بۇگىن قازاقستان پارلامەنتىنىڭ جوعارعى پالاتاسى (سەنات) «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنا تولىقتىرۋلار ەنگىزۋ تۋرالى» كونستيتۋتسيالىق زاڭى مەن «ساياسي پارتيالار تۋرالى» زاڭىنا وزگەرىس پەن تولىقتىرۋلار ەنگىزۋ تۋرالى» زاڭداردى قابىلدادى.

ايتا كەتەيىك، اتالمىش زاڭدارعا وزگەرىستەر مەن تولىقتىرۋلار ەنگىزۋ ماسەلەسى قر ۇلتتىق قوعامدىق سەنىم كەڭەسىنىڭ ەكىنشى وتىرىسىندا ايتىلعان بولاتىن.

قازاقستان پرەزيدەنتىنىڭ كەڭەسشىسى ەرلان قارين جەلىدەگى جازباسىندا:

«بۇگىن سەنات  سايلاۋ جانە ساياسي پارتيالار تۋرالى زاڭداردى ماقۇلدادى. وندا ساياسي پارتيالار ءۇشىن تىركەلۋ بارەرى ەكى ەسەگە دەيىن ازايتىلىپ، پارتيالىق سايلاۋ تىزىمدەرىنە جاستار مەن ايەلدەر ءۇشىن 30 پايىزدىق كۆوتا ەنگىزىلگەن.

اتالعان وزگەرتۋلەر پرەزيدەنت قاسىم-جومارت توقاەۆتىڭ باستاماسىمەن 2019 جىلدىڭ جەلتوقسانىنداعى ۇلتتىق كەڭەستىڭ ەكىنشى وتىرىسىندا كوتەرىلگەن بولاتىن. مىنە، بۇگىن سول جاڭا نورمالاردى سەنات ماقۇلدادى.

اتالعان نورمالار – بۇل سالماقتى ساياسي باستاما. مىسالى، ماسليحاتتارداعى 3 335 ورىننىڭ تەك 740-ى عانا ايەلدەرگە تيەسىلى بولىپ كەلگەن. ال 29 جاسقا دەيىنگى بار-جوعى 53 جاس دەپۋتات بولعان. سەناتور ءلاززات سۇلەيمەننىڭ ايتۋىنشا، ونىڭ 44-ءى اۋداندىق ءماسليحاتتىڭ دەپۋتاتتارى. ال وبلىستىق ءماسليحاتتا ءتىپتى جوق دەسە دە بولادى.

سوندىقتان بۇل نورمالار ەلدەگى قوعامدىق-ساياسي پروتسەسستەرگە جاستار مەن ايەلدەردى ودان گورى بەلسەندى ارالاستىرۋعا مۇمكىندىك بەرەدى»، - دەپ جازىپتى.

ال قر ادىلەت ءمينيسترىنىڭ مىندەتىن اتقارۋشى ناتاليا پان:

«جالپى، بۇگىندە الەمدەگى مەملەكەتتەردىڭ باسىم بولىگى ايەلدەر مەن جاستاردىڭ سايلاۋ پروتسەسىنە تەڭ قولجەتىمدىلىگىنە كەپىلدىك بەرۋ ءۇشىن قاجەتتى شارالار قابىلداۋدا. سونىمەن قاتار، مەملەكەت باسشىسى اتاپ وتكەندەي، ءبىز جاستاردىڭ پارلامەنتكە جانە جەرگىلىكتى وكىلەتتى ورگاندارىنا كەلۋىنە ىقپال ەتۋگە ءتيىسپىز. سوندىقتان دا، ءبىزدىڭ قوعام ءۇشىن ايەلدەر مەن جاستار جاقسى الەۋمەتتىك جانە ساياسي الەۋەتكە يە»، - دەيدى.

ەسكە سالا كەتسەك، 2019 جىلدىڭ جەلتوقسانىندا پرەزيدەنت ق-ج.توقاەۆ ۇلتتىق قوعامدىق سەنىم كەڭەسىنىڭ ەكىنشى وتىرىسىندا، قولدانىستاعى ساياسي جۇيەنى رەفورمالاۋعا باعىتتالعان بىرقاتار ۇسىنىس جاساعان ەدى. وندا پارتيالىق سايلاۋ تىزىمدەرىندە ايەلدەر مەن جاستارعا ارنالعان مىندەتتى 30 پايىز كۆوتانى قاراستىرۋ جانە ساياسي پارتيالاردى قۇرۋ ءۇشىن تىركەۋ تالابىن 40 مىڭنان 20 مىڭ ادامعا دەيىن تومەندەتۋ تۋرالى ايتىلعان.

Abai.kz