الماتى قالاسى مەن الماتى وبلىسى اراسىنداعى بلوك-بەكەتتە بولعان قايعىلى وقيعادان كەيىن، قر ىشكى ىستەر ءمينيسترى ەرلان تۇرعىمباەۆ الماتى ءىىد باسشىلىعىنا قاتىستى قاتاڭ شارا قابىلداپتى.

25 مامىردا بولعان قايعىلى وقيعادان كەيىن تەكسەرىس جۇرگىزىلگەن. الدىن الۋ جۇمىستارىن جۇرگىزۋدە ولقىلىقتار بولىپتى. ءتارتىپ بۇزعان قىزمەتكەرلەرگە دەر كەزىندە ءتيىستى شارالار قولدانىلماعان ەكەن. سونىمەن قاتار، باق-قا اقپاراتتى بۇرمالاپ ۇسىنۋ فاكتىسىنە دە باعا بەرىلگەن.

ءسويتىپ، مينيستر تۇرعىمباەۆتىڭ بۇيرىعى بويىنشا 9 پوليتسەيگە تارتىپتىك جازا بەرىلگەن. 3 پوليتسەي قىزمەتىنەن بوساتىلعان. 

– الماتى قالاسى پد پاترۋلدىك پوليتسيا پولكى كومانديرىنىڭ ورىنباسارى پوليتسيا پودپولكوۆنيگى ق.ە. ساتاەۆ;

– الماتى قالاسى پد كادر ساياساتى باسقارماسىنىڭ باسشىسى پوليتسيا پولكوۆنيگى و. س. مىرزابەكوۆ;

– الماتى قالاسى پد جەكە قۇرام بويىنشا ينسپەكتسيا باسشىسى پوليتسيا پودپولكوۆنيگى ا.و. اقىلبەكوۆ اتقارىپ جۇرگەن لاۋازىمدارىنان بوساتىلدى.

– الماتى قالاسى پد جەرگىلىكتى پوليتسيا قىزمەتىنىڭ باسشىسى پوليتسيا پولكوۆنيگى م. ا. ساتتاروۆقا (بۇرىن پولك كومانديرى قىزمەتىن اتقارعان);

– الماتى قالاسى وزىندىك قاۋىپسىزدىك باسقارماسىنىڭ باسشىسى پوليتسيا پودپولكوۆنيگى س. و. كوكىرەكباەۆقا;

– الماتى قالاسى پد باسشىسىنىڭ ورىنباسارى پوليتسيا پولكوۆنيگى ا.ا. ناشاربەكوۆكە قىزمەتىنە تولىق سايكەس ەمەستىگى ەسكەرتىلدى.

– الماتى قالاسى پد باسشىسىنىڭ ءبىرىنشى ورىنباسارى پوليتسيا پولكوۆنيگى ن. س الماسبەكوۆكە;

– الماتى قالاسى پد ءبولىم باسشىسى پوليتسيا پودپولكوۆنيگى س.ك. ازىربەككە;

– الماتى قالاسى پوليتسيا دەپارتامەنتىنىڭ باسشىسى ق.د.تايمەردەنوۆكە قاتاڭ سوگىس جاريالاندى.

«ءاربىر باسشى ءوزىنىڭ قاراماعىنداعىلارعا جاۋاپتى. ول جەكە قۇرام اراسىندا ءتارتىپ پەن زاڭدىلىقتى ساقتاۋدى قامتاماسىز ەتەدى. بۇل جۇمىس الماتى قالاسىنىڭ پوليتسيا دەپارتامەنتىندە ءتيىستى دەڭگەيدە ۇيىمداستىرىلماعان. ناتيجەسىندە ءبىز بىردەن ەكى قىزمەتكەردەن ايىرىلىپ قالدىق، ءبىر قىزمەتكەر اۋىر دەنە جاراقاتىن الدى. ءبىزدىڭ بارلىعىمىز ءۇشىن، اسىرەسە، تۋعان-تۋىسقاندارىمىز ءۇشىن بۇل – ۇلكەن قايعى-قاسىرەت جانە ورنى تولماس قازا.

سوندىقتان بۇل توتەنشە جاعدايعا جول بەرگەن باسشىلارعا ءتيىستى شارالار قابىلداندى. ءىىم باسشىلىعى الداعى ۋاقىتتا دا قىزمەتتىك ءتارتىپتى ساقتاۋدى قاتاڭ تالاپ ەتىپ، پوليتسيا قىزمەتكەرلەرىنىڭ كەز كەلگەن ءتارتىپ بۇزۋشىلىعىنا ءپرينتسيپتى باعا بەرىپ، جاڭا جاعدايدا جۇمى ىستەگىسى كەلمەيتىن نەمەسە جۇمىس ىستەي المايتىن ادامداردان ءوز قاتارىن تازالايتىن بولادى». – دەپتى مينيستر تۇرعىمباەۆ.

ەستەرىڭىزگە سالا كەتەيىك، 25 مامىر كۇنى الماتى وبلىسى، قاراساي اۋدانى، كوكساي ىقشاماۋدانىنداعى بلوك-بەكەتتە بولعان قايعىلى وقيعادان ەكى پوليتسيا قىزمەتكەرى كوز جۇمدى. بىرەۋى اۋىر جاراقات الىپ، اۋرۋحاناعا جەتكىزىلگەن.

1992 جىلعى ازامات مىنگەن كولىك الدىمەن باقىلاۋ-وتكىزۋ بەكەتىنە، سوسىن پوليتسيا كولىگىنە سوعىلعان.

قايتىس بولعان ەكى ازامات:

جاراس جانعازيەۆ – ىشكى ىستەر مينيسترلىگى الماتى قالاسىنىڭ پوليتسيا دەپارتامەنتى پاترۋلدىك پوليتسيا پولكىنىڭ قىزمەت ينسپەكتورى.

داستان ابدىقانوۆ (مارقۇم) – ىشكى ىستەر مينيسترلىگى الماتى قالاسىنىڭ پوليتسيا دەپارتامەنتى پاترۋلدىك پوليتسيا پولكىنىڭ پوليتسەيى.

كەشە پرەزيدەنت توقاەۆ قايتىس بولعان پوليتسەيلەرگە  II جانە III دارەجەلى ايبىن وردەنىن بەرۋ تۋرالى قاۋلى شىعاردى.

وسى وقيعادان كەيىن الەۋمەتتىك جەلىدە بلوك-بەكەتتە پاترۋل كولىگىن سوققان جەڭىل اۆتوموبيل جۇرگىزۋشىسى بۇرىن پوليتسيادا جۇمىس ىستەگەنى تۋرالى اقپارات تارادى. العاشىندا الماتى قالالىق پد ءباسپاسوز حاتشىسى سالتانات ازىربەك بۇل اقپاراتتى تەرىستەگەن. ارتىنشا، الماتى پوليتسيا دەپارتامەنتىنىڭ باستىعى قانات تايمەردەنوۆ كۇدىكتىنىڭ پوليتسيادا قىزمەت ىستەگەنىن راستادى.

«ول پوليتسيادا التى جىل قىزمەت ەتتى، قىزمەتتىك مىندەتتەرىن تيىسىنشە ورىنداماعانى ءۇشىن ءتورت تارتىپتىك جازا الدى. بۇل ونىڭ ىشكى ىستەر ورگاندارىنان كەتۋىنە سەبەپ بولدى. بىراق ول ودان كەيىن دە ءوزى ءۇشىن دۇرىس قورىتىندى جاساي المادى. زاڭدى بۇزىپ، رولگە ماس كۇيىندە وتىرىپ، قىلمىس جاسادى»، - دەگەن ەدى قانات تايمەردەنوۆ.

كوروناۆيرۋس پاندەمياىنا بايلانىستى ەنگىزىلگەن كارانتين كەزىندە بلوكپوستتاردا پوليتسيا قىزمەتكەرىن كولىكپەن قاعىپ ءوتۋ وسىعان دەيىن بىرنەشە رەت بولعان. 30 ساۋىردە الماتى قالاسى مەدەۋ اۋدانىنداعى بلوكپوستتا كولىك جۇرگىزۋشىسى پوليتسيا قىزمەتكەرىن قاعىپ كەتكەن. ءدال وسىنداي جاعداي 13 مامىردا تۇركىستان وبلىسىنان شىمكەنتكە كىرەبەرىستە بولعان.

قازاقستان ۇكىمەتى ەلدىڭ ەكى ءىرى قالاسى – الماتى مەن نۇر-سۇلتاندى ناۋرىزدىڭ 19-نان كارانتينگە جاپقان. مامىردىڭ 11-ءى كۇنى توتەنشە جاعداي اياقتالدى، بىراق ەپيدەميولوگيالىق احۋالعا بايلانىستى كارانتين كۇشىندە قالىپ، بلوكپوستتار ءالى الىنعان جوق.

Abai.kz