاتار ول ەلباسى قۇرعان ۇلتتىق قور جونىندە دە ءوز پىكىرىن ءبىلدىردى.

-قازاقستان رەسپۋبليكاسىنىڭ ۇلتتىق قورى قۇرىلعان كەزدە ءارتۇرلى قوعام جانە ساياسي قايراتكەرلەر تاراپىنان قانشاما سىن مەن نارازىلىق بولعانى بارلىعىمىزعا بەلگىلى. سول كەزدە وزدەرىن حالىق يگىلىگىنىڭ قامقورشىلارى رەتىندە كورسەتە وتىرىپ، ولار «بارلىعىن تاراتىپ بەرۋگە» شاقىردى. ەگەر بۇل «شاريك» ءتاسىلى سول كەزدە ىسكە اسىرىلسا، وندا بۇگىندە ەل ۇلتتىق اپاتتىڭ الدىندا بولار ەدى،-دەدى تۇيمەباەۆ.

ونىڭ ايتۋىنشا، ەلباسىنىڭ قابىلداعان شەشىمدەرى ناتيجەسىندە حالىقتىڭ الەۋمەتتىك ينفراقۇرىلىم ارتقان.

-ەلباسى تاۋەلسىزدىك جىلدارى ەلىمىز­دىڭ الەۋمەتتىك ينفراقۇرىلىمىن ارت­تىرۋعا ەرەكشە كوڭىل ءبولدى – «100 مەك­تەپ – 100 اۋرۋحانا»، «سالاماتتى قازاق­ستان» باعدارلامالارى ەلىمىزگە زاماناۋي مەديتسينالىق ينفراقۇرىلىم، وزىق جابدىقتالعان عىلىمي-مەديتسينالىق ورتالىقتار، بۇگىندە كوروناۆيرۋس پاندەمياسىنا لايىقتى جاۋاپ بەرە الاتىن جوعارى كاسىبي كادرلار تاربيەلەدى.

سونىمەن قاتا، ول«داعدارىس – بۇل جاڭا مۇمكىندىكتەر» –وسىنداي قاعيداتتى ەلباسى ن.ءا.نازارباەۆ كۇردەلى جاعدايلاردا ءاردايىم باسشىلىققا الدى جانە ول ءوزىنىڭ وڭ جەمىسىن بەردى.

بۇگىنگى تاڭدا ايتارلىقتاي وندىرىستىك الەۋەت قۇرىلدى، ءار جاڭا داعدارىس جاع­دايىندا ەلدىڭ كولىك ينفراقۇرىلىمى دامىدى، اۋىل شارۋاشىلىعى قۋاتتى سەرپىن الدى، ول قازاقستاننىڭ كوپتەگەن ءوڭىرىنىڭ دامۋ لوكوموتيۆىنە اينالدى. مۇناي باعاسىنىڭ قۇلدىراۋى جاعدايىن­دا اگروونەركاسىپتىك سەكتور ءبىزدىڭ ەكونومي­كامىزدىڭ دامۋ باسپالداعى بولا الادى جانە بولۋى كەرەك، مۇندا ءبارى تەك وزىمىزگە بايلانىستى،- دەدى قحا توراعاسى.

ودان بولەك، جانسەيىت قانسەيىتۇلى اسسامبلەيانىڭ اتقارىپ جاتقان جۇمىستارىنا توقتالدى. ونىڭ ايتۋىنشا، اسسامبلەيا كارانتين كەزىندە دە قولدا بار مۇمكىندىكتەرمەن ازاماتتىق تاتۋلىق پەن كەلىسىمدى نىعايتۋعا، تابىسى از ادامداردى قولداپ، كارانتيندىك ءىس-شارالاردى قامتاماسىز ەتۋگە حالىقتى جۇ­مىلدىرۋ جانە توتەنشە جاعداي رەجىمى تالاپتارىن ورىنداۋ جونىندەگى جۇمىستاردى جالعاستىرىپ جاتقان كورىنەدى.

-ناۋرىز ايىنىڭ ورتاسىنان باس­تاپ مەديتسينالىق بەتپەردەلەر دايىنداۋ جانە تاراتۋ بويىنشا قحا-نىڭ رەسپۋب­ليكالىق «ءبىز بىرگەمىز!» اكتسياسى وتۋدە. بۇگىندە ەلىمىزدىڭ بارلىق وڭىرىندە 170 مىڭعا جۋىق قورعانىش بەتپەر­دە مۇقتاج ازاماتتارعا تەگىن تاراتىل­دى. اسسام­بلەيانىڭ كاسىپكەرلەر قاۋىم­داستىعى، ەتنومادەني بىرلەستىكتەر مەن دوستىق ۇيلەرى، كورەي، ۇيعىر جانە نەمىس تەاترلارىنىڭ ۇجىمدارى قورعانىش بەت­پەردەلەرىن تىگەتىن شەبەرحانالار ۇيىم­داستىردى جانە حالىققا تاراتتى،-دەدى تۇيمەباەۆ.

سونىمەن قاتار، اسسامبلەيانىڭ #BizBirgemiz قايى­رىمدىلىق اكتسياسى اياسىندا ەلىمىزدىڭ بارلىق وڭىرىندە 66 مىڭنان استام ادام­عا 83 ملن 386 مىڭ تەڭگە كولەمىندە گۋمانيتارلىق كومەك كورسەتىلگەن.

-بۇل سانداردىڭ ارتىندا – قيىن ساتتە حالىقپەن ءبىرتۇتاس ەكەنىن سەزىنىپ، قولىنان كەلگەن كومەكتەن ايانباي، قايىرىمدىلىق شارالارىن ۇيىمداستىرۋعا اتسالىسقان ءتۇرلى ەتنوستىڭ مىڭداعان وكىلىنىڭ ەڭبەگى جاتىر،-دەدى قحا توراعاسى.

ودان بولەك، اسسامبلەيا مۇشەلەرى COVID-19 ۆيرۋ­سىنىڭ ىندەتىنە قارسى تۇرۋ، كارانتيندىك رەجىمدى ساقتاۋ جانە الدىن الۋ شارالارى جونىندە قحا اقپاراتتىق-ءتۇسىندىرۋ جۇمىستارىن ۇيىمداستىرعان. شىعىس قازاقستان، سولتۇستىك قازاقستان، پاۆلودار جانە باسقا دا وبلىستاردىڭ ۆولونتەرلەر كلۋبىنىڭ مۇشەلەرى ساقتىق شارالارى تۋرالى، سونداي-اق ازىق-تۇلىك ساتىپ الۋ، حقو-دان قۇجاتتاردى ونلاين رەجىمىندە رەسىمدەۋ جانە الۋ مۇمكىندىگى تۋرالى اقپاراتتىق پاراقشالاردى تاراتۋدى ۇيىمداستىردى. وسىنداي جۇمىستار قحا الەۋمەتتىك جەلىلەرىندە دە جۇرگىزىلدى.

سونىمەن قاتار #بىزۇيدەمىز بىرىڭعاي حەشتەگىمەن ءىس-شارالار وتكىزۋگە باستاماشىلىق جاساپ، ءتۇرلى جەلىلىك جوبالار مەن بەينەساباقتار ۇيىمداستىردى. جانە، قحا مۇشەلەرى ينتەرنەت جەلىسىندە مەملەكەتتىك ءتىلدى ونلاين وقىتۋ جۇمىستارىن ۇيىمداستىردى (ۆ. كيم).

قحا توراعاسىنىڭ ايتۋىنشا، كارانتين كەزىندە ءار ايماق فيليالدارى ۇلكەن بەلسەندىلىك تانىتقان. ماسەلەن، قاراعاندى قالاسىنىڭ دوستىق ءۇيى ەتنوستار وكىلدەرىنە جانە قازاق، اعىلشىن تىلدەرىن وقىتۋ بويىنشا بەلسەندى ۇزاق ءومىر ءسۇرۋ ورتالىعى وكىلدەرىنە ارنالعان اپتاسىنا ءتورت رەت وتەتىن بەينەساباقتار ۇيىمداستىرعان. ال، قوستانايلىق قحا مەملەكەتتىك ءتىلدى وقىتۋ بويىنشا «مامىلە. سيتۋاتيۆنىي كازاحسكي» ونلاين-ساباقتار سەرياسىن ىسكە قوستى. سولتۇستىك قازاقستان وبلىسىندا «مامىلە» جوباسىنىڭ ونلاين نۇسقاسى ىسكە قوسىلدى (#ونلاينمامىلەسقو), ول «@ank_sko» ءىnstagram پاراقشاسىندا ىسكە اسىرىلادى. وسىعان ۇقساس جوبالار باسقا وبلىستاردا باستالدى.

نۇر-سۇلتان قالاسى قحا جاستارى، قحا «جاڭعىرۋ جولى» رەسپۋبليكالىق جاستار قوزعالىسىنىڭ ەلوردالىق شتابى #بىزۇيدەمىز جوباسىن قولداۋ ماقساتىندا، ابايدىڭ 175 جىلدىعىنا وراي #اباي175قحا حەشتەگىمەن بەينە-چەللەندجگە جانە «كوزىمنىڭ قاراسى» ءانىن ونلاين ورىنداۋعا باستاما جاسادى.

قىزىلوردا وبلىسىندا كورنەكتى اقىن­دار مەن جازۋشىلاردىڭ شىعار­مالارىنان ءۇزىندى وقۋ اكتسياسى وتكىزىلدى. بەتپەردەلەر تىگۋ بويىنشا شەبەرلىك ساباقتارى – 4 روليك ورنالاستىرىلدى. «Instagram»، «ودنوكلاسسنيكي»، «ۆكون­تاكتە»، «فەيسبۋك» الەۋمەتتىك جەلىلە­رىندە قان دونورلىعىن ناسيحاتتاۋ بو­يىنشا «ءبىزدىڭ قانىمىز بىردەي» بەينە-چەللەندجىن ىسكە قوستى. بارلىق ءوڭىر #BizBirgemiz چەلەندجىن قولداۋعا ۇقساس بەينەكونتەنت ورنالاستىردى. ۇيعىر، كورەي جانە نەمىس ۇلتتىق تەاترلارى ينتەرنەت جەلىسىنىڭ ءتۇرلى پلاتفورمالارىندا ونلاين-كورسەتىلىمدەر ۇيىمداستىرىپ، سپەكتاكلدەر كەستەسىن جاريالاعان.

اسسامبلەيا وڭىرلەردە كارانتيندىك ءىس-شارالاردى قامتاماسىز ەتەتىن مەديتسينا قىزمەتكەرلەرىن، ىشكى ىستەر ورگاندارى مەن تجك جەكە قۇرامىن، اسكەري قىزمەتشىلەردى قولداۋ جونىندەگى ءىس-شارالارعا قاتىسادى. الماتى قالاسىندا الماتى وبلىسىنىڭ № 11 قوسالقى ستانساسىنا كومەك كورسەتىلدى. 1 ملن تەڭگەگە 160 ازىق-تۇلىك پاكەتى قۇرىلىپ، 71 جەدەل جاردەم قىزمەتكەرىنە تاپسىرىلدى. «سولتۇستىك قازاقستانداعى «اسسامبلەيا» كورپوراتيۆتىك قورى پەتروپاۆل قالاسى اۋرۋحانالارىنىڭ دارىگەرلەرى ءۇشىن وباعا قارسى 25 كوستيۋم ساتىپ الدى. قوسىمشا 10 ارنايى كوستيۋم ساتىپ الۋ جوسپارلانۋدا.

قوستاناي وبلىسىنىڭ قحا ۆولونتەرلەرى زەينەتكەرلەر مەن ۇلى وتان سوعىسىنىڭ ارداگەرلەرىنە تەگىن ءدارى-دارمەكتەر تاراتۋدا مەديتسينالىق مەكەمەلەرگە قولداۋ كورسەتتى. الماتى وبلىسىنىڭ ۆولونتەرلەرى تالدىقورعان قالاسىنىڭ كىرەبەرىسىندەگى سانيتارلىق بەكەتتەرگە ىستىق تۇسكى اس جەتكىزۋدى قامتاماسىز ەتتى.

قورىتا ايتقاندا، كوروناۆيرۋس پاندەمياسىنىڭ كەڭ تارالۋى بارشا الەم حالقىن ابىگەرگە سالىپ وتىر. بۇل ءوز كەزەگىندە ەل كوشباسشىلارىنا دا ۇلكەن سىناق ەكەنى ءسوزسىز. الايدا، بۇل تۇرعىدا قازاقستان قاۋىپتى ىندەتتىڭ الدىن الۋ شارالارىن دەر كەزىندە قابىلداعانى ازاماتتاردىڭ قاۋىپسىزدىگىنە كەپىل بولدى. ال، ەلباسى ماقالاسى ەرتەڭگە دەگەن سەنىمدى نىقتاي تۇسكەندەي.

Abai.kz