بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن ءوتىپ جاتقان جالپى وتىرىستا دەپۋتاتتاردىڭ زاڭ شىعارۋشىلىلىق جۇمىسىنا باسا نازار اۋدارىلدى.

بۇل تۋرالى نۇرلان نىعماتۋلين حالىقارالىق اۆتوموبيل تاسىمالدارىن قاداعالاپ وتىرۋ ماسەلەلەرىنە قاتىستى زاڭ جوباسىن تالقىلاۋ بارىسىندا ايتتى.

«ءبىز دەپۋتاتتارىمىزدىڭ باستاماسىمەن ازىرلەنگەن تاعى ءبىر زاڭ جوباسىن ماقۇلدادىق. ەرەكشە ايتۋ كەرەك، ءبىزدىڭ دەپۋتاتتاردىڭ زاڭ شىعارۋ باستاماشىلىعى وسى سەسسيادا وتە جوعارى. مىسالى، 41 زاڭ جوباسىنا دەپۋتاتتار وزدەرى باستاماشى بولدى. الدىمىزدا تاعى دا ونشاقتى زاڭ جوباسى بار»، - دەدى ءماجىلىس توراعاسى.

ماقۇلدانعان قۇجاتتا ۇكىمەتكە حالىقارالىق تاسىمالداردى قاداعالاپ وتىرۋ جۇيەسىنىڭ ۇلتتىق وپەراتورىن ايقىنداۋ بويىنشا قۇزىرەتتىلىك بەرۋ ۇسىنىلادى. سونىمەن قاتار، حالىقارالىق اۆتوموبيل تاسىمالدارىن جۇزەگە اسىرۋ كەزىندە ەلەكتروندىق سايكەستەندىرگىشتەردى (ناۆيگاتسيالىق پلومبالاردى) پايدالانۋ بولىگىندە تاسىمالداۋشىلارعا قويىلاتىن تالاپتاردى بەلگىلەۋ قاراستىرىلعان.

وسىلاردىڭ قاتارىندا ەلەكتروندىق سايكەستەندىرگىشتەردى قاساقانا بۇلدىرگەنى نەمەسە جويعانى ءۇشىن اكىمشىلىك جاۋاپتىلىقتى ەنگىزۋ جانە ەلەكتروندىق سايكەستەندىرگىشتەردى پايدالانۋ ءتارتىبىن سالىق جانە بيۋدجەتكە تولەنەتىن باسقا دا مىندەتتى تولەمدەردىڭ ءتۇسۋىن قامتاماسىز ەتۋ سالاسىندا باسشىلىقتى جۇزەگە اسىراتىن ۋاكىلەتتى ورگاننىڭ بەكىتۋى كوزدەلەدى.

Abai.kz